អន្តរជាតិ
ប្រមុខ UN ចាត់ទុកច្បាប់ថ្មីប្រឆាំងអ្នកស្រឡាញ់ភេទដូចគ្នានៅព្រុយណេ ជាការបំពានសិទ្ធិមនុស្ស
ស៊ុលតង់ព្រុយណេ Hassanal Bolkiah (រូបភាព AFP)
×![]()
ដោយ: តន ចាន់រិទ្ធារ៉ា
នៅព្រុយណេ ច្បាប់ព្រហ្មទណ្ឌថ្មីដែលមានការដាក់ទោសទណ្ឌធ្ងន់ធ្ងរ រងការរិះគន់យ៉ាងខ្លាំងពីសហគមន៍អ្នកការពារសិទ្ធិមនុស្ស និងប្រទេសនានា។ រងការរិះគន់ ព្រោះច្បាប់ថ្មីដែលអនុលោមតាមច្បាប់សាសនាឥស្លាម Sharia នេះ កំណត់ទោសប្រហារជីវិតសម្រាប់បទល្មើសសហាស្មន់ និងការរួមភេទរបស់បុរសស្រឡាញ់បុរស។ អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស ចាត់ទុកច្បាប់ថ្មីនេះ ជាការបំពានសិទ្ធិមនុស្ស។
ច្បាប់ព្រហ្មទណ្ឌថ្មីនៅព្រុយណេ ចូលជាធរមានចាប់ពីថ្ងៃទី៣ ខែមេសា ទោះជាមានប្រតិកម្មជាច្រើន និងការអំពាវនាវឲ្យផ្អាកការអនុវត្តក្ដី។ ច្បាប់ថ្មីនេះ បានចែងពីការដាក់ទោសយ៉ាងធ្ងន់ធ្ងរដែលភាគច្រើនជាបទល្មើសផ្ទុយពីសាសនាឥស្លាមដែលត្រូវបានគោរពយ៉ាងខ្ជាប់ខ្ជួនដោយប្រជាជនក្នុងប្រទេសសម្បូរប្រេងនៃតំបន់អាស៊ីអាគ្នេយ៍មួយនេះ។ គេមើលឃើញថា សហគមន៍ស្រឡាញ់ភេទដូចគ្នា គឺជាមុខសញ្ញាធំជាងគេតែម្ដង
ក្រោមច្បាប់ថ្មីដែលពន្យារពេលអនុវត្តប៉ុន្មានឆ្នាំមកហើយនោះ ការរួមភេទរវាងបុរសនិងបុរស នឹងត្រូវប្រហារជីវិតដោយការគប់ដុំថ្ម ដូចគ្នានឹងទោសសហាយស្មន់ដែរ។ ចំណែកការរួមភេទរវាងស្ត្រី និងស្ត្រី មិនមែនជាទោសស្លាប់ឡើយ តែត្រូវជាប់ពន្ធនាគារដល់ទៅ១០ឆ្នាំ ឬក៏ត្រូវវាយ៤០រំពាត់។ ទោសលួចទ្រព្យសម្បត្តិអ្នកដទៃ ត្រូវកាត់ដៃម្ខាងសម្រាប់កំហុសលើកទីមួយ និងកាត់ជើងម្ខាងសម្រាប់ការធ្វើកំហុសលើកទីពីរ។
ការដាក់ទោសធ្ងន់ធ្ងរបែបនេះ ជាការបំពានសិទ្ធិមនុស្សយ៉ាងច្បាស់។ នេះជាការលើកឡើងរបស់អគ្គលេខាធិការអង្គការសហប្រជាជាតិ អាន់តូនីញ៉ូ ហ្គូតេរ៉េស នៅថ្ងៃទី៣ ខែមេសា។ តាមរយៈអ្នកនាំពាក្យរបស់ខ្លួន ប្រមុខអង្គការពិភពលោកមួយនេះអះអាងថា សិទ្ធិមនុស្សគួរត្រូវបានប្រកាន់ខ្ជាប់ជាមួយគ្រប់មនុស្សទាំងអស់នៅគ្រប់ទីកន្លែងដោយគ្មានការរើសអ្វីឡើយ។
បើតាមទីភ្នាក់ងារព័ត៌មាន AFP លោក Stephane Dujarric ជាអ្នកនាំពាក្យលោក ហ្គូតេរ៉េស បញ្ជាក់ច្បាស់ថា លោកអគ្គលេខាធិការមានជំហរប្រឆាំងការដាក់ពិន័យធ្ងន់ធ្ងរគ្រប់ទម្រង់ទាំងអស់ ហើយលោកប្រកាន់ជំហរការពារសិទ្ធិរបស់មនុស្សគ្រប់ៗរូបតាមបំណងរបស់ពួកគេជ្រើស គឺអ្នកដែលពួកគេចង់រស់នៅជាមួយ និងអ្នកដែលពួកគេស្រឡាញ់។
ទោះជាយ៉ាងណា សហគមន៍អ្នកស្រឡាញ់ភេទដូចគ្នានៅព្រុយណេ កំពុងបារម្ភក្នុងចិត្តយ៉ាងខ្លាំងចំពោះច្បាប់ថ្មីនេះ។ ប្រទេសជាច្រើន សុទ្ធតែប្រកាសជំហរមិនពេញចិត្តនឹងច្បាប់ថ្មីនេះ ខណៈតារាសិល្បៈល្បីឈ្មោះជាច្រើននាក់ បានអំពាវនាវឲ្យមានការធ្វើពហិការសណ្ឋាគាររបស់ព្រុយណេទៀតផង សំដៅបង្ខំឲ្យរដ្ឋាភិបាលក្រុងបានដាស៊េរីបេហ្កាវ៉ាន់បញ្ឈប់ការអនុវត្តច្បាប់នេះ៕
Tag:
UN
ព្រុយណេ
អាន់តូនីញ៉ូ ហ្គូតេរ៉េស
© រក្សាសិទ្ធិដោយ thmeythmey.com
