ការនាំចេញអង្ករកម្ពុជា កើនឡើង៦ភាគរយ បើធៀបនឹងត្រីមាសឆ្នាំមុន

ជាតិ

ការនាំចេញអង្ករកម្ពុជា កើនឡើង៦ភាគរយ បើធៀបនឹងត្រីមាសឆ្នាំមុន

06, Apr 2019 , 9:29 am

រូបភាព

ដោយ: ឡាយ សុភាវតី

កម្ពុជា បាននាំចេញអង្ករ១៧ម៉ឺនតោន ក្នុងរយៈពេល៣ខែនៃដើមឆ្នាំ២០១៩។ បើធៀបនឹងរយៈពេល៣ខែនៃដើមឆ្នាំ២០១៨ គឺមានការកើនឡើង៦ភាគរយ (កើនប្រមាណ១ម៉ឺនតោន)។ នេះបើយោងតាមរបាយការណ៍របស់លេខាធិការដ្ឋានច្រកចេញ-ចូលតែមួយសម្រាប់បំពេញបែបបទនាំចេញអង្ករ ស្ដីអំពីស្ថានភាពនៃការនាំចេញអង្ករកម្ពុជា។

ចាប់ពីខែមករាដល់ខែមីនា ឆ្នាំ២០១៩ កម្ពុជា បាននាំអង្ករចេញ១៧ម៉ឺនតោន ដែលរយៈពេលពីរខែក្នុងខែកុម្ភៈនិងខែមីនា មានភាពកើនឡើងជាប់គ្នាជាងឆ្នាំមុន។ ក្នុងខែមីនាឆ្នាំ២០១៩នេះ មានការនាំចេញអង្ករជាង៥ម៉ឺនតោន ជាប្រភេទអង្ករក្រអូប អង្ករសគ្រាប់វែង និងអង្ករចំហុយគ្រាប់វែង។ ការនាំចេញអង្ករក្រអូប មានជាង៥ម៉ឺនតោន, អង្ករសគ្រប់វែងជាង៥ពាន់តោន និងអង្ករចំហុយគ្រាប់វែងជាង៦០០តោន។

ដោយឡែកការនាំចេញអង្កររយៈពេល៣ខែក្នុងដើមឆ្នាំ២០១៨ បានត្រឹម១៦ម៉ឺនតោនប៉ុណ្ណោះ។ ចំពោះការនាំចេញអង្ករសរុបក្នុងឆ្នាំ២០១៨ គឺមាន៦២ម៉ឺនតោន៕