ថ្ងៃសុក្រ ទី២៥ មករានេះ ONE Championship បានរៀបចំព្រឹត្តិការណ៍នៅទីក្រុងម៉ានីល ប្រទេសហ្វីលីពីន ដែលក្នុងនោះមានគូប្រកួតចំនួន ១១គូប្រមូលដែលត្រូវប្រកួតប្រជែងក្នុងព្រឹត្តិការណ៍ ONE: HERO’S ASCENT។
ONE: HERO’S ASCENTជាមួយការប្រដាល់ចម្រុះជាច្រើនប្រភេទដែលរួមមាន ប្រដាល់សេរី មួយថៃ គុនចម្រុះ ក៏ដូចជាការប្រកួតដណ្តើមជើងឯក ONE World Title ជាដើម។
ខាងក្រោមនេះជាអ្វីដែលជនរួមជាតិគួរតាមដានទស្សនា៖
១. ការដណ្តើមខ្សែក្រវាត់ ONE Flyweight World Title
គូសំខាន់នៃព្រឹត្តិការណ៍នេះមានវត្តមានកីឡាករ Geje Eustaquio ម្ចាស់ខ្សែក្រវាត់ ONE Flyweight World Champion នឹងប្រកួតជម្រះបញ្ជីជាមួយអតីតខ្សែក្រវាត់ពិភពលោកម្នាក់ទៀតគឺ Adriano Moraes។
មួយគូនេះមិនអស់ចិត្តនឹងគ្នាដោយសារធ្លាប់ប៉ះគ្នាម្តងកាលពីពី ONE មករៀបចំព្រឹត្តិការណ៍ ONE: RISE OF THE KINGDOM ឆ្នាំ២០១៤ នៅមហោស្រពកោះពេជ្យ រាជធានីភ្នំពេញ ដែលកាលនោះភាគីប្រេស៊ីល Moraes ចាប់ក្លេររឹតក Eustaquio ឈ្នះក្នុងទឹកទី២ ហើយយកបានខ្សែក្រវាត់ ONE World Flyweight Championship Title តែម្តង។
បន្ទាប់ពីចាញ់ Moraes កាលនោះមក ដល់ឆ្នាំ ២០១៨ Eustaquio ដែលជាកីឡាករក្រុម Lakay បានចាប់ឲ្យប្រកួតសងសឹកគ្នាម្តងទៀត តែលើកនេះឈ្នះដោយពិន្ទុ ដូច្នេះហើយទើបធ្វើឲ្យអ្នកគាំទ្រនៅតែទន្ទឹងតាមដានថានរណាខ្លាំងជាងនរណាឲ្យប្រាកដ ជាពិសេសនឹងដឹងក្នុងការប្រកួតថ្ងៃសុក្រនេះ។
២. ៥គូខ្លាំងៗក្នុងវគ្គ ONE Super Series Bouts
តាំងពី ONE Championship បានបង្កើតការប្រកួតបែបសេរី ONE Super Series (OSS) មកឃើញថាមានជោគជ័យខ្ពស់ក្នុងឆ្នាំ ២០១៨។
ដូច្នេះនៅព្រឹត្តិការណ៍ ONE: HERO’S ASCENTនេះម្ចាស់ផ្ទះហ្វីលីពីនប្រាកដជាសប្បាយភ្នែកទស្សនាការប្រកួតប្រដាល់មួយថៃ និងប្រដាល់សេរីខ្លាំងមិនខាន។
ចាប់ផ្តើមគូពិសេសដំបូងគឺមានអ្នកលេងមួយថៃ Bangpleenoi Petchyindee ក្នុងការប្រកួតទម្ងន់ ៦៥គីឡូក្រាមជាមួយកីឡាករ ហូឡង់ Brown Pinas ដែលពូកែខាងទាត់
បន្ទាប់ពីនោះមានតារាប្រដាល់ល្បីរបស់ថៃមួយរូបទៀតគឺ Rodtang Jitmuangnon កីឡាករចិត្តសឿងរូបនេះមានបំណងចង់បំបាក់ភាគីជនជាតិទុយនីស៊ី Fahdi Khaled ឲ្យបានសម្រេច។
៣. ការប្រកួតជម្រុះត្រីមាសចុងក្រោយ
គូសំខាន់មួយគូទៀតនៃកម្មវិធីនេះ ក៏មានជើងខ្លាំងមកពីកោះហាវ៉ៃ Lowen Tynanes ត្រូវផ្គូផ្គងជាមួយ Honorio Banario កីឡាករតំណាងក្រុម Lakay ដែលជាអតីតម្ចាស់ខ្សែក្រវាត់ ONE Featherweight World Champion។ មួយគូនេះនឹងប៉ះគ្នាដើម្បីចូលវគ្គជម្រុះ Lightweight World Grand Prix Quarter-Final។
កីឡាករជនជាតិអាមេរិករូននេះ ធ្លាប់បានចូលរួមប្រកួតនៅកម្ពុជាក្នុងព្រឹត្តិការណ៍ ONE: KINGDOM OF KHMER នាឆ្នាំ ២០១៥ដែរ ប៉ុន្តែបានបាត់មុខពីសង្វៀនធំ ONE Championship តាំងពីពេលនោះមក។
Lowen Tynanes មិនចង់ខាតពេលវេលាទៀតទេ ដូច្នេះរូបគេចាប់គូជាមួយខាងឥណ្ឌូណេស៊ី Banario តែម្តងទៅហើយសង្ឃឹមថាអាចឆ្លងដល់វគ្គមួយទៀតគឺ ONE's Lightweight World Grand Prix។ វគ្គ ONE's Lightweight World Grand Prix នឹងមានជើងខ្លាំងល្បីៗមួយកម្រិតទៀតដូចជា Amir Khan និង Eddie Alvarez ជាដើមនឹងប្រកួតដណ្តើមខ្សែក្រវាត់ពិភពលោក ONE World Title នោះដូចគ្នា៕
អត្ថបទ៖ Matias Andres