អាមេរិក រងការរិះគន់ជុំទិសនៅក្រុមប្រឹក្សាសន្តិសុខព្រោះចាត់ទុកខ្ពង់រាបហ្គោឡង់ជាទឹកដីអ៊ីស្រាអែល

អន្តរជាតិ

អាមេរិក រងការរិះគន់ជុំទិសនៅក្រុមប្រឹក្សាសន្តិសុខព្រោះចាត់ទុកខ្ពង់រាបហ្គោឡង់ជាទឹកដីអ៊ីស្រាអែល

28, Mar 2019 , 9:19 pm

រូបភាព

ជនជាតិស៊ីរីកាន់ទង់ជាតិស៊ីរីនៅខ្ពង់រាបហ្គោឡង់ (រូបភាព AFP)

ដោយ: តន ចាន់រិទ្ធារ៉ា

សហរដ្ឋអាមេរិក បានរងការរិះគន់យ៉ាងខ្លាំងក្នុងកិច្ចប្រជុំប្រឹក្សាសន្តិសុខអង្គការសហប្រជាជាតិ ដោយសារតែទទួលស្គាល់ខ្ពង់រាបហ្គោឡង់ជាកម្មសិទ្ធិអ៊ីស្រាអែល។ នាកិច្ចប្រជុំថ្ងៃទី២៧ ខែមីនា សមាជិកក្រុមប្រឹក្សាសន្តិសុខជាច្រើន បានពន្លះអាមេរិកដែលដើរផ្ទុយពីច្បាប់អន្តរជាតិ ពិសេសដំណោះស្រាយក្រុមប្រឹក្សាដែលចាត់ទុកការគ្រប់គ្រងរបស់អ៊ីស្រាអែលជារឿងខុសច្បាប់។ ប៉ុន្តែអាមេរិកអះអាងថា ការសម្រេចចិត្តរបស់ខ្លួនជារឿងល្អសម្រាប់សន្តិសុខតំបន់ និងអ៊ីស្រាអែល។

ក្រុមប្រឹក្សាសន្តិសុខអង្គការសហប្រជាជាតិ បានបើកកិច្ចប្រជុំបន្ទាន់មួយនៅថ្ងៃទី២៧ ខែមីនាតាមសំណើរបស់ស៊ីរីជុំវិញការទទួលស្គាល់ខ្ពង់រាបហ្គោឡង់ជាកម្មសិទ្ធិអ៊ីស្រាអែលពីសំណាក់អាមេរិក។ ស៊ីរីដែលជាម្ចាស់ទឹកដីយុទ្ធសាស្ត្រមួយនេះ ហៅការសម្រេចចិត្តរបស់ប្រធានាធិបតីអាមេរិក ដូណាល់ ត្រាំ ជាការបំពានដំណោះស្រាយក្រុមប្រឹក្សាសន្តិសុខផ្ទាល់។

តំណាងប្រទេសសមាជិកក្រុមប្រឹក្សាចំនួន១៤ រាប់ទាំងសម្ព័ន្ធមិត្តជិតដិតផងនោះ បានរិះគន់ជំហររបស់អាមេរិក។ តំណាងអង់គ្លេសចាត់ទុកការទទួលស្គាល់ខ្ពង់រាបហ្គោឡង់ជាទឹកដីអ៊ីស្រាអែល ជាការបំពានដំណោះស្រាយលេខ៤៩៧ ដែលប្រកាសថា ការបញ្ចូលខ្ពង់រាបនេះជាទឹកដីអ៊ីស្រាអែល គ្មានបានការឡើយ។ ឯបារាំងវិញ បានព្រមានថា សកម្មភាពដែលដើរតាមច្បាប់អន្តរជាតិ ប្រាកដជាបរាជ័យមិនខាន។

រុស្ស៊ីដែលជាមិត្តជិតស្និទ្ធរបស់រដ្ឋាភិបាលក្រុងដាម៉ាស់ បានអំពាវនាវឲ្យមានការជំទាស់ការសម្រេចចិត្តរបស់លោក ត្រាំ និងបន្តហៅខ្ពង់រាបនេះជា «ទឹកដីគ្រប់គ្រងដោយអ៊ីស្រាអែល» ។ ចិនដែលមានទំនាក់ទំនងល្អជាមួយរដ្ឋាភិបាលស៊ីរីដែរនោះ ក៏ប្រកាសជំហរប្រឆាំងរាល់ការប៉ុនប៉ងទាំងឡាយណាដែលចង់ផ្លាស់ប្ដូរឋានៈរបស់ទឹកដីមួយនេះ។ តំណាងរបស់ចិនលើកឡើងថា ក្រុងប៉េកាំងមិនចង់ឃើញភាពតានតឹងនៅមជ្ឈិមបូព៌ាឡើយ។

តំណាងស៊ីរីវិញ ក៏និយាយវាយប្រហារអាមេរិកមិនបង្អង់មាត់ដែរ។ លោក Bashar Jaafari អគ្គរដ្ឋទូតស៊ីរីចោទអាមេរិកថា កាត់ទឹកដីខ្ពង់រាបហ្គោឡង់ទៅឲ្យអ៊ីស្រាអែលដើម្បីបំពេញចិត្តក្រុមបញ្ចុះបញ្ចូលអ៊ីស្រាអែល ដែលជាអ្នកផ្ដល់ហិរញ្ញវត្ថុឲ្យអ្នកនយោបាយអាមេរិកប៉ុណ្ណោះ។ តំណាងស៊ីរីរូបនេះក៏ស្នើឲ្យអាមេរិកកាត់ទឹកដីរបស់ខ្លួនឲ្យអ៊ីស្រាអែលវិញទៅ។

«អ្នកអាចឲ្យទឹកដីរដ្ឋការ៉ូលីណាខាងត្បូង និងខាងជើងទៅអ៊ីស្រាអែល។ រដ្ឋការ៉ូលីណាខាងត្បូង ជាទឹកដីដ៏ល្អ។ ដូចនេះអាមេរិកគួរឲ្យរដ្ឋខ្លះទៅអ៊ីស្រាអែល បើរដ្ឋបាលលោក ត្រាំ ចង់បានគាំទ្រពីអ៊ីស្រាអែលនោះ? នេះជាសម្ដីប្រតិកម្មរបស់លោក Bashar Jaafari ក្នុងកិច្ចប្រជុំក្រុមប្រឹក្សាសន្តិសុខដែលផ្សាយដោយសារព័ត៌មាន RT ។

នាកិច្ចប្រជុំដែលខ្លួនក្លាយជាមុខសញ្ញារងការរិះគន់ អាមេរិកបាននិយាយជំហររបស់យ៉ាងម៉ឺងម៉ាត់វិញដែរ។ ជាមួយនឹងការទទួលស្គាល់ការគ្រប់គ្រងរបស់អ៊ីស្រាអែល វានឹងជួយពង្រឹងសន្តិសុខអ៊ីស្រាអែល និងបន្តរក្សាស្ថិរភាពមជ្ឈិមបូព៌ាតាមរយៈការបិទផ្លូវអ៊ីរ៉ង់ ស៊ីរី និងក្រុម Hezbollah មិនឲ្យប្រើប្រាស់ខ្ពង់រាបនេះជាទីតាំងវាយប្រហារអ៊ីស្រាអែល៕