អន្តរជាតិ
ចិនទិញយន្តហោះពី Airbus តម្លៃ៣៥ពាន់លានដុល្លារ ខណៈយន្តហោះ Boeing មានបញ្ហា
× ក្នុងដំណើរទស្សនកិច្ចផ្លូវរដ្ឋរបស់ប្រធានាធិបតី ស៊ី ជិនភីង នៅបារាំង ប្រទេសទាំងពីរបានចុះហត្ថលេខាលើកិច្ចព្រមព្រៀងទិញលក់យន្តហោះដឹកនាំអ្នកដំណើរ៣០០គ្រឿង ដែលផលិតដោយក្រុមហ៊ុន Airbus ។ ការសម្រេចចិត្តទិញយន្តហោះរបស់ Airbus ប្រៀបដូចជាការវាយប្រហារដ៏ធ្ងន់មួយលើគូប្រជែងរបស់ក្រុមហ៊ុននេះ គឺ Boeing ដែលជាក្រុមហ៊ុនអាមេរិក ហើយកំពុងជួបបញ្ហាធ្លាក់យន្តហោះផ្ទួនៗមកនោះ។
ក្នុងកិច្ចព្រមព្រៀងដែលចុះហត្ថលេខាអំឡុងទស្សនកិច្ចរបស់ប្រធានាធិបតីចិន ស៊ី ជិនភីង ចិននឹងទិញយន្តហោះធុន A320 ចំនួន២៩០គ្រឿង និងយន្តហោះធុនធំ A350 ចំនួន១០គ្រឿងទៀតដែលមានតម្លៃសរុបដល់ទៅ៣៥ពាន់លានដុល្លារ។ កិច្ចព្រមព្រៀងទិញយន្តហោះរបស់ក្រុមហ៊ុន Airbus ស្ថិតក្នុងចំណោមកិច្ចព្រមព្រៀងចំនួន១៥ ដែលត្រូវបានចុះហត្ថលេខានាជំនួបរវាងលោក ស៊ី និងសមភាគីបារាំង អេម៉ានុយអែល ម៉ាក្រុង ។
តាមពិតទៅ កិច្ចព្រមព្រៀងទិញយន្តហោះនេះ ត្រូវបានប្រកាសតាំងពីដំណើរទស្សនកិច្ចផ្លូវរដ្ឋរបស់លោក ម៉ាក្រុង នៅចិនកាលពីឆ្នាំ២០១៨ ដែលពេលនោះចិនគ្រោងទិញយន្តហោះធុន A320 តែ១៨៤គ្រឿងប៉ុណ្ណោះសម្រាប់បម្រើការឲ្យអាកាសចរណ៍ចំនួន១៣ក្រុមហ៊ុន។ វាជាទម្លាប់របស់ចិនដែលទិញយន្តហោះទ្រង់ទ្រាយធំ មុននឹងចែកចាយដល់ក្រុមហ៊ុននានា។
យន្តហោះរបស់ Airbus ធុន A320 នេះ គឺជាគូប្រជែងរបស់យន្តហោះក្រុមហ៊ុន Boeing ធុន 737 MAX ដែលកំពុងជួបបញ្ហា។ ករណីធ្លាក់យន្តហោះប្រភេទដល់ទៅពីរក្នុងរយៈពេលមិនដល់មួយឆ្នាំ ធ្វើឲ្យក្រុមហ៊ុនផលិតយន្តហោះអាមេរិកមួយនេះ រងផលប៉ះពាល់យ៉ាងខ្លាំង។ ក្រោយការធ្លាក់ចុងក្រោយរបស់អាកាសចរណ៍ Ethiopian Airline ដែលសម្លាប់មនុស្សគ្មានសល់ម្នាក់ ប្រទេសជាច្រើនរាប់ទាំងចិនផងនោះ បានបញ្ឈប់ការប្រើប្រាស់យន្តហោះស៊េរី 737 MAX នេះ។
សូមបញ្ជាក់ថា ចិន គឺជាទីផ្សារយន្តហោះដ៏ធំមួយរបស់ពិភពលោក និងជាអតិថិជនដ៏សំខាន់របស់ Airbus និង Boeing ។ កំណើននៃការប្រើប្រាស់យន្តហោះនៅចិន បានកើនឡើងយ៉ាងឆាប់រហ័សព្រោះប្រជាជនចិនវណ្ណៈកណ្ដាលពេញនិយមធ្វើដំណើរតាមផ្លូវអាកាសនេះកាន់តែច្រើនឡើងដែរ។ ប៉ុន្តែករណីធ្លាក់បន្តបន្ទាប់របស់ 737 MAX ធ្វើឲ្យទំនុកចិត្តលើ Boeing ធ្លាក់ចុះ ហើយចិនងាកទៅរក Airbus របស់អឺរ៉ុបវិញ។
ប្រធានាធិបតីបារាំង ចាត់ទុកកិច្ចព្រមព្រៀងនេះ ជាសញ្ញាដ៏ល្អមួយ ស្របពេលបារាំង និងចិនអបអរខួបទី៥៥ឆ្នាំនៃការបង្កើតទំនាក់ទំនងការទូត។ ប៉ុន្តែទស្សនកិច្ចរបស់លោក ស៊ី នៅអឺរ៉ុប ធ្វើឡើងខណៈដែលអឺរ៉ុបមានជំហរតឹងរ៉ឹងខ្លាំងក្នុងទំនាក់ទំនងជាមួយចិន។ ថ្មីៗនេះ លោក ម៉ាក្រុង ផ្ទាល់ ក៏រិះគន់ចិនចំៗជុំវិញគំនិតផ្ដួចផ្ដើមខ្សែក្រវាត់ និងវិថីនៅអាហ្វ្រិក ក៏ដូចជារបៀបរកស៊ីមិនយុត្តិធម៌ ហើយមិនសូវគោរពម្ចាស់ស្រុកទេសទៅទៀត៕
Tag:
ចិន
បារាំង
ស៊ី ជិនភីង
Airbus
Boeing
© រក្សាសិទ្ធិដោយ thmeythmey.com