លោក ត្រាំ ថា លោក ម៉ាឌុយរ៉ូ បង្កើតកំហុសអាក្រក់ ព្រោះហ៊ានទប់ស្កាត់ជំនួយអាមេរិក

អន្តរជាតិ

លោក ត្រាំ ថា លោក ម៉ាឌុយរ៉ូ បង្កើតកំហុសអាក្រក់ ព្រោះហ៊ានទប់ស្កាត់ជំនួយអាមេរិក

15, Feb 2019 , 8:39 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី១៣ ខែកុម្ភៈ បានព្រមានប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ ដែលបិទព្រំដែនមិនទទួលយកជំនួយរបស់អាមេរិកសម្រាប់ប្រជាជនដែលកំពុងអត់ឃ្លាន។ ជាមួយនឹងការបង្ហាញអារម្មណ៍សោកសៅនឹងសា្ថនភាពកាន់តែយ៉ាប់យ៉ឺននៅវ៉េណេស៊ុយអេឡា លោក ត្រាំ ចាត់ទុកចំណាត់ការរបស់លោក ម៉ាឌុយរ៉ូ ជាកំហុសធំមួយ។ ប្រធានាធិបតីអាមេរិក៏គំរាមជាថ្មីថា អាមេរិកនៅតែអាចប្រើប្រាស់ជម្រើសទាំងអស់ដើម្បីដោះស្រាយបញ្ហា។

មកទល់ពេលនេះ ជំនួយរបស់អាមេរិកនៅទើរត្រឹមទឹកដីកូឡុំប៊ី បន្ទាប់ពីរដ្ឋាភិបាលប្រធានាធិបតី នីកូឡាស់ ម៉ាឌុយរ៉ូ បិទផ្លូវមិនទទួលជំនួយនេះ។ ចំណាត់ការរបស់រដ្ឋាភិបាលក្រុងការ៉ាកាស់ រងការរិះគន់ខ្លាំងព្រោះជំនួយទាំងនោះ មានគោលដៅសម្រាប់សង្គ្រោះប្រជាជនវ៉េណេស៊ុយអេឡាដែលមានជីវភាពកាន់តែអាក្រក់ដោយសារវិបត្តិក្នុងស្រុក។ ប្រធានាធិបតីអាមេរិក ដូណាល់ ត្រាំ បានទាមទារឲ្យលោក ម៉ាឌុយរ៉ូ បើកផ្លូវជាបន្ទាន់។

នៅដើមខែកុម្ភៈ លោក ម៉ាឌុយរ៉ូ បានបញ្ជាឲ្យបញ្ជាឲ្យក្រុមកងទ័ពវ៉េណេស៊ុយអេឡាបិទមិនឲ្យមានការនាំជំនួយមនុស្សធម៌ចូលទឹកដីរបស់ខ្លួនឡើយ។ ប្រធានាធិបតីរូបនេះចាត់ទុកថា ជំនួយអាមេរិក ជាការជ្រៀតជ្រែកកិច្ចការផ្ទៃក្នុង និងឈ្លានពានទឹកដីខ្លួន។ ទាហានវ៉េណេស៊ុយអេឡាប្រើប្រាស់រថយន្តធំៗ និងកុងទីន័រជាច្រើនដើម្បីបិទស្ពាន Tienditas ដែលភ្ជាប់ពីក្រុង Cucuta របស់កូឡុំប៊ី មកកាន់ក្រុង Urena វ៉េណេស៊ុយអេឡា។

លោកប្រធានាធិបតី ត្រាំ ចាត់ទុកសកម្មភាពរបស់លោក ម៉ាឌុយរ៉ូ ជាការបង្កើតកំហុសដ៏អាក្រក់ ព្រោះហ៊ានបិទផ្លូវដឹកជញ្ជូនជំនួយ។ ប្រាប់អ្នកសារព័ត៌មានអំឡុងជំនួបជាមួយសមភាគីកូឡុំប៊ី Ivan Duque លោក ត្រាំ និយាយថា អាមេរិកគ្រាន់តែចង់បញ្ជូនជំនួយទៅឲ្យប្រជាជនវ៉េណេស៊ុយអេឡាដែលកំពុងអត់ឃ្លាន។

មេដឹកនាំអាមេរិករូបនេះ ក៏បង្ហាញអារម្មណ៍លំបាកចិត្តចំពោះស្ថានការណ៍នៅវ៉េណេស៊ុយអេឡា ដែលវិបត្តិសង្គមដើរទៅរកស្ថានភាពកាន់តែអាក្រក់ ហើយអ្នកនយោបាយនៅតែមិនទាន់អាចរកដំណោះស្រាយបានដដែល។ ទោះជាយ៉ាងណាមិញ ជម្រើសយោធានៅតែស្ថិតក្នុងការពិចារណាដដែល។ បើតាមទីភ្នាក់ងារព័ត៌មាន AFP លោក ត្រាំ បញ្ជាក់ថា ចាំមើលទៅ! លោកឆ្លើយដូចនេះទៅនឹងសំណួរថា អាមេរិកនឹងពង្រាយកងទ័ពរាប់ពាន់នាក់ឬយ៉ាងណា។

ទទួល ឬមិនទទួលជាបញ្ហាធំសម្រាប់របបដឹកនាំលោក ម៉ាឌុយរ៉ូ ។ វិបត្តិសង្គម និងសេដ្ឋកិច្ចកំពុងកើតឡើងហើយប្រជាជនខ្វះស្បៀង និងថ្នាំសង្កូវដូចបច្ចុប្បន្នទៅទៀត ដែលនេះធ្វើឲ្យការទទួលជំនួយមនុស្សធម៌ជារឿងចាំបាច់។ ប៉ុន្តែវានឹងជួយដល់ប្រជាប្រិយភាពមេដឹកនាំប្រឆាំង ហ័ន ក្វៃដូ ដែលកំពុងរកវិធីទម្លាក់របបដឹកនាំលោក ម៉ាឌុយរ៉ូ ស្រាប់។ បើសិនហ៊ានបិទមិនឲ្យជំនួយមនុស្សធម៌ចូលវិញ ចលនាប្រជាជនតវ៉ានឹងកើនឡើងកាន់តែខ្លាំងឡើងៗតាមដងផ្លូវចៀសមិនរួច៕