អន្តរជាតិ
វៀតណាម ជាប់លេខពីរជាប្រទេសនាំចេញស្បែកជើងធំបំផុតក្នុងពិភពលោក បន្ទាប់ពីចិន រូបភាព៖ Xinhua
× បច្ចុប្បន្ននេះ វៀតណាម នាំចេញស្បែកជើងចំនួន១ពាន់លានគូក្នុងមួយឆ្នាំៗ។ ជាមួយតួលេខនាំចេញនេះ ប្រទេសដែលមានប្រជាជនសរុបជាង៩០លាននាក់នេះ ក្លាយជាប្រទេសនាំចេញស្បែកជើងធំបំផុតលំដាប់ពីររបស់ពិភពលោក ដោយតាមពីក្រោយប្រទេសចិន។
តួលេខនាំចេញស្បែកជើងថ្មីនេះ ត្រូវបានបញ្ជាក់ឲ្យដឹងដោយប្រធានសមាគមផលិតផលស្បែកជើងវៀតណាម លោក Diệp Thành Kiệt នៅក្នុងវេទិកាធុរៈកិច្ចមួយ ដែលបានរៀបចំឡើងក្នុងទីក្រុងហូជីមិញ នៅថ្ងៃពុធទី២០ ខែមីនា។ ថ្លែងក្នុងវេទិកាដដែលនេះ លោក Kiệt និយាយថា ចាប់ពីពេលនេះដល់ឆ្នាំ២០២៥ ឧស្សាហកម្មស្បែកជើងរបស់វៀតណាម នៅតែអាចប្រកួតប្រជែងបានយ៉ាងល្អក្នុងផ្នែកសំខាន់ៗមួយចំនួន រួមមាន តម្លៃពលកម្ម, ចំណូលប្រចាំឆ្នាំរបស់ប្រជាជនម្នាក់ៗ, គោលនយោបាយសេដ្ឋកិច្ច និងទីផ្សារនាំចេញ។
បើតាមលោក Kiệt កត្តាធំៗចំនួនពីរដែលជំរុញការនាំចេញផលិតផលស្បែកជើងរបស់វៀតណាមមានសម្ទុះខ្លាំងក្លាបែបនេះ។ សម្រាប់កត្តាទីមួយ ចិនដែលជាប្រទេសនាំចេញស្បែកជើងធំបំផុតលំដាប់ទីមួយរបស់ពិភពលោក ចាប់ផ្តើមអនុវត្តគោលនយោបាយសេដ្ឋកិច្ចថ្មី ដោយកាត់បន្ថយការវិនិយោគលើលើឧស្សាហកម្មផលិតស្បែកជើង និងសំលៀកបំពាក់ ហើយជំនួសមកវិញដោយផ្តោតសំខាន់លើឧស្សាហកម្មបច្ចេកវិទ្យាទំនើបៗ។ ការណ៍នេះ ធ្វើឲ្យក្រុមអ្នកវិនិយោគងាកទៅរកប្រទេសវៀតណាម។ សម្រាប់កត្តាទីពីរ វៀតណាម ទទួលបានឱកាសទីផ្សារកាន់តែធំទូលាយ ក្រោយក្លាយជាសមាជិកកិច្ចព្រមព្រៀង TPP ១១ ថ្មី។
នាប៉ុន្មានឆ្នាំចុងក្រោយនេះ តម្រូវការជាសកលសម្រាប់ផលិតផលស្បែកជើង បានកើនឡើងដល់២៣ពាន់លានគូក្នុងមួយឆ្នាំៗ។ ប្រទេសដែលផលិតស្បែកជើងធំៗក្នុងពិភពលោក មានដូចជា ចិន, ឥណ្ឌា, វៀតណាម និងឥណ្ឌូណេស៊ី។ នេះបើតាមការចុះផ្សាយរបស់សារព័ត៌មាន Vietnam News ដោយដកស្រង់ការលើកឡើងរបស់អ្នកជំនាញក្នុងវេទិកាខាងលើនេះ។
ដោយសារតែមានតម្រូវការច្រើនសន្ធឹកសន្ធាប់បែបនេះ ក្រុមអ្នកជំនាញវៀតណាម ស្នើឲ្យឧស្សាហកម្មផលិតស្បែកជើងខ្លួនពង្រីកទីផ្សារនាំចញ។ បន្ថែមពីនេះ ឧស្សាហកម្មក៏ត្រូវប្រើប្រាស់បច្ចេកវិទ្យាថ្មីៗ និងវត្ថុធាតុដើមដែលពុំសូវប៉ះពាល់ខ្លាំងដល់បរិស្ថាន។
សូមបញ្ជាក់ថា ក្នុងឆ្នាំ២០១៨ តម្លៃនាំចេញសរុបនៃឧស្សាហកម្មផលិតស្បែងជើងវៀតណាម បានឈានដល់ជិត២០ពាន់លានដុល្លារ ដែលកើនឡើងប្រមាណ ៨,៣ភាគរយ ធៀបនឹងឆ្នាំ២០១៧។ បើយោងតាមសមាគមផលិតផលស្បែកជើងវៀតណាម ឧស្សាហកម្មបានដាក់គោលដៅថ្មី ដោយដំឡើងកំណើននៃតម្លៃការនាំចេញប្រមាណ១០ភាគរយ ដែលស្មើនឹង ២១,៥ ទៅ ២២ពាន់លានដុល្លារ៕
Tag:
វៀតណាម
ចិន
ការនាំចេញស្បែកជើង
© រក្សាសិទ្ធិដោយ thmeythmey.com