ស្នាដៃ និងប្រលោមលោកឆ្នាំ២០១៨ ដែលទទួលបានការចាប់អារម្មណ៍

ជាតិ

ស្នាដៃ និងប្រលោមលោកឆ្នាំ២០១៨ ដែលទទួលបានការចាប់អារម្មណ៍

02, Jan 2019 , 7:19 pm

រូបភាព

ដោយ: ប៉ូ សាគុន

ភ្នំពេញ៖ ស្នាដៃប្រលោមលោក និងសៀវភៅលើកទឹកចិត្តមួយចំនួននៅក្នុងឆ្នាំ២០១៨ ទទួលបានការចាប់អារម្មណ៍គួរឱ្យកត់សម្ភាល់។ សារព័ត៌មានថ្មីៗ សូមលើកយកតែស្នាដៃមួយចំនួនមកបង្ហាញជូនតែប៉ុណ្ណោះ ក្នុងចំណោមស្នាដៃដែលគួរឱ្យចាប់អារម្មណ៍ជាច្រើននោះ។

ស្នាដៃប្រលោមលោក និងប្រភេទលើកទឹកចិត្តទាំងនោះ រួមមានស្នាដៃរបស់អ្នកនិពន្ធ ម៉ៅ សំណាង «ប្រលោមចិត្ត» ដែលជាប្រភេទប្រលោមលោកលើកទឹកចិត្ត ដែលមានលាយឡំនឹងស្នេហា។

ចំណែករឿង «ស្នេហាសុភាពបុរស» ជាស្នាដៃប្រលោមលោករបស់អ្នកនិពន្ធ សុខ ចាន់ផល។ រឿងនេះនិយាយពីអារម្មណ៍ច្របូកច្របល់របស់មនុស្សពេញវ័យ ដែលអប់រំទៅលើទស្សននៃជីវិតពីយុវភាពរហូតដល់វ័យចាស់។ «សង្សា១៤ថ្ងៃ» គឺជាប្រលោមលោកដ៏លេចធ្លោផងដែររបស់លោក សុខ ចាន់ផល។

រីឯសៀវភៅប្រភេទទស្សនៈ និងការលើកទឹកចិត្តមានសៀវភៅ «កាដូជីវិត» របស់កញ្ញា សែត ហត្ថា ហៅកូនចាបមាស។ «កាដូរជីវិត» បរិយាយពីការលើកទឹកចិត្ត ការជំរុញទឹកចិត្ត ការកំណត់គោលដៅក្នុងជីវិត ការតស៊ូអត់ទ្រាំ និងការធ្វើតាមក្ដីស្រមៃជាដើម។ ចំណែកអ្នកនិពន្ធ គឹម ឌីណា មានស្នាដៃ «មនុស្សបាក់ទឹកចិត្ត»។ សៀវភៅនេះនិយាយពីបទពិសោធន៍បាក់ទឹកចិត្តរបស់អ្នកនិពន្ធផ្ទាល់ផង និងមានរឿងខ្លីផ្សេងទៀត បង្ហាញពីបញ្ហរបស់មនុស្សស្រី និងយុវជន ដែលបានជួបប្រទះ។ ម្ចាស់ស្នាដៃចង់ឱ្យអ្នកដែលបានអានសៀវភៅរបស់ខ្លួន បានដឹងថាមានមនុស្សច្រើនណាស់ដែលជួបបញ្ហាបាក់ទឹកចិត្ត តែគេនៅតែអាចជម្នះបាន។

ក្រៅពីស្នាដៃទាំងនោះនៅមានរឿងប្រលោមលោក និងស្នាដៃប្រភេទលើកទឹកចិត្តដូចជា “ស្ដេចម៉ែ ស្ដេចកូន”, “កូនទី៦”, “សមុទ្រអមតៈ”, “កាពីតែនជីវិត”, “ផ្ទះកណ្ដាលបឹង” ជាដើម។

ស្នាដៃជាប្រលោមលោកក្ដី ជាប្រភេទលើកទឹកចិត្តក្ដី សុទ្ធតែមានគោលដៅផ្ដល់ជាគតិដល់អ្នកអានទាំងអស់។ សៀវភៅជាប្រភពផ្ដល់ចំណេះដឹង ការកម្សាន្ត បទពិសោធន៍នានា និងមេរៀនជីវិត ដែលអ្នកអានមិនធ្លាប់ជួប តែអាចបញ្ចៀសមិនឱ្យជួបវិបត្តិបានខ្លះៗដែរ។ សៀវភៅគឺជាឃ្លាំងចំណេះ គឺជាឃ្លាំងទ្រព្យ៕