អន្តរជាតិ
ប្រធានាធិបតីបណ្ដោះអាសន្នវ៉េណេស៊ុយអេឡា ប្រាប់ចិននិងរុស្ស៊ីឲ្យឈប់គាំទ្រលោក ម៉ាឌុយរ៉ូ មេដឹកនាំប្រឆាំងវ៉េណេស៊ុយអេឡា ហ័ន ក្វៃដូ (រូបភាព AFP)
× ប្រធានាធិបតីបណ្ដោះអាសន្នវ៉េណេស៊ុយអេឡា ហ័ន ក្វៃដូ កំពុងព្យាយាមអូសទាញរុស្ស៊ី និងចិនឲ្យចេញឆ្ងាយពីគូប្រជែងនយោបាយរបស់ខ្លួន គឺប្រធានាធិបតី នីកូឡាស់ ម៉ាឌុយរ៉ូ ។ លោក ក្វៃដូ អះអាងថា វាជារឿងល្អសម្រាប់មហាអំណាចទាំងពីរក្នុងការទទួលស្គាល់រូបលោកជាមេដឹកនាំស្របច្បាប់របស់វ៉េណេស៊ុយអេឡាជំនួសលោក ម៉ាឌុយរ៉ូ ដែលកំពុងរងសម្ពាធកាន់តែខ្លាំង។ រុស្ស៊ី និងចិនបានប្រកាសឈរខាងលោក ម៉ាឌុយរ៉ូ ក្នុងជម្លោះនៅរដ្ឋអាមេរិកឡាទីនមួយនេះ។
ស្របពេលមានអាមេរិកជាខ្នងបង្អែកធំ មេដឹកនាំបណ្ដោះអាសន្នវ៉េណេស៊ុយអេឡា ហ័ន ក្វៃដូ កំពុងងាករករុស្ស៊ី និងចិនដែលបន្តគាំទ្រប្រធានាធិបតី នីកូឡាស់ ម៉ាឌុយរ៉ូ ។ មហាអំណាចធំៗទាំងនេះ ប្រកាសគាំទ្រភាគីផ្សេងៗក្នុងវិបត្តិនយោបាយនៅវ៉េណេស៊ុយអេឡាដែលកំពុងផុងជ្រៅកាន់តែខ្លាំង។
ក្នុងកិច្ចសម្ភាសជាមួយទីភ្នាក់ងារព័ត៌មាន Reuters លោក ក្វៃដូ ដែលតាំងខ្លួនជាប្រធានាធិបតីវ៉េណេស៊ុយអេឡា និយាយថា លោកបានទាក់ទងជាមួយរុស្ស៊ី និងចិន ដែលជាម្ចាស់បំណុលធំរបស់វ៉េណេស៊ុយអេឡា និងជាអ្នកនៅពីក្រោយលោក ម៉ាឌុយរ៉ូ ។ រុស្ស៊ី និងចិននៅតែចាត់ទុកលោក ម៉ាឌុយរ៉ូ ជាប្រធានាធិបតីស្របច្បាប់តែមួយគត់របស់រដ្ឋអាមេរិកខាងត្បូងមួយនេះ ទោះជាមានការបារម្ភថា ក្រុងការ៉ាកាស់អាចគ្មានលទ្ធភាពសងបំណុលក្ដី។
អ្នកនយោបាយវ័យ៣៥ឆ្នាំដែលទើបលេចមុខមាត់នៅប៉ុន្មានសប្ដាហ៍នេះ បញ្ជាក់ថា ផលប្រយោជន៍របស់រុស្ស៊ី និងចិន នឹងត្រូវបានធានាបើពួកគេផ្លាស់ប្ដូរជំហរ។ បើតាមលោក ក្វៃដូ អ្វីដែលល្អបំផុតសម្រាប់មហាអំណាចទាំងពីរនេះ គឺស្ថិរភាពនៅវ៉េណេស៊ុយអេឡា និងការផ្លាស់ប្ដូររដ្ឋាភិបាល ព្រោះលោក ម៉ាឌុយរ៉ូ មិនបានការពារប្រជាជន មិនគាំទ្រការវិនិយោគបរទេស ហើយលោក ម៉ាឌុយរ៉ូ ក៏មនុស្សល្អសម្រាប់ប្រទេសទាំងនោះដែរ។
ទាំងលោក ក្វៃដូ ទាំងអាមេរិក កំពុងប្រឹងប្រែងដាក់សម្ពាធកាន់តែខ្លាំងលើលោក ម៉ាឌុយរ៉ូ ដើម្បីបង្ខំឲ្យលោកលាលែងតាមសម្រួល។ នៅឆាកអន្តរជាតិ អាមេរិកដាក់ទណ្ឌកម្មក្រុមហ៊ុនប្រេងរដ្ឋវ៉េណេស៊ុយអេឡា ហាមអង់គ្លេសមិនឲ្យបញ្ជូនមាសទៅឲ្យរដ្ឋាភិបាលក្រុងការ៉ាកាស់ និងស្នើឲ្យប្រទេសនានាទទួលស្គាល់លោក ក្វៃដូ វិញ។ ក្នុងស្រុកឯណេះ ក្រុមប្រឆាំងអំពាវនាវឲ្យយោធារត់ចោលលោក ម៉ាឌុយរ៉ូ ហើយស្នើប្រជាជនធ្វើបាតុកម្មទៀតផង។
ទោះជាយ៉ាងណា មេដឹកនាំប្រឆាំងដដែលនេះ អះអាងថា វិបត្តិនយោបាយបច្ចុប្បន្ន នឹងមិនរាលដាលរហូតក្លាយជាសង្គ្រាមស៊ីវិលឡើយ ព្រោះជនរួមជាតិវ៉េណេស៊ុយអេឡាដ៏ច្រើនលើសលប់គាំទ្រលោក ហើយចង់ឲ្យលោក ម៉ាឌុយរ៉ូ ចុះចេញ។ ប៉ុន្តែលោក ក្វៃដូ ក៏ព្រមានដែរថា អំពើហិង្សាអាចផ្ទុះចេញពីភាគីរដ្ឋាភិបាលលោក ម៉ាឌុយរ៉ូ ដែលប្រើប្រាស់កម្លាំពិសេសក្នុងបង្ក្រាបគូប្រជែងរបស់ខ្លួន៕
Tag:
អាមេរិក
វ៉េណេស៊ុយអេឡា
ចិន
រុស្ស៊ី
ហ័ន ក្វៃដូ
នីកូឡាស់ ម៉ាឌុយរ៉ូ
© រក្សាសិទ្ធិដោយ thmeythmey.com