ជាតិ
សេដ្ឋកិច្ច
ចំណូលពន្ធក្នុងឆ្នាំ២០១៨ ជាង២ពាន់លានដុល្លារ អគ្គនាយកដ្ឋានពន្ធដារ
× ភ្នំពេញ៖ រាជរដ្ឋាភិបាលប្រមូលពន្ធដារបានចំនួន ៨,៧៩១.៤០ ប៊ីលានរៀល (ប្រមាណ ២,១៩៧.៨៥ លានដុល្លារអាមេរិក) ដែលកើនឡើងចំននួន១,០៣៦.៥៩ ប៊ីលានរៀល (ប្រមាណ ២៥៩,១៥ លានដុល្លារ) ស្មើនឹង ១៣,៣៧ភាគរយ បើប្រៀបធៀបនឹងរយៈពេលដូចគ្នានៃឆ្នាំ២០១៧។ នេះបើយើងតាមរបាយការណ៍បូកសរុបចំណូលពន្ធអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ប្រចាំឆ្នាំ ២០១៨។
ក្នុងរបាយការណ៍របស់អគ្គនាយកដ្ឋានពន្ធដារ បានបញ្ជាក់ថា ទំហំចំណូលក្នុងឆ្នាំ២០១៨កន្លងទៅនេះ លើសផែនការប្រចាំឆ្នាំ ចំនួន ១, ០៩៧.៩០ ប៊ីលានរៀល (ប្រមាណ ២៧៤, ៤៧ លានដុល្លារ) ស្មើនឹង ១១៤, ២៧ ភាគរយនៃផែនការប្រចាំឆ្នាំ។
ដោយឡែកចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានក្នុងខែធ្នូ ឆ្នាំ២០១៨ មានចំនួន ៥៧០,០៧ ប៊ីលានរៀល (ប្រមាណជា ១៤២,៥២ លានដុល្លារអាមេរិក) ស្មើនឹង ៧,៤១ភាគរយ នៃផែនការប្រចាំឆ្នាំ។ ចំណូលពន្ធអាករក្នុងខែធ្នូនេះ មានការកើនឡើងចំនួន ១២៥,៧៧ ប៊ីលានរៀល(ប្រមាណជា ៣១,៤៤ លានដុល្លារអាមេរិក) ស្មើនឹង ២៨,៣១ភាគរយ បើប្រៀបធៀប នឹងចំណូលពន្ធ-អាករ ប្រចាំខែធ្នូ ឆ្នាំ២០១៧ ។
របាយការណ៍ដដែល បានបន្ថែមថា ក្នុងរយៈពេល៥ចុងក្រោយនេះ អគ្គនាយកដ្ឋានពន្ធដារ សម្រេចបាននូវកំណើនចំណូលពន្ធ ក្នុងរង្វង់ប្រមាណ ២០ភាគរយក្នុងមួយឆ្នាំ។ ក្នុងនោះចំណូលពន្ធឆ្នាំ២០១៤ បានចំនួន៤២៦៧ ប៊ីលានរៀល (១០៦៧លានដុល្លារ)។ ដោយឡែកចំណូលពន្ធ ឆ្នាំ២០១៥ មានចំនួន៥២១០ ប៊ីលានរៀល(១៣០២លានដុល្លារ)។ រីឯឆ្នាំ២០១៦ មានចំនួន ៦០១០ប៊ីលានរៀល(១៥០២លានដុល្លារ)។ ចំណែកឆ្នាំ២០១៧ មានចំនួន៧៩០៦ប៊ីលានរៀល(១៩៧៦លានដុល្លារ) និងឆ្នាំ២០១៨ មានចំនួន៨៧៩១ប៊ីលានរៀល(២១៩៧លានដុល្លារ)៕
© រក្សាសិទ្ធិដោយ thmeythmey.com