ក្រសួងសុខាភិបាល កំពុងសិក្សាបង្កើតទីតាំងចាក់វ៉ាក់សាំងការពារជំងឺឆ្កែឆ្កួតបន្ថែមទៀត

ជាតិ

សុខភាព

ក្រសួងសុខាភិបាល កំពុងសិក្សាបង្កើតទីតាំងចាក់វ៉ាក់សាំងការពារជំងឺឆ្កែឆ្កួតបន្ថែមទៀត

26, Feb 2019 , 8:59 am

រូបភាព

ដោយ: ប៉ូ សាគុន

ភ្នំពេញ៖ ក្រសួងសុខាភិបាល កំពុងសិក្សាពីទីតាំងបង្កើតកន្លែងចាក់វ៉ាក់សាំងបង្ការជំងឺឆ្កែឆ្កួតនៅតាមបណ្ដាខេត្តផ្សេងៗបន្ថែមទៀត។ បច្ចុប្បន្នកន្លែងចាក់វ៉ាក់សាំងការពារជំងឺឆ្កែឆ្កួតរបស់រដ្ឋនិងសហការជាមួយឯកជន មានចំនួនបីកន្លែង គឺនៅវិទ្យាស្ថានប៉ាស្ទ័រ នៅវិទ្យាស្ថានជាតិសុខភាពសាធារណៈ របស់ក្រសួងសុខាភិបាល និងនៅខេត្តបាត់ដំបង ដែលសហការជាមួយវិទ្យាស្ថានប៉ាស្ទ័រ។

អ្នកនាំពាក្យក្រសួងសុខាភិបាលលោក លី សូវ៉ាន់ បាននិយាយ ក្រសួងកំពុងពិនិត្យលទ្ធភាពរៀបចំកន្លែងចាក់វ៉ាក់សាំងការពារជំងឺឆ្កែឆ្កួត ឲ្យកាន់តែទូលំទូលាយទៀត សម្រាប់ផ្ដល់សេវាដល់ប្រជាពលរដ្ឋ។

ថ្លែងប្រាប់សារព័ត៌មានថ្មីៗ លោក លី សូវ៉ាន់ បញ្ជាក់យ៉ាងដូច្នេះ៖ ក្រសួងកំពុងសិក្សាទីតាំងមួយចំនួនដែលអាចមានអ្នកចិញ្ចឹមសត្វច្រើន ឬកន្លែងដែលប្រឈមនឹងជំងឺនេះច្រើន ឬក៏ជាកន្លែងដែលអាចងាយស្រួលដល់ការទៅទទួលសេវាកម្ម។ យើងមិនទាន់អាចបញ្ជាក់ពីទីតាំងបានទេនៅពេលនេះ ព្រោះយើងកំពុងតែសិក្សាពីទីតាំង»។

បច្ចុប្បន្នកន្លែងចាក់វ៉ាក់សាំងការពារជំងឺឆ្កែឆ្កួតមាន៣ទីតាំង គឺនៅរាជធានីភ្នំពេញ២កន្លែង និងនៅខេត្តបាត់ដំបង១កន្លែង។ ចំណែកនៅខេត្តកំពង់ចាម នឹងពង្រីកមណ្ឌលចាក់ថ្នាំបង្ការជំងឺឆ្កែឆ្កួតមួយកន្លែងទៀត ដោយសហការជាមួយវិទ្យាស្ថានប៉ាស្ទ័រក្នុងពេលឆាប់ៗនេះ។ រីឯបណ្ដាខេត្តផ្សេងៗទៀត នឹងដាក់ចេញនៅពេលក្រោយ។ នេះបើតាមអ្នកនាំពាក្យក្រសួងសុខាភិបាល។

នៅក្នុងទិវាប្រារព្វទីក្រុងស្អាត លើកទី៧ នៅព្រឹកថ្ងៃទី២៥ កុម្ភៈ សម្ដេចនាយករដ្ឋមន្ត្រី ហ៊ុន សែន ក៏បានស្នើឲ្យក្រសួងសុខាភិបាល ពង្រាយថ្នាំវ៉ាក់សាំងនៅតាមមន្ទីរពេទ្យនៅរាជធានី ខេត្ត ឬតាមគ្លីនិកឯកជនដើម្បីទុកសម្រាប់ផ្តល់សេវាវ៉ាក់សាំង ដល់ប្រជាពលរដ្ឋទាន់ពេលវេលា។

ទាក់ទងនឹងបញ្ហានេះ ពលរដ្ឋខ្មែរជាច្រើននាក់ បានទៅសុំសេវាចាក់វ៉ាក់សាំងការពារជំងឺឆ្កែឆ្កួតនៅវិទ្យាស្ថានប៉ាស្ទ័រកម្ពុជា បន្ទាប់ពីមានករណីស្លាប់កុមារីម្នាក់។ តែយ៉ាងណាសម្តេចនាយករដ្ឋមន្ត្រី ហ៊ុន សែន បានស្នើសុំទៅពលរដ្ឋទាំងអស់កុំឲ្យមានការតក់ស្លុត ជាពិសេសអ្នកដែលមិនត្រូវបានឆ្កែ ឬសត្វផ្សេងខាំ។ សម្រាប់សម្ដេច ហ៊ុន សែន ការតក់ស្លុតរបស់ពលរដ្ឋជុំវិញជំងឺឆ្កែឆ្កួតនេះ គឺជាការព្រួយបារម្ភជ្រុល ដែលនាំឲ្យចលាចល និងប៉ះពាល់ដល់វិស័យសុខាភិបាលទៀតផង៕