ជាតិ
USAID ផ្ដល់ថវិកា២១លានដុល្លារ សម្រាប់សកម្មភាពការពារព្រៃឡង់ រូបភាពពីក្រសួងព័ត៌មាន
× ភ្នំពេញ៖ ទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (USAID) ផ្ដល់ថវិកា២១លានដុល្លារ ដើម្បីជួយពង្រឹងសកម្មភាពគ្រប់គ្រងធនធានព្រៃឡង់ឲ្យមានប្រសិទ្ធភាពកាន់តែប្រសើឡើង ក្នុងពិធីប្រកាសការចាប់ផ្ដើមគម្រោងព្រៃឡងបៃតង នៅថ្ងៃទី៣មេលា ឆ្នាំ២០១៩ ។ នេះបើតាមក្រសួងព័ត៌មាន។
លោកស្រី វីណា រ៉េតឌី នាយិកាបេសកម្មរបស់រដ្ឋាភិបាលសហរដ្ឋអាមេរិកសម្រាប់ការអភិវឌ្ឍអន្តរជាតិប្រចាំកម្ពុជា បាននិយាយថា ការគាំទ្រនេះ ដើម្បីអភិរក្សបេតិកភណ្ឌធម្មជាតិ វប្បធម៌ និងជួយឲ្យជីវភាពរស់នៅរបស់ប្រជាពលរដ្ឋជនបទបានប្រសើរ រួមទាំងការកាត់បន្ថយការប្រែប្រួលអាកាសធាតុ។
ក្រសួងព័ត៌មានដែលបានស្រង់សម្ដីលោក សៅ សុភាព រដ្ឋលេខាធិការក្រសួងបរិស្ថាន បាននិយាយថា ការគាំទ្រនេះ គឺផ្ដោតសំខាន់លើការកាត់បន្ថយការបំភាយឧស្ម័នផ្ទះកញ្ចក់ និងការគ្រប់គ្រងប្រកបដោយនិរន្តភាពនៃតំបន់ទេសភាពព្រៃឡង់ ជាដែនជម្រកសត្វព្រៃ រួមទាំងតំបន់ដែលនៅជំវិញព្រៃឡង់ តាមរយៈការពង្រឹងសមត្ថភាពឲ្យមានប្រសិទ្ធភាពក្នុងការគ្រប់គ្រងព្រៃឈើ។ ការពង្រឹងសមត្ថភាពក្នុងកិច្ចការពារនេះ ក្រោមកិច្ចសហការរវាងរាជរដ្ឋាភិបាល រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល និងប្រជាសហគមមូលដ្ឋាន។
បើតាមលោក សៅ សុភាព គម្រោងព្រៃឡងបៃតងនេះ គឺជាគម្រោងដំណាក់កាលទី២ អនុវត្តរហូតដល់ឆ្នាំ២០២៣ ដើម្បីអភិរក្សជីវចម្រុះ និងស្ថានភាពប្រព័ន្ធអេកូឡូស៊ី ព្រមទាំងបង្កើតឲ្យមាននិរន្តរភាព និងសមធម៌នៃកាលានុវត្តភាពផ្នែកសេដ្ឋកិច្ច ជីវភាពសហគមន៍ និងទុនធម្មជាតិ សម្រាប់ការវិនិយោគឡើងវិញ។
កិច្ចសហប្រតិបត្តិការរវាងក្រសួងបរិស្ថាន និងUSAID បានអនុវត្តគម្រោងដំណាក់ការទី១រួចមកហើយ គឺការគាំទ្រធនធានព្រៃឈើ និងជីវចម្រុះ នៅតំប់ដែនជម្រកសត្វព្រៃ ព្រៃឡង់ និងខ្ពង់រាបខាងកើត ក្នុងដែនជម្រកសត្វព្រៃកែវសីមា កាលពីឆ្នាំ២០១២-២០១៧ ក្រោមជំនួយគាំទ្រជាថវិកាសរុបប្រមាណ២០លានដុល្លារ។
តំបន់ដែនជម្រកសត្វព្រៃ ព្រៃឡង់ មានផ្ទៃដីទំហំជាង៤៣ម៉ឺនហិកតា ដែលគ្របដណ្តប់លើខេត្តទាំង៤របស់កម្ពុជា មានខេត្តព្រះវិហារ កំពង់ធំ ស្ទឹងត្រែង និងខេត្តក្រចេះ។ តំបន់នេះ សម្បូរទៅដោយធនធានជីវចម្រុះ និងដើរតួនាទីយ៉ាងសំខាន់ក្នុងការគ្រប់គ្រងទឹក និងច្រោះសម្អាតទឹកហូរទៅកាន់អាងទន្លេសាប និងជាប្រភពដ៏សំខាន់សម្រាប់ផ្តល់នូវសន្តិសុខស្បៀងដល់ប្រជាពលរដ្ឋរាប់លាននាក់៕
© រក្សាសិទ្ធិដោយ thmeythmey.com