ប្រធានាធិបតី ដូណាល់ ត្រាំ ប្រកាសភាពអាសន្នជាតិតាមការគ្រោងទុកនៅថ្ងៃសុក្រទី ១៥ ខែកុម្ភៈដើម្បីត្រួសត្រាយផ្លូវសម្រាប់ការសង់ជញ្ជាំងព្រំដែនម៉ិកស៊ិក។ ប៉ុន្តែសកម្មភាពរបស់លោកត្រូវបានគេចាត់ទុកជារឿងរំលោភអំណាចប៉ះពាល់ដល់តុល្យភាពនៃអំណាចនីតិប្រតិបត្តិ និងនីតិបញ្ញត្តិ និងត្រូវប្រឈមនឹងការតតាំងផ្លូវច្បាប់នៅតុលាការពីភាគីជាច្រើនផងដែរ។
អ្នកជំនាញច្បាប់ជាច្រើននាក់ចាប់ផ្តើមជជែកដេញដោយគ្នា និងឯកភាពគ្នាថា វាជារឿងមិនសាមញ្ញាឡើយដែលប្រធានាធិបតីប្រើប្រាស់អំណាចប្រកាសភាពអាសន្នដើម្បីជម្នះលើសភាដែលមិនព្រមអនុម័តកញ្ចប់ហិរញ្ញវត្ថុតាមការទាមទាររបស់ខ្លួន។ វាជាបញ្ហាដែលប៉ះពាល់ដល់តុល្យភាពអំណាចក្នុងប្រព័ន្ធដឹកនាំអាមេរិកដែរ។
លោក ត្រាំ ប្រើប្រាស់មាត្រាចែងក្នុងច្បាប់ស្តីពីភាពអាសន្នជាតិឆ្នាំ ១៩៧៦ ដើម្បីឆ្លើយតបនឹងសភាដែលមិនផ្តល់ថវិកា ៥,៧ ពាន់លានដុល្លារសម្រាប់សង់ជញ្ជាំងព្រំដែនការពារសន្តិសុខប្រឆាំងនឹងចលនាជនអន្តោប្រវេសន៍ខុសច្បាប់។ សេតវិមានបានអះអាងថា ក្រោមច្បាប់នេះ ខ្លួនមានអំណាចពេញលេញក្នុងការទាញយកថវិកា ៦,៦ពាន់លានដុល្លារពីប្រភពហិរញ្ញវត្ថុដទៃទៀតដែលមានជាពិសេសពីថវិកាផ្គត់ផ្គង់ក្រសួងការពារជាតិ។
យ៉ាងណាក៏ដោយ អ្នកជំនាញទាំងនេះក៏បានចោទជាសំណួរផងដែរថា តើការចាត់ទុកបញ្ហាជនអន្តោប្រវេសន៍ខុសច្បាប់ជារឿងអាសន្នជាតិ និងទាញយកកញ្ចប់ហិរញ្ញវត្ថុពីក្រសួងការពារជាតិមកប្រើប្រាស់នោះត្រឹមត្រូវតាមច្បាប់ឬក៏អត់ឡើយ។ ច្បាប់នេះត្រូវបានប្រើប្រាស់កន្លងមកដូចជាក្នុងស្ថានភាពអាសន្នធ្ងន់ធ្ងរមានការវាយប្រហារថ្ងៃ ១១ ខែកញ្ញា និងការផ្ទុះឡើងនៃជំងឺផ្តាសាយជ្រូកឆ្នាំ ២០០៩ដែរ។ ដូច្នេះ លោក ត្រាំ នឹងត្រូវប្រឈមការតតាំងនិងចោទប្រកាន់ច្រើនបន្ទាប់ពីប្រកាសភាពអាសន្នជាតិនេះ។
បើតាមការចុះផ្សាយរបស់ទីភ្នាក់ងារព័ត៌មាន AFP សាស្ត្រាចារ្យច្បាប់នៃសាកលវិទ្យាល័យអាមេរិក (American University) លោក Jennifer Daskal បានលើកឡើងថា ច្បាប់ស្តីពីភាពអាសន្នជាតិមិនដែលត្រូវបានគេប្រើប្រាស់ក្នុងស្ថានភាពដូចលោក ត្រាំ កំពុងធ្វើនេះឡើយ ដោយសារគេបារម្ភពីផលប៉ះពាល់ដែលអាចកើតឡើងនៅពេលខាងមុខនោះ។
គ្រាន់តែប៉ុន្មានម៉ោងប៉ុណ្ណោះក្រោយ លោក ដូណាល់ ត្រាំ ប្រកាសភាពអាសន្នជាតិ រដ្ឋបាលរបស់លោករងការស៊ើបអង្កេតពីគណៈកម្មាធិការយុត្តិធម៌សភា រួមទាំងរងបណ្ដឹងជាច្រើនពីរដ្ឋញូវយ៉ក, កាលីហ្វ័រនីញ៉ា និងសហភាពសិទ្ធិសេរីភាពស៊ីវិលអាមេរិកផង។
ជុំវិញការប្រកាសភាពអាសន្ននេះដែរ អភិបាលរដ្ឋកាលីហ្វ័រនីញ៉ាលោក Gavin Newsome បានទិតៀនលោក ត្រាំ ដូច្នេះ៖«ប្រធានាធិបតី ត្រាំ កំពុងបង្កើតវិបត្តិ និងកំពុងប្រកាសភាពអាសន្នជាតិដែលលោកបង្កើតឡើងដើម្បីក្តោបក្តាប់អំណាច និងបំផ្លិចបំផ្លាញរដ្ឋធម្មនុញ្ញ។ កាលីហ្វ័រនីញ៉ានឹងជួបអ្នកនៅឯតុលាការ»។
យ៉ាងណាក៏ដោយចុះ លោក ត្រាំ បានបង្ហាញសុទិដ្ឋិនិយមថា បណ្តឹងប្រឆាំងចំណាត់ការរបស់លោកនឹងមិនជោគជ័យទេនៅតុលាការកំពូល ហើយលោកនឹងនៅតែមានអំណាបន្តអនុវត្តគោលនយោបាយក្រោមច្បាប់ស្តីពីភាពអាសន្នជាតិដដែល។
ក្រៅពីតំណាងរដ្ឋ សមាជិកបក្សប្រជាធិបតេយ្យបានចោទប្រកាន់ថា លោក ត្រាំ កំពុងដណ្តើមអំណាច ផ្តាច់មុខរបស់សភាដោយបំពានរដ្ឋធម្មនុញ្ញ។ អ្នករិះគន់ខ្លះបានវាយតម្លៃផងដែរចំពោះអនាគតខាងមុខនៅពេលដែលអាមេរិកមានប្រធានាធិបតីមកពីបក្សប្រជាធិបតេយ្យវិញម្តង។ ប្រធានាធិបតីថ្មីក៏ប្រហែលជានឹងប្រកាសដាក់រដ្ឋក្នុងភាពអាសន្នដូចគ្នាដើម្បីដោះស្រាយបញ្ហាធំៗដូចជាការគ្រប់គ្រងអាវុធ និងដោះស្រាយបញ្ហាប្រែប្រួលអាកាសធាតុផងដែរ៕