ជាតិ
វីដេអូ
×![]()
កោះកុង៖ ខ្លឹមចន្ទន៍ក្រស្នា ត្រូវបានគេយកទៅធ្វើជាគ្រឿងក្រអូប, គ្រឿងកែសម្រស់ និងជាវត្ថុមានតម្លៃជាដើម។ ក្នុងបរិវេណផ្ទះលោក ទុយ វណ្ណៈវិញ មានដើមចន្ទន៍ក្រស្នា ប្រមាណ ៥០០ដើម ដែលដាំដុះយកខ្លឹមសម្រាប់លក់។ បើតាមលោក ទុយ វណ្ណៈ ខ្លឹមចន្ទន៍ក្រស្នា អាចលក់បានក្នុង១គីឡូពី១ពាន់ទៅ៣ពាន់ដុល្លារ។ 
ក្នុងភូមិជីផាត ឃុំជីផាត ស្រុកថ្មបាំង ខេត្តកោះកុង មានផ្ទះប្រជាពលរដ្ឋមួយចំនួន បានដាំដើមចន្ទន៍ក្រស្នា សម្រាប់យកខ្លឹមលក់។ ជាក់ស្ដែងផ្ទះលោក ទុយ វណ្ណៈ មគ្គុទេសក៍ទេសចរនៅសហគមន៍ជីផាត មានដើមចន្ទន៍ក្រស្នាប្រមាណ ៥០០ដើម។ ម្ចាស់ដើមចន្ទន៍ក្រស្នារូបនេះ បញ្ជាក់ថា៖ «ដើមចន្ទន៍ក្រស្នានេះ ជាដើមមានតម្លៃ ដោយសារតែមានខ្លឹម។ គេអាចយកខ្លឹមចន្ទន៍ក្រស្នា ទៅធ្វើគ្រឿងក្រអូប និងជាវត្ថុមានតម្លៃ។ ហើយខ្លឹមរបស់វា អាចលក់បានក្នុង១គីឡូពី១ពាន់ទៅ៣ពាន់ដុល្លារ»។
សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយលោក ទុយ វណ្ណៈ ម្ចាស់ដើមចន្ទន៍ក្រស្នានៅសហគមន៍អេកូទេសចរណ៍ជីផាតដូចតទៅ៖
ដើមចន្ទន៍ក្រស្នា ដែលមានខ្លឹម គឺមានអាយុចាប់ពី ១០ឆ្នាំឡើងទៅ ហើយខ្លឹមភាគច្រើនមាននៅគល់ និងខ្លះមាននៅកណ្ដាលដើម ឬមែកឈើ។ លោក ទុយ វណ្ណៈ ម្ចាស់ដើមចន្ទន៍ក្រស្នា បានបន្តថា ខ្លឹមចន្ទន៍ក្រស្នា មានច្រើនប្រភេទ ហើយតម្លៃរបស់វាក៏ខុសគ្នាផងដែរ។ ដោយឡែក លោក ទុយ វណ្ណ បានលក់ខ្លឹមចន្ទន៍ក្រស្នា ២ដងរួចមកហើយ ដោយលក់ឲ្យឈ្មួញថៃ។
បើតាមលោក វណ្ណៈ ដើមចន្ទន៍ក្រស្នាខ្លះ មានខ្លឹមចំនួន ១គីឡូ និងដើមខ្លះទៀតមានខ្លឹមត្រឹមតែ កន្លះគីឡូតែប៉ុណ្ណោះ។ ដើម្បីបានខ្លឹមចន្ទន៍ក្រស្នា គេត្រូវកាប់វាចោល ដោយចាំងយកខ្លឹមដែលមាននៅក្នុងដើម។ ជាមួយគ្នានេះ គេអាចសម្គាល់ចំណុចមានខ្លឹម តាមរយៈចំណុចណាដែលមានស្រមោចរោម។
សម្រាប់លោក ទុយ វណ្ណៈ ដែលជាម្ចាស់ដើមចន្ទន៍ក្រស្នា និងជាមគ្គុទេសក៍ទេសចរនៅសហគមន៍ជីផាត មានគម្រោងអភិរក្សដើមចន្ទន៍ក្រស្នានេះទុក ដើម្បីឲ្យភ្ញៀវទេសចរទស្សនា និងស្វែងយល់ ជាពិសេសទាក់ទាញភ្ញៀវឲ្យមកសម្រាកលំហែកាយនៅផ្ទះស្នាក់របស់លោកផងដែរ៕
Tag:
ខ្លឹមចន្ទន៍ក្រស្នា
កោះកុង
© រក្សាសិទ្ធិដោយ thmeythmey.com
