លោក គល់ បញ្ញា ថា ពាណិជ្ជកម្មរបស់ចិន ជាអន្ទាក់បំណុលសម្រាប់កម្ពុជា ខណៈអ្នកសេដ្ឋកិច្ចឲ្យរដ្ឋាភិបាលប្រយ័ត្នរឿងបំណុល

ជាតិ

សេដ្ឋកិច្ច

លោក គល់ បញ្ញា ថា ពាណិជ្ជកម្មរបស់ចិន ជាអន្ទាក់បំណុលសម្រាប់កម្ពុជា ខណៈអ្នកសេដ្ឋកិច្ចឲ្យរដ្ឋាភិបាលប្រយ័ត្នរឿងបំណុល

28, Jan 2019 , 5:30 pm

រូបភាព

(ខាងឆ្វេង) លោក គី សេរីវឌ្ឍន៍ អ្នកជំនាញសេដ្ឋកិច្ច និងលោក គល់ បញ្ញា នាយកប្រតិបត្តិអង្គការឃ្លាំមើលកាបោះឆ្នោតនៅកម្ពុជា ហៅកាត់ថា ខុមហ្វ្រែល

ដោយ: ភួង វ៉ាន់ថា

ភ្នំពេញ៖ មេដឹកនាំអង្គការខុមហ្វ្រែលនៅកម្ពុជា បាននិយាយថា កម្ពុជាទទួលបានផលចំណេញតិចជាងចិន នៅក្នុងទំនាក់ទំនងពាណិជ្ជកម្មរវាងភាគីទាំងពីរ។ ហើយទំនាក់ទំនងនេះ នឹងផ្ដល់ផលអវិជ្ជមានដល់កម្ពុជា ដែលវាជាអន្ទាក់បំណុលប៉ុណ្ណោះ។ សម្រាប់អ្នកវិភាគសេដ្ឋកិច្ចវិញ កម្ពុជាគ្មានអ្វីខាតបង់ដោយសារទាញយកផលពាណិជ្ជកម្មតូចជាងចិននោះទេ ប៉ុន្តែរដ្ឋាភិបាលត្រូវគិតគូរពីបញ្ហាបំណុល។

នាយកប្រតិបត្តិអង្គការឃ្លាំមើលកាបោះឆ្នោតនៅកម្ពុជា ហៅកាត់ថា ខុមហ្វ្រែល លោក គល់ បញ្ញា បាននិយាយថា ប្រទេសក្រីក្រដែលធ្វើពាណិជ្ជកម្ម ជាមួយចិននឹងជួបបញ្ហាឱនភាពនៃជញ្ជីងពាណិជ្ជកម្មធ្ងន់ធ្ងរ និងជាប់អន្ទាក់បំណុលដោយបាត់បង់កម្មសិទ្ធិគម្រោង និងប្រគល់ធនធានធម្មជាតិឲ្យទៅចិន ក្រៅពីឲ្យលុយខ្ចីជាមួយលក្ខខណ្ឌការប្រាក់ខ្ពស់និងការបញ្ចាំ។ លោក គល់ បញ្ញា បកស្រាយបែបនេះ ចង់សំដៅទៅលើផលអវិជ្ជមាននៃទំនាក់ទំនងពាណិជ្ជកម្មរវាងកម្ពុជា-ចិន។ បើតាមលោក បញ្ញា កម្ពុជាទទួលបានផលចំណេញពីទំនាក់ទំនងពាណិជ្ជកម្មជាមួយសហភាពអឺរ៉ុប និងសហរដ្ឋអាមេរិក ច្រើនជាងចិន។

នាយកប្រតិបត្តិខុមហ្វ្រែលរូបនេះ បានសរសេរនៅលើទំព័រហ្វេសប៊ុកផ្លូវការខ្លួនថា៖ «ឆ្នាំកន្លងមកនិន្នាការនៃពាណិជ្ជកម្មជាមួយប្រទេសកុម្មុយនីស្តមួយនេះ ដែលមិនគាំទ្រសិទ្ធិមនុស្សនិងប្រជាធិបតេយ្យ កម្ពុជានាំចូលពីចិន ៥ តែចិននាំចូលបានតែ ១។ គឺឱនភាពឬខាតខ្លាំងសម្រាប់កម្ពុជាតែចិន ទេជាអ្នកចំណេញ ៥ទល់១។ ប្រទេសលោកសេរីដែលគាំទ្រសិទ្ធិមនុស្សនិង ប្រជាធិបតេយ្យ កម្ពុជានាំចេញ ឬសហភាពអឺរ៉ុបនាំចូលពីកម្ពុជា ៥ តែ សហភាពអឺរ៉ុបនាំចេញឬ កម្ពុជានាំចូលពី សហភាពអឺរ៉ុបបាន តែ ០,២ គឺ សហភាពអឺរ៉ុបជាអ្នកជួបឱនភាព ឬខាត តែកម្ពុជាជាអ្នកចំណេញច្រើន។ ពាណិជ្ជកម្មជាមួយសហរដ្ឋអាមេរិក ក៏កម្ពុជាបាន ចំណេញ ៣ ទល់ ០,៤»។

ការលើកឡើងរបស់លោក គល់ បញ្ញា នេះធ្វើឡើងបន្ទាប់ពីប្រមុខរាជរដ្ឋាភិបាលកម្ពុជា-ចិន បានប្ដេជ្ញាបង្កើនទំហំពាណិជ្ជកម្មទ្វេភាគីឲ្យដល់ចំនួន ១០ពាន់លានដុល្លារ នៅត្រឹមឆ្នាំ២០២៣ខាងមុខ។

តែយ៉ាងណាលោក គី សេរីវឌ្ឍន៍ អ្នកវិភាគសេដ្ឋកិច្ច មិនយល់ស្របទៅនឹងការលើកឡើងរបស់នាយកប្រតិបត្តិនៃអង្គការ ខុមហ្វែលនោះទេ ដោយលោកបានអះអាងបែបទ្រឹស្តីសេដ្ឋកិច្ចថា គ្មានអ្នកខាត ឬអ្នកចំណេញនោះទេ ព្រោះបើភាគីណាមួយគិតថា ខ្លួនខាតនោះគេនឹងមិនរកស៊ីជាមួយភាគីម្ខាងទៀតឡើយ។ សម្រាប់លោក សេរីវុឌ្ឍន៍ ទីផ្សារចិនមានទំហំធំ ជាងទីផ្សារអ៊ឺរ៉ុបទៅទៀត ដែលវាជាចំណុចល្អសម្រាប់កម្ពុជាក្នុងការបើកច្រកពាណិជ្ជកម្មជាមួយចិនទៅវិញទេ។

ថ្លែងប្រាប់សារព័ត៌មានថ្មីៗ អ្នកជំនាញសេដ្ឋកិច្ចរូបនេះ បានពន្យល់ដូច្នេះថា៖ « តាមទ្រឹស្តីសេដ្ឋកិច្ច កាលណាធ្វើពាណិជ្ជកម្មជាមួយគ្នា គឺចំណេញទាំងសងខាង មានន័យថាទោះកម្ពុជាទិញគេក៏យើងចំណេញដែរ ប្រសិនបើយើងផលិតខ្លួនឯងថ្លៃជាងយើងទិញគេបានថោកជាង ដូច្នេះយើងទិញគេហើយ។ បើអ៊ីចឹងគាត់ (គល់ បញ្ញា) គួរតែដាំបាយ និងធ្វើម្ហូបហូបខ្លួនឯង ធ្វើអ្វីៗខ្លួនឯងមិនចាំបាច់ទិញគេទេ។ ក្នុងន័យនេះ បើយើងធ្វើឲ្យអស់ថ្លៃជាងទិញគេ យើងទិញហើយ យកពេលទៅផលិតអ្វីផ្សេង»។

តាមការយល់ឃើញរបស់លោក សេរីវឌ្ឍន៍ គោលនយោបាយរបស់រាជរដ្ឋាភិបាល មិនបានបោះបង់ចោលទីផ្សារអ៊ឺរ៉ុបទេ គឺរដ្ឋាភិបាលព្យាយាមចាប់យកទាំងអស់ ទាំងអាមេរិក ទាំងអ៊ឺរ៉ុប និងចិនផង ដែលវាជារឿងល្អសម្រាប់កម្ពុជា។

ទាក់ទងនៅនឹងបញ្ហាអន្ទាក់បំណុលរបស់ចិនមកលើកម្ពុជាវិញ លោក គី សេរីវឌ្ឍន៍ បានលើកឡើងថា ស្ថានភាពបំណុលរបស់កម្ពុជានាពេលបច្ចុប្បន្ន មិនទាន់មានបញ្ហាអ្វីទេ។ ប៉ុន្តែរាជរដ្ឋាភិបាល ក៏គួរតែប្រុងប្រយ័ត្នខ្ពស់ចំពោះបញ្ហានាពេលអនាគតនេះ ដើម្បីកុំឲ្យធ្លាក់ចូលទៅក្នុងអន្ទាក់បំណុលដូចនៅប្រទេសដ៏ទៃ។ ។អ្នកវិភាគសេដ្ឋកិច្ចរូបនេះស្នើឲ្យរដ្ឋាភិបាលកុំបណ្ដែតបណ្ដោយឲ្យបញ្ហាបំណុលកើនឡើង៕