ជាតិ
បទយកការណ៍ / បទសម្ភាសន៍
×![]()
សៀមរាប៖ លោក ផាន់ គារ៉ា នាយកសាកលវិទ្យាល័យបញ្ញាសាស្ដ្រខេត្តសៀមរាប និងជាសាស្ដ្រាចារ្យផង កាលពីពេលថ្មីៗនេះ បានបោះពុម្ពសៀវភៅមួយក្បាល មានចំណងជើងថា «៦៩ សារអំពីភាពជាអ្នកដឹកនាំ»។ ភាពជាអ្នកដឹកនាំ ដែលលោក ផាន់ គារ៉ា ចង់និយាយនៅក្នុងសៀវភៅនេះ គឺរបៀបដឹកនាំបែបខ្មែរ ដែលលោកបានរៀនសូត្រ និងឆ្លងកាត់បទពិសោធន៍ការងារផ្ទាល់ខ្លួនជាង១៥ឆ្នាំមកនេះ។ សម្រាប់សាស្ដ្រាចារ្យរូបនេះ ភាពជាអ្នកដឹកនាំបែបខ្មែរ និងបរទេសមិនខុសប្លែកគ្នាច្រើនទេ គ្រាន់តែខុសត្រង់ទីកន្លែង បរិយាកាស និងវប្បធម៌តាមប្រទេសរៀងៗខ្លួនប៉ុណ្ណោះ។ លោក ផាន់ គារ៉ា ផ្តល់ដំបូន្មានថា បើចង់ដឹកនាំគេបាន ដំបូងបុគ្គលនោះ ត្រូវចេះដឹកនាំខ្លួនឯងជាមុនសិន គឺត្រូវធ្វើខ្លួនជាមនុស្សមានសមត្ថភាពទាំងចំណេះ និងជំនាញ។ល។
សូមស្ដាប់បទសម្ភាសរវាងអ្នកស្រី អ៊ីសា រ៉ហានី អ្នកសារព័ត៌មានថ្មីៗប្រចាំខេត្តសៀមរាប និងលោក ផាន់ គារ៉ា អ្នកសរសេរសៀវភៅ ៦៩សារអំពីភាពជាអ្នកដឹកនាំ ដូចតទៅ៖
សារសំខាន់ៗដែលលោក ផាន់ គារ៉ា បានបង្កប់ក្នុងសៀវភៅរបស់លោក មាន៣ចំណុច គឺទី១ ការចេះដឹកនាំខ្លួនឯង ទី២ ឱ្យចេះយល់ពីអ្នកដទៃក្រៅពីខ្លួនឯង និងទី៣ ការចេះធ្វើការងារជាក្រុម។ លោក ផាន់ គារ៉ា ពន្យល់ថា ជំនាញទន់ ពិតជាសំខាន់ណាស់សម្រាប់ការរស់នៅ នាពេលបច្ចុប្បន្ន ពិសេសយុវជន ហើយពួកគេអាចស្វែងយល់ជំនាញទាំងនោះ នៅក្នុងសៀវភៅភាពជាអ្នកដឹកនាំរបស់លោកបាន។
គួរបញ្ជាក់ថា លោក ផាន់ គារ៉ា បញ្ចប់ថ្នាក់បរិញ្ញាបត្រផ្នែកអក្សរសាស្ដ្រខ្មែរ នៅសាកលវិទ្យាល័យភូមិន្ទភ្នំពេញ ក្នុងឆ្នាំ ២០០២។ ក្នុងជីវិតការងារ លោកបានធ្វើការជាមួយស្ថាប័នជាច្រើន មានទាំងអង្គការក្រៅរដ្ឋាភិបាល សាលារៀន ក្រុមហ៊ុនអចលនទ្រព្យ ក្រុមហ៊ុនទឹកស្អាត រួមនឹងស្ថាប័នជាតិ និងអន្ដរជាតិមួយចំនួនទៀត ហើយលោកក៏ជាអតីតប្រធានសមាគមសហគ្រិនវ័យក្មេងកម្ពុជាពីឆ្នាំ ២០១៤ ដល់ឆ្នាំ២០១៧ ផងដែរ៕
© រក្សាសិទ្ធិដោយ thmeythmey.com
