ជាតិ
បទយកការណ៍ / បទសម្ភាសន៍
លោក ឆាំ ប៊ុនថេត ៖ មនុស្សជោគជ័យក្នុងជីវិតពឹងផ្អែកលើជំនាញទន់៨០ភាគរយ និងជំនាញរឹង២០ភាគរយ
× លោក ឆាំ ប៊ុនថេត សាស្ត្រាចារ្យនៃសាកលវិទ្យាល័យបញ្ញាសាស្ត្រ បានលើកឡើងថាសិស្ស និស្សិតកម្ពុជាមិនទាន់មានសមត្ថភាពគ្រប់គ្រាន់ដែលឆ្លើយតបទៅនឹងទីផ្សារការងារនាពេលបច្ចុប្បន្ននៅឡើយទេ។ បើតាមលោក ឆាំ ប៊ុនថេត កត្តាចំនួន៣ដែលបណ្ដាលឲ្យសម្ថភាពរបស់និស្សិតទាំងជំនាញបច្ចេកកទេស និងជំនាញទន់ ក្នុងការទំនាក់ទំនងនៅមានកម្រិត រួមមានទី១ មកពីនិស្សិតខ្លួនឯងផ្ទាល់ ទី២ ប្រព័ន្ធអប់រំ និងទី៣ បញ្ហាសង្គម និងក្រុមគ្រួសារ ។
ត្រង់ចំណុចនេះលោក ប៊ុនថាត បានសង្កត់ធ្ងន់ថា និស្សិតដែលកំពុងសិក្សានៅតាមមហាវិទ្យាល័យជាច្រើនមិនទាន់ស្គាល់ខ្លួនឯងច្បាស់នៅឡើយទេ ខណៈពួកគេរៀនជិតចប់ឆ្នាំទៅហើយ មិនទាន់មានគោលដៅជីវិត។ បន្ថែមពីនេះលោក ប៊ុនថេត បានបញ្ជាក់ថា និស្សិតភាគច្រើនបានសម្រេចជ្រើសរើសរៀនពីរមហាវិទ្យាល័យ ដែលជាការបង្ហាញថាគាត់មិនទាន់មានគោលដៅច្បាស់លាស់អ្វីនៅឡើយទេ ខណៈឪពុកម្ដាយមិនបានផ្តល់សេរីភាពដល់កូនក្នុងការជ្រើសរើសមុខជំនាញដែលខ្លួនស្រលាញ់ចូលចិត្ត។ លោកបាននិយាយថា៖«ចង់ចេះច្រើនពេក រៀនសាលាច្រើនពេក តែមិនខំប្រឹងរៀន ទៅបំពេញឲ្យតែគ្រប់ម៉ោង ថាខ្លួនឯងនឹងប្រឹងរៀនដែរ តែតាមពិតទៅមិនប៉ុន្មានដែរទេ»។
សូមស្ដាប់បទសម្ភាសរវាងលោក ភួង វ៉ាន់ថា អ្នកសារព័ត៌មានថ្មីៗ និងលោក ឆាំ ប៉ុនថេត សាស្ត្រាចារ្យនៃសាកលវិទ្យាល័យបញ្ញាសាស្ត្រកម្ពុជា ដូចតទៅ៖
បើទោះក្រសួងបានធ្វើកំណែទម្រងក៏ដោយ ក៏ប្រព័ន្ធអប់រំនៅមានបញ្ហាច្រើន ព្រោះមិនបានតម្រង់ទិស និងមិនបានបង្រៀនបំណិនជីវិតដល់សិស្សានុស្សិស្សកម្ពុជានៅឡើយទេ។ កំណែទម្រង់នាពេលបច្ចុប្បន្នគ្រាន់តែជំរុញឲ្យកូនសិស្សគិតតែពីលទ្ធផលជាប់ឬធ្លាក់តែប៉ុណ្ណោះ។ ហើយចំពោះសកលវិទ្យាល័យភាគច្រើនបង្រៀនកូនសិស្សរបស់ខ្លួន ដោយផ្តោតតែទៅលើជំនាញបច្ចេកទេស ខណៈជំនាញទន់ក្នុងការទំនាក់ទំនង ,គុណតម្លៃក្នុងសង្គម និងអត្តចរិកនៅមានការខ្វះខាតច្រើន។នេះជាការលើកឡើងរបស់សាស្ត្រាចារ្យនៃសាកលវិទ្យាល័យបញ្ញាសាស្ត្ររូបនេះ។
លោកបាននិយាយ៖« យុវជននាពេលបច្ចុប្បន្នទាក់ទងនឹងបញ្ហាជំនាញទន់ និងភាពជាអ្នកដឹកនាំ នៅតែជាបញ្ហាមួយធំ ដែលសិស្សនិស្សិត បញ្ញវន្តគួរតែងាកមកយកចិត្តទុកដាក់លើបញ្ហានេះវិញ»។
ចំពោះដំណោះស្រាយលោកសាស្ត្រាចារ្យរូបនេះបានលើកឡើងថា កត្តាខ្លួនឯងជាកត្តាសំខាន់ទីមួយ ដែលត្រូវដោះស្រាយ ហើយសិស្ស និស្សិតត្រូវសួរខ្លួនឯងជានិច្ចថា ខ្លួនឯងនៅមានចំណុចខ្វះខាតអ្វីទៀតដែលត្រូវបំពេញ។ សិស្ស និស្សិតត្រូវស្វែងរកអ្វីដែលខ្លួនស្រសាញ់ហើយត្រូវយកចិត្តទុកដាក់ ខំប្រឹងរៀនសូត្រ ទាំងជំនាញទន់ និងជំនាញបច្ចេកទេស។ សង្គមគ្រួសារ និងរាជរដ្ឋាភិបាលគួរបង្កើនការយកចិត្តទុកដាក់បន្ថែមទៀតទាក់ទងនឹងបំណិនជីវិត សេក្តីថ្លៃថ្នូរ តម្រង់ទិស និងបើកឱកាសដល់កូនៗ ក្នុងការជ្រើសមុខជំនាញដែលពួកគេចូលចិត្ត៕
Tag:
ឆាំ ប៊ុនថេត
ជំនាញ
© រក្សាសិទ្ធិដោយ thmeythmey.com