ភ្ញៀវទេសចរជាតិទៅលេងខេត្តព្រះសីហនុ ថយជិត៤៣ភាគរយ នៅថ្ងៃចូលឆ្នាំចិន

ជាតិ

ភ្ញៀវទេសចរជាតិទៅលេងខេត្តព្រះសីហនុ ថយជិត៤៣ភាគរយ នៅថ្ងៃចូលឆ្នាំចិន

07, Feb 2019 , 11:10 am

រូបភាព

រូបភាពបានពី លោក តាំង សុចិត្រគ្រឹស្នា ប្រធានមន្ទីរទេសចរណ៍ ខេត្តព្រះសីហនុ

ដោយ: អ៊ូ សុខមាន (OU Sokmean)

ភ្នំពេញ៖ រយៈពេល៣ថ្ងៃ នៃបុណ្យចូលឆ្នាំប្រពៃណីចិន ភ្ញៀវទេសចរជាតិ ដែលបានទៅលេងកម្សាន្តនៅខេត្តព្រះសីហនុ មានចំនួនសរុប ៤៥ ៥០០នាក់ ដោយបានថយចុះ៤២,៤៤ភាគរយ បើធៀបនឹងរយៈពេលដូចគ្នា នៅឆ្នាំ២០១៨ ដែលមានភ្ញៀវជាតិ ៧៩ ០៥០នាក់។ នេះបើតាម លោក តាំង សុចិត្តគ្រឹស្នា ប្រធានមន្ទីរទេសរណ៍ខេត្តព្រះសីហនុ។

ផ្ទុយពីការធ្លាក់នៃភ្ញៀវទេសចរក្នុងស្រុក កំណើនភ្ញៀវទេសបរទេសពិសេសជនជាតិចិន បានកើនឡើងជិត៤០ភាគរយទៅវិញ ដែលក្នុងនោះមានចំនួន១២ ៥០០នាក់។ ថ្លែងប្រាប់សារព័ត៌មានថ្មីៗ លោក តាំង សុចិត្តគ្រឹស្នា បានបញ្ជាក់ថា ភ្ញៀវទេសចរជាតិ-អន្តរជាតិសរុប ដែលមកលេងខេត្តព្រះសីហនុ មានចំនួន៥,៨ម៉ឺននាក់ ដែលធា្លក់ចុះជិត៣៥ភាគរយ បើធៀបទៅនឹងឆ្នាំ២០១៨ ដែលមានចំនួន៨,៨ម៉ឺននាក់។

ក្នុងចំណោមភ្ញៀវទេសចរសរុបខាងលើ មានជាង ៩ពាន់នាក់ ដែលបានទៅកម្សាន្តនៅបណ្តាកោះនានាក្នុងខេត្តព្រះសីហនុ។ ចំណែកភ្ញៀវជិត៣,៧ម៉ឺននាក់ ទៅលេងរមណីយដ្ឋានក្បាលឆាយ, ភ្ញៀវទេសចរ ២ ៣៥០នាក់ ទៅរមណីយដ្ឋានថ្មរ៉ូង និង ទៅរមណីយដ្ឋានពិកនិក មាន៦៥០នាក់៕