លទ្ធផលនៃការចាប់ឆ្នោតពានរង្វាន់ Champions League វគ្គ១/៤ផ្តាច់ព្រ័ត្រ បានបង្ហាញឲ្យឃើញថា យ៉ាងណាស់ក្រុមមួយរបស់អង់គ្លេសនឹងឈានទៅដល់វគ្គបន្ត។ Tottenham Hotspur ត្រូវប៉ះជាមួយ Manchester City ខណៈ Manchester United ត្រូវតទល់ជាមួយ Barcelona។ ជាមួយគ្នានេះ Liverpool ត្រូវបានគេគិតថាសំណាងដោយត្រូវប៉ះ Porto រីឯ Ajax ត្រូវបានគេយល់ថា មិនអាចរំលងផុត Juventus បាននោះឡើយ។
តាមស្ថិតដែលស្ទង់មតិដោយ BBC សេះបង្កង់ Juventus មានឱកាសដល់ទៅ៨៥ភាគរយក្នុងការទម្លាក់ Ajax ខណៈ Barcelona មាន៧៨ភាគរយដើម្បីធ្វើឲ្យ Manchester United ហាលអាវ។ សម្រាប់ជំនួបរវាងក្រុមអង់គ្លេសទាំងពីរ អ្នកវិភាគថា Manchester City មានប្រៀបជាង Tottenham Hotspur រីឯ Liverpool មានអត្រាខ្ពស់ជាង FC Porto ៦៨ភាគរយ។
សម្រាប់ឱកាសដែលឈ្នះជើងឯក ក្រុមអ្នកវិភាគគិតថា Barcelona មាន៣៨ភាគរយ Juventus មាន២៤ភាគរយ Manchester City មាន១៩ភាគរយ និង Liverpool មាន១០ភាគរយ។ ជាមួយគ្នានេះ គេគិតជារួមថា ឱកាសដែលក្រុមពីអង់គ្លេសឈ្នះជើងឯក មាន៣៥ភាគរយ។
Ajax ជួប Juventus៖
Ajax ជាក្រុមហូឡង់ដំបូងដែលឈានដល់វគ្គ១/៤ផ្តាច់ព្រ័ត្រ Champions League បើគិតចាប់តាំងពីវត្តមានរបស់ PSV Eindhoven នៅឆ្នាំ២០០៦-០៧។ ពួកគេបានទម្លាក់ជើងឯកបីសម័យកាលជាប់គ្នា Real Madrid ក្នុងលទ្ធផលសរុប ៤-១។
សម្រាប់ Juventus ខ្សែប្រយុទ្ធ Cristiano Ronaldo បានស៊ុតបាល់បញ្ចូលទីតែម្នាក់ឯងចំនួន៣គ្រាប់ ដើម្បីនាំក្រុមមកដល់វគ្គ១/៤ផ្តាច់ព្រ័ត្រ ដោយកាលពីជើងទីមួយ Atletico Madrid មានប្រៀបក្នុងលទ្ធផល ២-០ ។
ជំនួបតទល់១២លើកកន្លងមក Juventus ឈ្នះ៦លើក Ajax ឈ្នះ២លើក និងស្មើគ្នា៤លើក។
Liverpool ជួប Porto
Liverpool ដែលបានចាញ់ Real Madrid នៅវគ្គផ្តាច់ព្រ័ត្រកាលពីឆ្នាំមុន បានទម្លាក់ជើងខ្លាំងអាល្លឺម៉ង់ Bayern Munich ខណៈដែលជើងឯកព័រទុយហ្គាល់ FC Porto ទម្លាក់ Roma របស់អ៊ីតាលី។
Porto បានចាញ់ក្រុមពីអង់គ្លេសរហូតដល់ទៅ៥លើក បើគិតចាប់តាំងពីលោក Jose Mourinho ដឹកនាំក្រុមយកឈ្នះ Manchester United ក្នុងដំណើរទៅលើកពាន កាលពីរដូវកាល ២០០៣-០៤ ។
នាជំនួប៦លើករវាងក្រុមទាំងពីរ Liverpool ឈ្នះបីលើក និងស្មើគ្នា៣លើក។
Tottenham ជួប Manchester City
Tottenham Hotspur ឈានដល់វគ្គ១/៤ផ្តាច់ព្រ័ត្រលើកដំបូង បើគិតចាប់តាំងពីឆ្នាំ២០១១មក ក្រោយជ័យជម្នះសរុប ៤-០ លើ Borussia Dortmund ខណៈ Manchester City ឈ្នះ ៧-០ នៅក្នុងដី លើ Schalke ដោយបង្កើតលទ្ធផលសរុប ១០-២ ។
Manchester City មិនមានប្រវត្តិល្អឡើយ ក្នុងជំនួបតទល់ជាមួយក្រុមអង់គ្លេសដូចគ្នាក្នុងព្រឹត្តិការណ៍អឺរ៉ុប ដោយចាញ់ Chealsea ពីរដងនៅឆ្នាំ១៩៧១ និងចាញ់ Liverpool កាលពីរដូវកាលមុន។
នេះជាជំនួបលើកដំបូងបំផុតរបស់ Man City និង Spurs ក្នុងព្រឹត្តិការណ៍អឺរ៉ុប។
Barcelona ជួប Manchester United
ជើងឯកអឺរ៉ុប៥សម័យកាល Barcelona បានទម្លាក់ Lyon ៥-១ រីឯ Manchester United បានធ្វើឲ្យ Paris St-Germain ខកចិត្តក្នុងលទ្ធផល ៣-១ បន្ទាប់ពីក្រុមបារាំងមួយនេះ មានប្រៀប ២-០ នៅជើងទីមួយ។
ក្នុងព្រឹត្តិការណ៍អឺរ៉ុបទាំង European Cup/Champions League ក្លិប Manchester United ឈ្នះ Barcelona តែមួយលើកគត់ក្នុងជំនួប៨លើកចុងក្រោយ។ បិសាចក្រហមខកចិត្តដល់ទៅពីរលើកនៅវគ្គផ្តាច់ព្រ័ត្រជាមួយ Barcelona ក្នុងឆ្នាំ២០០៩ និងឆ្នាំ២០១១។
Lionel Messi ជាកីឡាករដំបូងដែលបានស៊ុតបាល់បញ្ចូលទី២២គ្រាប់លើក្លិបនានានៅអង់គ្លេសក្នុងជំនួប Champions League។
សម្រាប់ជំនួប១១លើកកន្លងមក Barcelona ឈ្នះ៤លើក Manchester United ឈ្នះ៣លើក និងស្មើគ្នា៤លើក។
ជំនួបជើងទីមួយ នឹងប្រព្រឹត្តទៅនៅថ្ងៃទី៩ និងទី១០ ខែមេសា ខណៈជើងទីពីររៀបចំឡើងនៅសប្តាហ៍បន្ទាប់។ រីឯវគ្គពាក់កណ្តាលផ្តាច់ព្រ័ត្រ គឺ Tottenham/Manchester City v Ajax/Juventus និង Barcelona/Manchester United v Liverpool/Porto៕