អន្តរជាតិ
សិង្ហបុរីបង្កើនកញ្ចប់លុយការពារជាតិជិត ១៧ពាន់លានដុល្លារដើម្បីធានាសន្តិសុខជាតិ
× រដ្ឋាភិបាលសិង្ហបុរីកំណត់ថវិកាប្រមាណ ១៦,៧ ពាន់លានដុល្លារ ឬស្មើ៣០ភាគរយនៃកញ្ចប់ថវិកាជាតិសរុប សម្រាប់វិស័យសំខាន់ចំនួនបី រួមមាន ការពារជាតិ, សន្តិសុខ និងការទូតសម្រាប់ឆ្នាំ២០១៩។ រដ្ឋមន្ត្រីហិរញ្ញវត្ថុលោក ហេង ស្វីគៀត (Heng Swee Keat) ថ្លែងបែបនេះក្នុងសេចក្តីថ្លែងការណ៍ស្តីពីកញ្ចប់ថវិកាជាតិដើមសប្តាហ៍នេះ។
ក្នុងថវិកាសរុបប្រមាណ ១៦,៧ពាន់លានដុល្លារ សិង្ហបុរីគ្រោងចំណាយ១១,៤ពាន់លានដុល្លារលើវិស័យការពារជាតិ ខណៈការចំណាយលើសន្តិសុខមានទំហំ ៤,៩ពាន់លានដុល្លារ និងកិច្ចការបរទេសក្នុងទំហំទឹកប្រាក់ ៣៦៨លានដុល្លារ។ នេះបើតាមការចុះផ្សាយរបស់ទូរទស្សន៍សិង្ហបុរី Channel News Asia។
ថ្លែងនៅក្នុងសភាសិង្ហបុរី លោក ហេង ស្វីគៀត និយាយថា៖«ការចំណាយនេះ គឺពិតជាមានសារៈសំខាន់ ដោយមិនអាចខ្វះបានឡើយ។ យើងនឹងវិនិយោគបន្ថែមទៀត ប្រសិនបើចាំបាច់ដើម្បីការពារអធិបតេយ្យភាពរបស់សិង្ហបុរី និងសុខមាលភាពរបស់ប្រជាជនសិង្ហបុរី»។
ដើម្បីទប់ទល់នឹងកំណើននៃបរិយាកាសភូមិសាស្ត្រនយោបាយដែលមិនច្បាស់លាស់ សិង្ហបុរីចាំបាច់ត្រូវតែពង្រឹងវិស័យការពារជាតិនិងសន្តិសុខឲ្យខាងតែបាន។ នេះបើតាមការបញ្ជាក់របស់លោក ហេង ស្វីគៀត ដោយបន្ថែមទៀតថា ក្រសួងការបរទេសសិង្ហបុរីបន្តកសាងទំនាក់ទំនងល្អជាមួយប្រទេសជិតខាង និងមហាអំណាចពិភពលោក ព្រមទាំងលើកកម្ពស់សណ្តាប់ធ្នាប់អន្តរជាតិដោយផ្អែកលើច្បាប់ និងវិធានការអន្តរជាតិ។
ទន្ទឹមនឹងគ្នានេះដែរ កងកម្លាំងប្រដាប់អាវុធសិង្ហបុរីនៅជួយគាំទ្រលើកិច្ចប្រឹងប្រែងផ្នែកការទូតរបស់ប្រទេសជានិច្ច ក្នុងគោលដៅធានាឲ្យបានធានាថា ការចរចាណាមួយនឹងត្រូវធ្វើឡើងដោយច្បាស់លាស់បំផុត។ នេះជាការបញ្ជាក់បន្ថែមរបស់លោក ស្វីគៀត ដោយសង្កត់ធ្ងន់ថា ប្រសិនបើកិច្ចការទូតបរាជ័យនោះ សិង្ហបុរីត្រូវតែត្រៀមខ្លួនរួចរាល់សម្រាប់ការពារខ្លួនឯង និងផលប្រយោជន៍ជាតិ។
សូមបញ្ជាក់ថា ការលើកឡើងរបស់លោក ស្វីគៀត នេះ គឺធ្វើឡើងខណៈដែលសិង្ហបុរីនិងម៉ាឡេស៊ីកំពុងពិភាក្សាពីបញ្ហាទ្វេរភាគីមួយចំនួន រួមមាន ជម្លោះជុំវិញបញ្ហាព្រំដែនទឹក, ការគ្រប់គ្រងផ្លូវអាកាសនិងតម្លៃទឹកជាដើម៕
Tag:
សិង្ហបុរី
កញ្ចប់ថវិកាជាតិ
© រក្សាសិទ្ធិដោយ thmeythmey.com