ទីផ្សារអចលនទ្រព្យកំពុងតែរីកចម្រើនខ្លាំង និងមានការចាប់អាម្មណ៍ខ្លាំងពីសំណាក់ប្រជាជនក្នុងស្រុក និងវិនិយោគិនពីក្រៅស្រុក។ វិស័យអចលនទ្រព្យ ក៏បានទាក់ទាញវិនិយោគិនថ្មីៗជាច្រើន ឲ្យប្រឡូកចូលក្នុងវិស័យនេះដែរ ហើយចំណោមនេះ មានអ្នកខ្លះក៏ជោគជ័យ ហើយខ្លះទៀត ក៏បរាជ័យ ក្នុងរយៈពេលដ៏ខ្លី។
បរាជ័យត្រូវបានចាត់ទុកជាបទពិសោធន៍។ ចំណែកជោគជ័យ ក្នុងវិស័យអចលនទ្រព្យ បានក្លាយជាប្រធានបទមួយគួរឲ្យចាប់អាម្មណ៍បំផុត។ ប៉ុន្តែសួរថា តើភាពជោគជ័យកើតឡើងដោយសារកត្តាអ្វីខ្លះ?
វាមានកត្តាច្រើនជុំវិញសំណួរនេះ ហើយខាងក្រោមនេះ ជាគំនិតគួរពិចារណា៥យ៉ាង ដែលវិនិយោគិនថ្មីៗ ត្រូវតែស្វែងយល់ មុននឹងឈានជើងចូលក្នុងវិស័យមួយនេះ។
១. ចក្ខុវិស័យ
អ្នកត្រូវតែមាន «ចក្ខុវិស័យ» ច្បាស់លាស់ សម្រាប់អនាគតនៃគម្រោងវិនិយោគរបស់អ្នក។ នៅពេលមានចក្ខុវិស័យត្រឹមត្រូវ អ្នកនឹងដើរទៅតាមផែនការអនាគតដ៏វែងឆ្ងាយ។ មានចក្ខុវិស័យទើបធ្វើឲ្យអ្នកដើរទៅមុខដោយមិនវង្វេងផ្លូវ ហើយនេះក៏ជាអ្វីដែលអាចដឹកនាំក្រុមការងារទាំងអស់ ឲ្យគិត និងចូលរួមកិច្ចការក្នុងទិសដៅតែមួយ។
២. ភាពស្របច្បាប់
គ្មានគម្រោងជោគជ័យណាមួយ ដែលអាចជ្រកក្រោមស្លាកនៃគម្រោងក្រៅផ្លូវច្បាប់បានឡើយ។ នៅពេលអ្នកចាប់ផ្តើមវិនិយោគ អ្នកត្រូវតែដាក់ស្នើរាល់តម្រូវការផ្លូវការផ្នែកច្បាប់ ឲ្យបានត្រឹមត្រូវ។ ត្រូវចងចាំថាចំណុចខ្លាំងមួយរបស់គម្រោងអចលនទ្រព្យ គឺការគាំទ្រដោយច្បាប់។
៣. ភាពចន្លោះប្រហោងនៃច្បាប់
ច្បាប់គឺជាព្រំដែនដែលតម្រង់ទិស និងប្រាប់ថាអ្វីដែលអ្នកអាចធ្វើបាន និងអ្វីមិនអាចធ្វើបានដែលនេះមានន័យថា អ្នកអាចធ្វើអ្វីក៏បានឲ្យតែស្ថិតក្នុងក្របខណ្ឌនៃច្បាប់។ ប៉ុន្តែភាពចន្លោះនៃច្បាប់ គឺជាឱកាសដ៏ល្អឥតខ្ចោះ ដែលអ្នកវិនិយោគត្រូវតែរកឲ្យឃើញ នៅពេលប្រឡូកនៅក្នុងវិស័យអចលនទ្រព្យ។
តាមជាក់ស្តែង ជាទូទៅច្បាប់ក្នុងការគ្រប់គ្រងវិស័យអចលទ្រព្យកម្ពុជា នៅមានភាពធូរលុងនៅឡើយ។ គេមើលឃើញថាច្បាប់មួយចំនួន ត្រូវបង្កើតឡើងថ្មីៗ ដើម្បីគ្រប់គ្រងលើការអភិវឌ្ឍដីធ្លី គ្រប់គ្រងភ្នាក់ងារ ឬការសាងសង់ជាដើម ដែលកំពុងកើនឡើងដ៏ឆាប់រហ័សក្នុងពេលបច្ចុប្បន្ន។ ទោះយ៉ាងណា គេមើលឃើញថាដើម្បីធានាដល់និរន្តរភាពរយៈពេលវែង នៃវិស័យទាំងមូលកម្ពុជា ត្រូវការបទបញ្ញត្តិជាច្រើនទៀត។
៤. ដឹងពីទំនោរនៃទីផ្សារ
ទំនោរនៃទីផ្សារមានឥទ្ធិពលខ្លាំង លើការទិញលក់អចលនទ្រព្យ។ កាលពីមុនគេមិនឃើញមានគម្រោងលំនៅដ្ឋានតម្លៃទាប នៅតាមជាយក្រុងនោះទេ ហើយគម្រោងដីឡូតិ៍ ក៏មិនមានអ្នកចាប់អាម្មណ៍ដែរ។ ប៉ុន្តែបច្ចុប្បន្នមនុស្សមនុស្សភាគច្រើន ចាប់អាម្មណ៍ផ្ទះ ឬដីតាមជាយក្រុងនោះ ជាមូលហេតុដែលគម្រោងតម្លៃសមសម្យជាច្រើន រីកដុះដាលនៅតាមតំបន់ជាយក្រុង។
ការវិភាគការតាមដាន និងសិក្សាស្វែងយល់ ពីរបត់នៃទីផ្សារអចលនទ្រព្យពេលកន្លងមក និងបច្ចុប្បន្នបានល្អិតល្អន់ អាចជួយឲ្យអ្នកទទួលបានភាពជោគជ័យក្នុងអាជីវកម្ម។ បន្ថែមលើសពីនេះទៀត អ្នកក៏ត្រូវអាចរកឃើញពីទំនោររបស់អ្នកទិញ នៅក្នុងរយៈ ២ឆ្នាំ ៥ឆ្នាំ ឬ ១០ឆ្នាំទៅមុខ ប្រសិនបើចង់ឈរជើងដោយភាពរឹងមាំក្នុងទីផ្សារមួយនេះ។
៥. ចេះបង្កើតឱកាសវិនិយោគ
វិនិយោគត្រូវពឹងផ្នែកលើកត្តាគាំទ្រពីខាងក្រៅដូចជា៖ ហេដ្ឋារចនាសម្ព័ន្ធ និងផ្នែកច្បាប់ជាដើម។ ប៉ុន្តែសូមចង់ចាំថា អ្នកវិនិយោគត្រូវតែចេះបង្កើតឱកាសដោយខ្លួនឯង និងផ្តល់ឱកាសនេះឲ្យអ្នកដទៃជួយបង្ករបង្កើតសកម្មភាពសេដ្ឋកិច្ចនានា នៅក្នុងតំបន់នៃគម្រោងរបស់អ្នក។
នេះមានន័យថា អ្នកត្រូវវិនិយោគនៅកន្លែងថ្មី ដែលមិនទាន់មានគម្រោងផ្សេង ហើយដើរតួជាអ្នកស្រូបយកទាំងមនុស្ស និងគម្រោងផ្សេងៗឲ្យចូលទៅតំបន់នោះ។ អភិវឌ្ឍគម្រោងវិនិយោគបែបនេះ អ្នកអាចបង្កើតកេរ្តិ៍ឈ្មោះបានយ៉ាងឆាប់រហ័ស។ អ្នកជំនាញជាច្រើនបានអះអាងថា តំបន់ជាយក្រុងក្នុងរង្វង់៣០គីឡូម៉ែត្រ ពីតំបន់កណ្តាលក្រុង មានសក្តានុពលបំផុតនៅពេលអនាគត។ ជាការពិតណាស់ គម្រោងបែបនេះ ត្រូវតែត្រូវការដើមទុនធំ ដើម្បីវិនិយោគ។ តែទោះយ៉ាងណា អ្នកអាចធ្វើក្នុងកម្រិតណាមួយ តាមលទ្ធភាពជាក់ស្តែងរបស់អ្នក។
៦. ដើមទុន
រាល់ការវិនិយោគត្រូវតែមានដើមទុន។ ដើមទុនច្រើនវិនិយោបានកាន់តែធំ ហើយអាចទទួលបានទំនុកចិត្តពីអ្នកទិញបានកាន់តែខ្លាំង។ សម្រាប់ពេលបច្ចុប្បន្ន មានវិយោគិនមួយចំនួនបានវិនិយោគដោយប្រើប្រាស់ដើមទុនតិចតួច ដោយរំពឹងលើការលក់មុនគម្រោង(ធ្វើនំអត់ម្សៅ)។ ពាក់ព័ន្ធនឹងចំណុចនេះ ទាំងអ្នកជំនាញ រដ្ឋាភិបាល និងភាគីធនាគារ បានព្រមានពីហានិភ័យខ្ពស់ ដោយសារតែគម្រោងនឹងជាប់គាំង នៅពេលគម្រោងមិនមានទុនបង្វិលគ្រប់គ្រាន់ ដើម្បីដំណើរការសាងសង់ឲ្យចប់ទាំងស្រុង។
សរុបទៅការវិនិយោគនៅក្នុងវិស័យអចលនទ្រព្យ គឺពិតជាត្រូវទាមទារឲ្យវិនិយោគិនខ្លួនឯង ថ្លឹងថ្លែងឲ្យបានគ្រប់ជ្រុងជ្រោយ។ សម្រាប់វិនិយោគថ្មីថ្មោង អ្នកពិតជាមិនអាចធ្វើសម្រេចចិត្តដោយខ្វះការប្រឹក្សាយោបល់ពីអ្នកជំនាញបានទេ៕
(អត្ថបទពាណិជ្ជកម្ម)