កីឡាការិនីប៉េតង់ជម្រើសជាតិ ស្រ៊ាង សុរ៉ាឃីម បានចូលប្រឡូកក្នុងវិស័យកីឡាប៉េតង់នៅឆ្នាំ២០១៤។ តាមរយៈស្នាដៃ និងសាងកេរ្តិ៍ឈ្មោះជូនជាតិនៅលើឆាកអន្តរជាតិក្នុងវិស័យនេះ បានជួយឲ្យកូនច្បងក្នុងគ្រួសារមានបងប្អូនពីរនាក់មកពីខេត្តតាកែវរូបនេះ ទទួលបានអាហារូបករណ៍១០០ភាគរយនៅសាកលវិទ្យាល័យ និងធ្វើការងារក្នុងក្របខណ្ឌក្រសួងការពារជាតិ។ កីឡាការិនីវ័យ២០ឆ្នាំដែលយកកីឡាការិនី កែ ឡេង និង អ៊ុក ស្រីមុំ ជាគំរូរូបនេះប្តេជ្ញាថា នាងនឹងខិតខំប្រឹងប្រែងហ្វឹកហាត់អភិវឌ្ឍន៍សមត្ថភាពឲ្យកាន់តែប្រសើរ ដើម្បីត្រៀមសាងកេរ្តិ៍ឈ្មោះជូនជាតិក្នុងការប្រកួតអន្តរជាតិនានា ពិសេសស៊ីហ្គេមនៅកម្ពុជាឆ្នាំ២០២៣។
ក្រោយប្រឡូកក្នុងវិស័យកីឡាប៉េតង់អស់រយៈពេលប្រមាណ៥ឆ្នាំពោលគឺចាប់ពីឆ្នាំ២០១៤ កីឡាការិនីប៉េតង់ជម្រើសជាតិ ស្រ៊ាង សុរ៉ាឃីម បានសាងស្នាដៃជាច្រើនទាំងលើឆាកជាតិនិងអន្តរជាតិ។ តាមរយៈសមិទ្ធផល និងស្នាដៃដ៏ត្រចះត្រចង់ទាំងនេះបានជួយឲ្យ សុរ៉ាឃីម មានកេរ្តិ៍ឈ្មោះល្បីល្បាញ និងលើកកិត្តិយសទាំងក្នុងគ្រួសារនិងសង្គម ពិសេសទទួលបានអាហារូបករណ៍១០០ភាគរយនៅសាកលវិទ្យាល័យ និងការងារជាមន្ត្រីរាជការក្នុងក្របខណ្ឌក្រសួងការពារជាតិ។
«តាំងពីប្រឡូកជាមួយកីឡាប៉េតង់ វាជួយឲ្យខ្ញុំមានកេរ្តិ៍ឈ្មោះល្បីទាំងក្នុងគ្រួសារ និងសង្គម និងមានថវិកាគ្រប់គ្រាន់។ តាមរយៈកីឡានេះដែរ សម្តេច ហ៊ុន សែន បានជួយឲ្យខ្ញុំទទួលបានអាហារូបករណ៍១០០ភាគរយរៀននៅសាកលវិទ្យាល័យអាស៊ីអឺរ៉ុប និងសាលាប៊ែលធី។ លើសពីនេះ ខ្ញុំបានចូលធ្វើការងារនៅអង្គភាពបញ្ជាការដ្ឋានកងអង្គរក្សរបស់សម្តេចនៃក្របខណ្ឌក្រសួងការពារជាតិទៀតផង»។ នេះជាការបញ្ជាក់របស់កីឡាការិនី ស្រ៊ាង សុរ៉ាឃីម។
អនុសេនីយ៍រូបនេះបានបន្ថែមថា អាហារូបករណ៍១០០ភាគរយទាំងនេះទទួលបាន ក្រោយនាងចាប់ដៃជាមួយកីឡាករ ញ៉ែម បូរ៉ាដណ្តើមបានមេដាយប្រាក់មួយ នាការប្រកួតជើងឯកពិភពលោកនៅប្រទេសបែលហ្ស៊ិក កាលពីអំឡុងខែមេសាឆ្នាំ២០១៧ ដែលកាលណោះវីរៈកីឡាការិនី អ៊ុក ស្រីមុំ ឈ្នះមេដាយមាស។ ចំណែកការងារជាមន្ត្រីទាហានក្នុងក្រសួងការពារជាតិ បន្ទាប់ពី នាង ដណ្តើមបានមេដាយសំរឹទ្ធក្នុងការប្រកួតជើងឯកពិភពលោកនៅចិនក្នុងឆ្នាំ២០១៧។
បន្ថែមលើមេដាយធំៗខាងលើ និស្សិតឆ្នាំទី២លើមុខជំនាញគ្រប់គ្រងរូបនេះ ដណ្តើមបានមេដាយលើឆាកអន្តរជាតិជាច្រើនផ្សេងទៀតក្នុងនោះដណ្តើមបានមេដាយប្រាក់១ និងសំរឹទ្ធ៣ នាការប្រកួតជើងឯកអាស៊ីអាគ្នេយ៍នៅឆ្នាំ២០១៥ ដែលកម្ពុជាធ្វើជាម្ចាស់ផ្ទះ។ នាការប្រកួតជើងឯកអាស៊ីអាគ្នេយ៍ដែលឡាវធ្វើជាម្ចាស់ផ្ទះនៅឆ្នាំ២០១៦ សុរ៉ាឃីម ដណ្តើមបានមេដាយមាសលើវិញ្ញាសា១នាក់ទល់១នាក់ មុននាងឈ្នះមេដាយមាសក្នុងព្រឹត្តិការណ៍ Asia Beach Games នៅវៀតណាមក្នុងឆ្នាំដដែល។ កីឡាការិនីរូបនេះទទួលបានមេដាយសំរឹទ្ធ២ក្នុងព្រឹត្តិការណ៍ជើងឯកអាស៊ីនៅមីយ៉ាន់ម៉ា និងម៉ាឡេស៊ីក្នុងឆ្នាំ២០១៧។ កាលពីចុងឆ្នាំ២០១៨ នាងដណ្តើមបានមេដាយមាស១ និងប្រាក់២ ពីការប្រកួតជើងឯកនិស្សិតអាស៊ាន ដែលរៀបចំនៅមីយ៉ាន់ម៉ា។
ការក្លាយជាកីឡាការិនីប៉េតង់ឆ្នើមមួយរូបនៅកម្ពុជា វាជាក្តីស្រមៃតែមួយគត់របស់កីឡាការិនី ស្រ៊ាង សុរ៉ាឃីម ទៅថ្ងៃអនាគតក្នុងអំឡុងពេលនាងនៅជាកីឡាករ។ ទោះបីបញ្ជីប្រមូលផ្តុំហ្វឹកហាត់ជម្រើសជាតិមិនទាន់បង្ហាញ តែ សុរ៉ាឃីម នៅតែបន្តហ្វឹកហាត់ពង្រឹងសមត្ថភាពជាមួយគ្រូបង្វឹកនិងកីឡាករកីឡាការិនីដទៃទៀតនៅពហុកីឡដ្ឋានជាតិ ជាមួយគោលដៅច្បាស់លាស់។
កីឡាការិនីរាងស្តើងសម្បុរសរូបនេះបានបង្ហាញមហិច្ឆតាថា នាងចង់ក្លាយជាកីឡាករមានកេរ្តិ៍ឈ្មោះល្បីល្បាញលើឆាកអន្តរជាតិ និងសមត្ថភាពខ្លាំងដូចរៀបច្បង គឺកីឡាការិនី កែ ឡេង និង អ៊ុក ស្រីមុំ ដែលសុទ្ធសឹងជាម្ចាស់មេដាយមាសពិភពលោក។ កត្តានេះហើយដែលជំរុញឲ្យ សុរ៉ាឃីម យកម្ចាស់មេដាយមាសទាំងពីររូបនេះ ធ្វើជាគំរូក្នុងការហ្វឹកហាត់ជាមួយការដាក់គោលដៅឲ្យមានសមត្ថភាពប្រហាក់ប្រហែល ឬស្មើកីឡាការិនីទាំងពីរ។ ព្រោះនាងចង់ស្នងតំណែងកីឡាការិនី ក្នុងការប្រកួតអន្តរជាតិនានានៅលើឆាកអន្តរជាតិ។
«សម្រាប់ខ្ញុំ គឺចង់ក្លាយជាកីឡាការិនីដ៏ឆ្នើមមួយរូបសម្រាប់ប្រទេស។ បើអាចខ្ញុំនឹងខិតខំហាត់ឲ្យខ្លាំងដូចរៀមច្បងដូចជាកីឡាការិនី កែ ឡេង និងកីឡាការិនី អ៊ុក ស្រីមុំ ដែលខ្ញុំយកគាត់ធ្វើជាគំរូ។ ខ្ញុំដាក់គោលដៅក្នុងការហ្វឹកហាត់ថា បើមិនបានស្មើពួកគាត់ ក៏ប្រហាក់ប្រហែលដែរ»។ នេះជាការអះអាងរបស់កីឡាការិនី ស្រ៊ាង សុរ៉ាឃីម។
ក្រៅពីប្តេជ្ញាខិតខំហ្វឹកហាត់សម្រួចឆ្ពោះទៅប្រជែងដណ្តើមមេដាយជូនជាតិនៅកីឡាស៊ីហ្គេមឆ្នាំ២០២៣ ចំពោះមុខម្ចាស់មេដាយប្រាក់ពិភពលោករូបនេះ ត្រូវជួយកម្ពុជាដណ្តើមមេដាយពិភពលោក ដែលកម្ពុជានឹងធ្វើជាម្ចាស់ផ្ទះក្នុងអំឡុងខែវិច្ឆិកា ឆ្នាំ២០១៩ ខាងមុខនេះ។ ដើម្បីត្រៀមធ្វើម្ចាស់ផ្ទះការប្រកួតនេះ សហព័ន្ធកីឡាប៊ូលនិងប៉េតង់កម្ពុជាកាលពីថ្ងៃទី២ ខែមីនា ឆ្នាំ២០១៩ បានរៀបចំវគ្គបណ្តុះបណ្តាលគ្រូបង្វឹកកម្រិតបឋមវគ្គ២ និងវគ្គបណ្តុះបណ្តាលបច្ចេកទេសអាជ្ញាកណ្តាលចៅក្រម។ សុរ៉ាឃីម ក៏ជាសមាជិកមួយរូបក្នុងចំណោមសិក្ខាកាមនៃវគ្គបណ្តុះបណ្តាលនេះផងដែរ។
ជាមួយការលើកឡើងថា ការហ្វឹកហាត់កីឡាអាចធ្វើឲ្យប៉ះពាល់ដល់ការសិក្សា កីឡាការិនីវ័យ២០ឆ្នាំរូបនេះប្តេជ្ញាបោះបង់ជំនាញណាមួយនោះទេ ពោលគឺនឹងបន្តទាំងពីរព្រមគ្នាតែម្តង។ ទោះបីកីឡាប៉េតង់បានជួយឲ្យមានអ្វីៗគ្រប់យ៉ាងដូចសព្វថ្ងៃ តែនាងនៅមិនទាន់ច្បាស់ពីអាជីពនៅថ្ងៃអនាគតនៅឡើយទេ ថាតើត្រូវបន្តដើរលើវិថីនេះទៀតឬយ៉ាងណា?
នៅពេលសួរអាជីពទៅថ្ងៃអនាគតរវាងកីឡានិងការសិក្សា សុរ៉ាឃីម បានបញ្ជាក់យ៉ាងដូច្នេះថា៖«សម្រាប់ខ្ញុំឥឡូវមានការលំបាកខ្លះដែរ ព្រោះពេលយើងហ្វឹកហាត់និងចេញទៅប្រកួតនៅលើឆាកអន្តរជាតិម្តងៗយើងត្រូវផ្អាកការសិក្សានៅសាលាយ៉ាងតិចមួយអាទិត្យ។ ទោះបីមានការផ្អៀងម្ខាងយ៉ាងនេះក្តី ខ្ញុំប្តេជ្ញាថា នឹងខិតខំបន្តទៅមុខទាំងការសិក្សានិងកីឡា។ តែបើទៅអនាគតខ្ញុំនឹងចាប់យកការងារចេញពីការសិក្សា ព្រោះកីឡាយើងអាចលេងពេលយើងមានកម្លាំង និងសុខភាពមាំមួន តែដល់សុខភាពយើងខ្សោយ យើងមិនអាចលេងបាននោះទេ»។
ស្រ៊ាង សុរ៉ាឃីម ដែលបច្ចុប្បន្នស្នាក់នៅផ្ទះជួលមួយកន្លែងនៅរាជធានីភ្នំពេញ ជាកូនច្បងក្នុងចំណោមបងប្អូនពីរនាក់នៃគ្រួសារមានជីវភាពធូរធារមួយនៅក្នុងស្រុកអង្គរបូរី ខេត្តតាកែវ។ នាង បានចូលប្រឡូកក្នុងវិស័យកីឡាប៉េតង់តាំងពីរៀននៅសាលាបឋមសិក្សាមកម្ល៉េះ។ ប៉ុន្តែនាងត្រូវបានសហព័ន្ធកីឡាប៊ូល និងប៉េតង់កម្ពុជាជ្រើសរើសឲ្យធ្វើជាកីឡាការិនីថ្នាលនៅឆ្នាំ២០១៤ ក្រោយនាងដណ្តើមបានមេដាយសំរឹទ្ធក្នុងការប្រកួតជើងឯកថ្នាក់ជាតិ ដែលរៀបចំដោយសហព័ន្ធ នៅពហុកីឡដ្ឋានជាតិ។
មុនមកចូលរួមជាមួយសហព័ន្ធប៊ូល និងប៉េតង់កម្ពុជា សុរ៉ាឃីម ជាកីឡាការិនីឆ្នើមមួយរូបប្រចាំវិទ្យាល័យអង្គរបូរី ខេត្តតាកែវ។ នាង ធ្លាប់ទទួលបានរង្វាន់លើកទឹកចិត្តម៉ូតូមួយគ្រឿង ក្រោយ នាងដណ្តើមបានមេដាយមាសក្នុងការប្រកួតដណ្តើមជើងឯកពានរង្វាន់ឧបនាយករដ្ឋមន្ត្រី សុខ អាន ដែលជាការប្រកួតជម្រើសថ្នាក់ខេត្ត។ រង្វាន់លើកទឹកចិត្តនេះហើយ ដែលជំរុញឲ្យ សុរ៉ាឃីម មានទឹកចិត្តខិតខំហ្វឹកហាត់ និងស្រលាញ់កីឡានេះកាន់តែខ្លាំង៕