អន្តរជាតិ
ប្រធានាធិបតីអាមេរិក ដូណាល់ ត្រាំ និងឧបនាយករដ្ឋមន្រ្តីចិន លីវ ហឺ ក្នុងសេតវិមាន។ (រូបភាព AFP)
×![]()
ដោយ: តន ចាន់រិទ្ធារ៉ា
តំណាងចរចាចិន និងអាមេរិក កំពុងជួបចរចាជុំថ្មីមួយទៀតនៅទឹកដីដើម្បីសម្រេចឲ្យកិច្ចព្រមព្រៀងបញ្ចប់ជម្លោះពាណិជ្ជកម្មរវាងមហាអំណាចទាំងពីរ។ ក្រោយការចរចាជាច្រើនលើកដែលធ្វើឆ្លាស់គ្នាទាំងនៅរដ្ឋធានីប៉េកាំង និងនៅរដ្ឋធានីវ៉ាស៊ីនតោន ទទួលបានលទ្ធផលគាប់ប្រសើរច្រើនដោយភាគច្រើនចិនជាអ្នកធ្វើសម្បទានជាងអាមេរិក។ ប្រធានាធិបតីចិនចង់ឃើញការចរចាចប់ឆាប់ៗនេះដើម្បីប្រយោជន៍ប្រទេសទាំងពីរ ឯប្រធានាធិបតីអាមេរិកថា ការចរចាមានពេលបួនសប្ដាហ៍ទៀត។
ជម្លោះពាណិជ្ជកម្មរវាងមហាអំណាចទីមួយ និងទីពីររបស់ពិភពលោក កំពុងខិតទៅរកទីបញ្ចប់ហើយ។ ឧបនាយករដ្ឋមន្ត្រីចិន លីវ ហឺ កំពុងស្ថិតក្នុងរដ្ឋធានីវ៉ាស៊ីនតោនដើម្បីចរចាជាមួយដៃគូអាមេរិកដឹកនាំរដ្ឋមន្ត្រីរតនាគារ Stephen Mnuchin និងតំណាងចរចាពាណិជ្ជកម្ម Robert Lighthizer ។ ថ្ងៃទី៤ ខែមីនា លោក លីវ ក៏នាំយកសារមួយច្បាប់របស់ប្រធានាធិបតីចិន ស៊ី ជិនភីង ប្រគល់ឲ្យប្រធានាធិបតីអាមេរិក ដូណាល់ ត្រាំ ផង។
ក្នុងលិខិតនោះ លោក ស៊ី បានស្នើឲ្យភាគីទាំងពីរបញ្ចប់ការចរចាលើអត្ថបទនៃកិច្ចព្រមព្រៀងឲ្យបានឆាប់តាមតែអាចធ្វើបានដោយផ្អែកលើគោលការណ៍គោរពគ្នា និងរក្សាផលប្រយោជន៍គ្នាទៅវិញទៅមក។ ក្នុងលិខិតដែលផ្សាយដោយទីភ្នាក់ងារព័ត៌មាន Xinhua មេដឹកនាំចិនបានលើកឡើងពីការប្រឹងប្រែងរបស់មន្ត្រីចិន និងអាមេរិកដែលបានជួបចរចាជាច្រើន ហើយបានបង្កើតសមិទ្ធផលជាក់លាក់លើអត្ថបទនៃកិច្ចព្រមព្រៀង។
ជុំវិញការចរចានេះ លោក ត្រាំ និយាយចំពោះមុខឧបនាយករដ្ឋមន្ត្រីចិន ថា ភាគីទាំងពីរមានពេល៤សប្ដាហ៍ទៀតដើម្បីចរចា ហើយកិច្ចព្រមព្រៀងចុងក្រោយដែលសរសេរជាលាយលក្ខណ៍អក្សរផងនោះ នឹងបញ្ចប់នៅពីរសប្ដាហ៍បន្ទាប់។ ប្រសិនបើដំណើរការចរចាទៅមុខវិជ្ជមានបែបនេះ លោក ត្រាំ បន្ថែមថា លោកនឹងជួបលោក ត្រាំ តែម្ដងដើម្បីចុះកិច្ចព្រមព្រៀងបញ្ចប់ជម្លោះពាណិជ្ជកម្ម។ ជំនួបមេដឹកនាំនេះ នឹងធ្វើនៅអាមេរិក។
ពីសេតវិមាន លោក ត្រាំ អង្គុយក្បែរដោយលោក លីវ ហឺ ដែលនេះខុសពីជំនួបលើកមុនពេលមន្ត្រីជាន់ខ្ពស់ចិនរូបនេះអង្គុយទល់មុខប្រធានាធិបតីអាមេរិក។ មេដឹកនាំអាមេរិកប្រាប់អ្នកសារព័ត៌មានពីក្នុងបន្ទប់ពងក្រពើថា ការចរចាទៅមុខដោយរលូនដោយអាមេរិក និងចិនបានឯកភាពគ្នាលើចំណុចជាច្រើន។ យ៉ាងណាមិញ លោក ត្រាំ មិននិយាយអ្វីទាក់ទងនឹងការប្រើប្រាស់ពន្ធជាយុទ្ធសាស្ត្រចរចាឡើយ ដោយលោកនឹងនិយាយត្រង់ៗជាមួយលោក លីវ វិញ។
ទោះជាមានមេដឹកនាំទាំងពីរមានជំហរសុទិដ្ឋិនិយមច្រើនក្ដី បញ្ហារាំងស្ទះក៏មានដដែលក្នុងការចរចា។ លោក Lighthizer ប្រធានក្រុមចរចារបស់អាមេរិកអះអាងថា មានបញ្ហាសំខាន់ៗជាច្រើនដែលត្រូវជជែកគ្នា ប៉ុន្តែភាពរីកចម្រើនមានច្រើនជាងគេរំពឹងទុក។ ដោយសាររឿងនេះ ទើបអាមេរិកសម្រេចចិត្តរក្សាទុកចំណាត់ដាក់ពន្ធលើទំនិញនាំចូលពីចិនបន្តទៀត ដើម្បីធានាថា ចិននឹងអនុវត្តតាមពាក្យសន្យារបស់ខ្លួន៕
Tag:
អាមេរិក
ចិន
ស៊ី ជិនភីង
ដូណាល់ ត្រាំ
© រក្សាសិទ្ធិដោយ thmeythmey.com
