រថយន្ត
អន្តរជាតិ
ករណីស្លាប់ដោយគ្រោះចរាចរណ៍នៅបារាំងថយចុះដោយសារគោលការណ៍កំណត់ល្បឿន
× ៦ខែបន្ទាប់ពីដាក់គោលការណ៍កំណត់ល្បឿនលឿនបំផុតត្រឹម៨០គីឡូម៉ែត្រក្នុងមួយម៉ោង រដ្ឋាភិបាលបារាំង បានបង្ហាញពីតួលេខនៃធ្លាក់ចុះករណីស្លាប់ដោយសារគ្រោះថ្នាក់ចរាចរណ៍។ នេះបើយោងតាមការផ្សាយរបស់សារព័ត៌មានយានយន្តបារាំង Auto Moto។
ដំបូងឡើយគោលកំណត់ល្បឿនត្រឹម៨០គីឡូម៉ែត្រក្នុងមួយម៉ោងដែលដាក់ចេញដោយលោកប្រធានាធិបតី Emmanuel Macron រងនូវការរិះគន់ និងក្លាយជាប្រធានបទនៃការពិភាក្សាឥតឈប់ឈរ។ ក្រោមកិច្ចសហការជាមួយសមាគម 40 Millions d’Automobilistes លោកនាយករដ្ឋមន្ត្រីបារាំង Edouard Philippe បានបង្ហាញតួលេខវិជ្ជមាន ជាពិសេសអត្រាធ្លាក់ចុះដ៏គួរឲ្យកត់សម្គាល់លើចំនួនអ្នកស្លាប់ដោយសារគ្រោះថ្នាក់ចរាចរណ៍ បើគិតចាប់តាំងពីខែកក្កដា ឆ្នាំ២០១៧មក។
តាមរបាយការណ៍របស់ភ្នាក់ងារសុវត្ថិភាពផ្លូវថ្នល់ នៅឆ្នាំ២០១៨ អ្នកស្លាប់ដោយសារគ្រោះថ្នាក់ចរាចរណ៍ចំនួនជាង៣០០០នាក់ ពោលគឺមានប្រមាណ២០០នាក់តិចជាងឆ្នាំ២០១៧ ។ ចំនួននេះ ប្រហែលទៅនឹងឆ្នាំ២០១៣ ដែលជាឆ្នាំដែលមានអ្នករងគ្រោះដោយគ្រោះថ្នាក់ចរាចរណ៍តិចជាងគេក្នុងប្រវត្តិសាស្ត្របារាំង។ ឆ្នាំ២០១៤ ឆ្នាំ២០១៦ និងឆ្នាំ១៩៧២ ជាឆ្នាំដែលបារាំង ខាតបង់ដ៏ធ្ងន់ធ្ងរដោយសារករណីគ្រោះថ្នាក់ចរាចរណ៍។
ស្របពេលជាមួយគ្នា អង្គការមួយបានរិះគន់ថា ការកំណត់ល្បឿននេះ បានធ្វើសង្វាក់ការងារថយចុះដោយសារតែភាពយឺតយ៉ាវក្នុងការធ្វើដំណើរ។ អង្គការដដែលបានលើកឡើងថា ម៉ោងដែលខាតបង់នៅលើផ្លូវថ្នល់មានរហូតដល់៣០០លានម៉ោង ដែលធ្វើខាតថវិកាប្រមាណ៣,៨ពានលានអឺរ៉ូក្នុង១ឆ្នាំ៕
© រក្សាសិទ្ធិដោយ thmeythmey.com