ប្រធានក្លិបអង្គរថាយហ្គឺរសុំទោសចំពោះករណីមិត្តរួមជាតិជប៉ុនសម្លាប់អ្នករត់តាក់ស៊ី

កីឡាជាតិ

ជាតិ

ប្រធានក្លិបអង្គរថាយហ្គឺរសុំទោសចំពោះករណីមិត្តរួមជាតិជប៉ុនសម្លាប់អ្នករត់តាក់ស៊ី

19, Mar 2019 , 8:59 pm

រូបភាព

ជនសង្ស័យជប៉ុនទាំងពីរនាក់ពីបទសម្លាប់អ្នកបើកតាក់ស៊ី

ដោយ:

ប្រធានក្លិបអង្គរថាយហ្គឺរ លោក Akihiro Kato បានសម្តែងការសុំទោសជាសាធារណៈ ក្រោយមានករណីជនជាតិជប៉ុនពីរនាក់បានសម្លាប់អ្នករត់តាក់ស៊ីប្លន់យករថយន្តកាលពីពេលថ្មីៗ។ បន្ថែមលើការសុំទោស ប្រធានក្លិបរូបនេះ បានផ្តល់ថវិកាចំនួន១ពាន់ដុល្លារដល់គ្រួសារជនរងគ្រោះ ដែលមានប្រពន្ធនិងកូន៤នាក់នៅកំពង់ធំ។ លោកបានអះអាងបន្ថែមថា មិត្តរួមជាតិជប៉ុន និងកីឡាករជប៉ុនជាច្រើននាក់ក៏នឹងចូលរួមបរិច្ចាគថវិកាដល់គ្រួសារជនរងគ្រោះផងដែរ។

ក្រោយមានករណីជនជាតិជប៉ុនពីរនាក់សម្លាប់អ្នករត់តាក់ស៊ី ប្លន់យករថយន្តម៉ាកហាយឡែនឌ័រ ដោយបន្សល់ទុកប្រពន្ធនិងកូន៤នាក់ លោក Akihiro Kato ប្រធានក្លិបបាល់ទាត់អង្គរថាយហ្គឺរបានចេញមុខសុំទោសប្រជាពលរដ្ឋកម្ពុជាជាសាធារណៈតាមបណ្តាញសង្គមហ្វេសប៊ុក ចំពោះករណីដ៏គួរឲ្យសង្វែកមួយនេះ ក្នុងនាមជាជនរួមជាតិ។ ដោយមានចិត្តសប្បុរសធម៌ប្រកបដោយការភាពអាណិតអាសូរ ប្រធានក្លិបរូបនេះ បានផ្តល់ថវិកាចំនួន១ពាន់ដុល្លារ ដល់គ្រួសារជនរងគ្រោះ។

ករណីឃាតកម្មប្លន់យករថយន្តខាងលើបានកើតឡើង បន្ទាប់ពីជនដៃដល់ជនជាតិជប៉ុនទាំងពីររូប គឺ Ishida Reimon និង Naka Ryuji បានម៉ៅឡានជនរងគ្រោះខាងលើក្នុងតម្លៃ៣០ដុល្លារ ក្នុងគោលដៅជិះពីខេត្តបន្ទាយមានជ័យមកខេត្តសៀមរាប។ ពេលជិះដល់កន្លែងកើតហេតុ ដែលស្ថិតនៅក្នុងស្រុកពួកខេត្តសៀមរាប ជនដៃដល់ទាំងពីរបានប្រើល្បិចសុំចុះជុះនោម បន្ទាប់មកពួកគេបានយកកាំបិតចាក់សម្លាប់ជនរងគ្រោះប្លន់យករថយន្ត រួចបើករត់គេចខ្លួន។

ប៉ុន្តែពួកគេទាំងពីរត្រូវបានកម្លាំងក្រោមការសហការគ្នារវាងអធិការដ្ឋានស្រុកពួក និងស្នងការខេត្តសៀមរាប ចាប់ខ្លួនបានទាំងពីរនៅវាលស្រែក្រោយពួកគេព្យាយាមរត់គេចខ្លួន បន្ទាប់ពីបើករថយន្តបុកគោយន្ត និងសរសរផ្ទះរបស់ប្រជាពលរដ្ឋ។ ហេតុការណ៍នេះបានកើតឡើងកាលពីថ្ងៃទី១៧ ខែមីនា ឆ្នាំ២០១៩។

បើតាមការផ្សាយរបស់កាសែតជប៉ុន ជនសង្ស័យទាំងពីរ កំពុងកុនខ្លួនដោយសារជាប់បំណុលធនាគារនៅជប៉ុន៕