ជាតិ
នយោបាយជាតិ
ទូតចិន ចំអកឲ្យអាមេរិកថា ការធ្វើរដ្ឋប្រហារនៅកម្ពុជា មិនជាប់ទាក់ទងអាមេរិកទេ តែជាប់ពាក់ព័ន្ធនឹង CIA
×![]()
ដោយ: ថ្មីៗ
ភ្នំពេញ៖ ក្រោយពីអាមេរិក ចោទចិននៅពីក្រោយ លន់ នល់ ធ្វើរដ្ឋប្រហារនៅកម្ពុជា ទូតចិនក៏មិននៅស្ងៀម ហើយចេញមករិះគន់អាមេរិកវិញលើបញ្ហានេះ។ 
ក្នុងសំណេរលើហ្វេសប៊ុករបស់ស្ថានទូតចិនប្រចាំកម្ពុជា ប្រមាណជា៤បន្ទាត់ បានឆ្លើយចំអកទៅអាមេរិក ដែលថ្លែងការពារខ្លួន ជុំវិញករណីរដ្ឋប្រហារនៅកម្ពុជា ក្នុងឆ្នាំ១៩៧០នោះថា ការធ្វើរដ្ឋប្រហារនៅកម្ពុជា គ្មានជាប់ពាក់ព័ន្ធនឹងអាមេរិកទេ ប៉ុន្តែជាប់ពាក់ព័ន្ធនឹងក្រុមចារកម្មរបស់អាមេរិក។
ស្ថានទូតចិន បានសរសេរដូច្នេះថា៖«ក្នុងពេលថ្មីៗនេះ ស្ថានទូតប្រទេសមហាអំណាចមួយប្រចាំកម្ពុជាបានលើកឡើងជាសាធារណៈថាប្រទេសខ្លួនមិនមានជាប់ទាក់ទងអ្វីជាមួយនឹងរដ្ឋប្រហាសម័យ លន់ នល់ នៅក្នុងប្រទេសកម្ពុជាកាលពីដើមទសវត្សរ៍ទី៧០ នៃសតវត្សរ៍មុនទេ។ ជាការពិតណាស់ រដ្ឋប្រហារដែលនាំឲ្យកម្ពុជាធ្លាក់ក្នុងភ្លើងសង្ក្រាមរ៉ាំរៃអស់រយៈពេលយ៉ាងយូរនោះ មិនមានទំនាក់ទំនងអ្វីនឹងអាមេរិក(US)ទេ ប៉ុន្តែមានទាក់ទងនឹងក្រុមCIA» ។
កាលពីថ្ងៃទី៣០មករា ស្ថានទូតសហរដ្ឋអាមេរិកប្រចាំកម្ពុជាស្រាប់តែផ្សាយសេចក្តីថ្លែងការណ៍មួយដែលអបអរព្រឹត្តិការណ៍៧មករា និងថ្កោលទោសរបបខ្មែរក្រហម នៅលើទំព័រហ្វេសប៊ុកផ្លូវការរបស់ខ្លួន។ ទំព័រហ្វេសប៊ុកស្ថានទូតអាមេរិកបានឆ្លើយតបទៅនឹងម្ចាស់គណនីហ្វេសប៊ុកមួយ ដែលចោទមកលើខ្លួនជាអ្នកនៅពីក្រោយរដ្ឋប្រហារនោះ យ៉ាងដូច្នេះ៖« តែយើងសូមធ្វើការកត់សំគាល់ថា សហរដ្ឋអាមេរិកមិនបានពាក់ព័ន្ធ នៅក្នុងរដ្ឋប្រហារដែលនាំអោយលោក លន់ នល់ ឡើងកាន់អំណាចនោះទេ។ រហូតមកដល់ពេលនេះ គ្មានភស្តុតាងណាមួយដែលបញ្ជាក់ពីការពាក់ព័ន្ធរបស់សហរដ្ឋអាមេរិកទេ»។
នៅក្នុងសារឆ្លើយតបដដែល ស្ថានទូតអាមេរិកបានលើកឡើងចំៗតែម្តងថាប្រទេសចិនបានគាំទ្ររបបខ្មែរក្រហម។ ស្ថានទូតអាមេរិកបានសរសេរបន្តយ៉ាងដូច្នេះ៖«ផ្ទុយទៅវិញ មានភស្តុតាងយ៉ាងច្រើនដែលបង្ហាញថា រដ្ឋាភិបាលចិនបានគាំទ្រយ៉ាងសកម្មដល់របបខ្មែរក្រហម ពីឆ្នាំ ១៩៧៥ ដល់ឆ្នាំ ១៩៧៩ និងក្នុងរយៈកាលក្រោយពីនោះមក»៕
Tag:
អាមេរិក
ចិន
រដ្ឋប្រហារ
© រក្សាសិទ្ធិដោយ thmeythmey.com
