ជាតិ
សេដ្ឋកិច្ច
×![]()
ដោយ: ភួង វ៉ាន់ថា
កម្ពុជា និងវៀតណាម បានឯកភាពមិនយកពន្ធលើការនាំទំនិញចេញ និងចូល រវាងប្រទេសទាំងពីរ។ ភាគីវៀតណាមក៏បានចុះកូតានាំចូលអង្ករចំនួន ៣០ម៉ឺនតោន និងសន្លឹកថ្នាំជក់ ៣,០០០តោនពីកម្ពុជា រយៈពេល២ឆ្នាំដែរ។ 
ក្រៅពីការឯកភាពគ្នានេះ ភាគីទាំងពីរគ្រោងចុះហត្ថលេខា ស្តីពីកិច្ចសម្របសម្រួលជំរុញពាណិជ្ជកម្មនៅតាមបន្ទាត់ព្រំដែន នៅក្នុងពេលឆាប់ៗខាងមុខ ។
«ភាគីវៀតណាម បានឯកភាពផ្តល់ភាពអនុគ្រោះពន្ធអត្រា ០% (សូន្យភាគរយ) សម្រាប់ទំនិញកម្ពុជាចំនួន ៣២បន្ទាត់ពន្ធគយ រួមជាមួយកូតានាំចូលអង្ករចំនួន ៣០ម៉ឺនតោន និងសន្លឹកថ្នាំជក់ ៣,០០០តោន នៅក្នុងឆ្នាំ ២០១៩ និងឆ្នាំ២០២០ ។ ភាគីកម្ពុជាបានផ្តល់ភាពអនុគ្រោះពន្ធអត្រា ០% (សូន្យភាគរយ) ដូចគ្នា ដល់ទំនិញវៀតណាមចំនួន ២៦បន្ទាត់ពន្ធគយ»។ នេះបើតាមហ្វេសប៊ុករបស់ក្រសួងពាណិជ្ជកម្មដែលបានស្រង់សម្តីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ដូ វឹកហឹង (Do Quoc Hung) ប្រតិភូក្រសួងឧស្សាហកម្ម និងពាណិជ្ជកម្មវៀតណាម កាលពីថ្ងៃទី ១៣ ខែកុម្ភៈ ឆ្នាំ២០១៩។
កន្លងមករដ្ឋាភិបាលវៀតណាម ក៏បានផ្តល់ជំនួយឥតសំណង សម្រាប់សាងសង់ផ្សារដានៅក្នុងខេត្តត្បូងឃ្មុំផងដែរ។ ក្រុមហ៊ុនវៀតណាមដែលកំពុងវិនិយោគក្នុងប្រទេសកម្ពុជា មានចំនួន ២០៦គម្រោង ក្នុងទំហំមទឹកប្រាក់ប្រមាណ ៣,២ប៊ីលានដុល្លារ ដូច្នេះវៀតណាមបានក្លាយជាដៃគូវិនិយោគធំទី៥ របស់កម្ពុជា។ ខណៈក្រុមហ៊ុនរបស់កម្ពុជា បានវិនិយោគត្រឹមតែ ១៨គម្រោង នៅក្នុងប្រទេសវៀតណាម ដែលតម្លៃជាទឹកប្រាក់ ៥៨,១លានដុល្លារប៉ុណ្ណោះ។
គួររម្លឹកថា ក្នុងឆ្នាំ២០១៧ ទំហំពាណិជ្ជកម្មរវាងកម្ពុជា និងវៀតណាម សម្រេចបានទឹកប្រាក់ ៣,៨ប៊ីលានដុល្លារ គឺបានកើនឡើង ២៩% ធៀបនឹងឆ្នាំ២០១៦៕
Tag:
ប៉ាន សូរស័ក្តិ
ពាណិជ្ជកម្ម
វៀតណាម
© រក្សាសិទ្ធិដោយ thmeythmey.com
