ជាតិ
Brexit៖ មេដឹកនាំអឺរ៉ុប យល់ព្រមពន្យារពេលចាកចេញរបស់អង់គ្លេសចំនួន៦ខែទៀត
×![]()
ដោយ: តន ចាន់រិទ្ធារ៉ា
បណ្ដាមេដឹកនាំរដ្ឋសមាជិកសហភាពអឺរ៉ុប នៅថ្ងៃទី១១ ខែមេសា ឯកភាពគ្នាលើកពេលការចាកចេញពីសហភាពអឺរ៉ុបរបស់ចក្រភពអង់គ្លេសចំនួន៦ខែទៀត។ ការពន្យារពេល នឹងទុកពេលឲ្យរដ្ឋាភិបាលនាយករដ្ឋមន្ត្រី ថេរ៉េសា ដើម្បីរកផ្លូវរកការគាំទ្រពីរដ្ឋសមាជិកលើកិច្ចព្រមព្រៀងចាកចេញ បន្ទាប់ពីសមាជិកបដិសេធបីដងហើយនោះ។ អឺរ៉ុបផ្ទាល់ ក៏ចង់បានការលែងលះជាមួយអង់គ្លេសធ្វើទៅដោយស្រួលបូលដែរ ទើបលើកពេលម្ដងជាពីរដងបែបនេះ។
រដ្ឋាភិបាលអង់គ្លេស នឹងពេលដល់ថ្ងៃទី៣១ ខែតុលា ដើម្បីស្វែងរកការគាំទ្រពីសភាលើកិច្ចព្រមព្រៀងចាកចេញពីសហភាពអឺរ៉ុបមុនការចាកចេញផ្លូវការ។ នេះបើតាមលទ្ធផលកិច្ចប្រជុំរវាងនាយករដ្ឋមន្ត្រី ថេរ៉េសា ម៉េយ៍ និងមេដឹកនាំអឺរ៉ុបនៅទីក្រុងព្រុចសែលនៅថ្ងៃទី១១ ខែមេសា។ មេដឹកនាំរដ្ឋសមាជិកអឺរ៉ុប យល់ព្រមលើកពេល៦ខែទៀត ខណៈលោកស្រី ម៉េយ៍ សុំពេលត្រឹមថ្ងៃទី៣០ ខែមិថុនាដើម្បីជជែកជាមួយអ្នកនយោបាយអង់គ្លេសលើការចាកចេញនេះ។
បើតាមការព្រមព្រៀងថ្មីនេះ បើអង់គ្លសនៅតែមិនទាន់ចាកចេញពីសហភាពអឺរ៉ុបនៅថ្ងៃទី២២ ខែឧសភាទេ អង់គ្លេសនឹងត្រូវចូលរួមការបោះឆ្នោតសមាជិកសភាអឺរ៉ុបនៅថ្ងៃទី២៣ ខែឧសភា តែបើមិនចូលរួមក្នុងការបោះឆ្នោតទេ ត្រូវចេញពីអឺរ៉ុបដោយគ្មានកិច្ចព្រមព្រៀងនៅថ្ងៃទី១ ខែមិថុនា។ ជាមួយពេលពេលវេលានេះ លោកស្រី ម៉េយ៍ ប្រកាសថា នឹងព្យាយាមបំពេញការងារឲ្យទាន់ពេលដើម្បីទទួលបានការយល់ព្រមពីសភា ព្រោះលោកស្រីក៏ចង់ដឹកដៃអង់គ្លេសចេញឲ្យបានលឿនដែរ។
តាមពិតទៅ បើគ្មានការលើកពេលនេះទេ សមាជិកភាពរបស់អង់គ្លេសនៅសហភាពអឺរ៉ុបនៅថ្ងៃទី១២ ខែមេសាតែម្ដង។ កាលបរិច្ឆេទផ្លូវការលើកដំបូងដែលអង់គ្លេស ត្រូវចាកចេញ គឺថ្ងៃទី២៩ ខែមីនា ប៉ុន្តែដោយសារលោកស្រី ម៉េយ៍ មិនអាចទទួលបានការគាំទ្រពីសមាជិកសភាបាននោះ ទើបសុំអឺរ៉ុបពន្យារពេល។ យ៉ាងណាមិញ ក្រោយការលើកពេលម្ដងហើយនោះ នាយករដ្ឋមន្ត្រីរូបនេះនៅតែមិនអាចសុំភ្លើងខៀវពីសភាបានដដែល។
ដោយសារតែកាលៈទេសៈមិនអំណោយផល អង់គ្លេសក៏ត្រៀមខ្លួនសម្រាប់ចូលរួមការបោះឆ្នោតជ្រើសរើសសភាអឺរ៉ុបផងដែរ។ ប៉ុន្តែលោកស្រី ម៉េយ៍ សង្ឃឹមថា ប្រជាជនអង់គ្លេសនឹងមិនចាំបាច់ចូលរួមឡើយ ហើយលោកស្រីនឹងព្យាយាមបញ្ចុះបញ្ចូលសភាឲ្យយល់ព្រមលើកិច្ចព្រមព្រៀងរវាងរដ្ឋាភិបាល និងអឺរ៉ុបនៅត្រឹមថ្ងៃទី២២ ខែឧសភា។ បើតាមទីភ្នាក់ងារព័ត៌មាន AFP ការលើកពេលរបស់អឺរ៉ុប នឹងរលាយទៅវិញ បើកិច្ចព្រមព្រៀងចាកចេញត្រូវបានសភាផ្ដល់សច្ចាប័ន។
អ្វីដែលលោកស្រី ម៉េយ៍ បន្ទាប់ពីជួបមេដឹកនាំអឺរ៉ុប គឺត្រូវជួបអ្នកនយោបាយអង់គ្លេសវិញម្ដង។ លោកស្រី នឹងជជែកជាមួយមេដឹកនាំបក្សប្រឆាំង Jeremy Corbyn ដើម្បីស្វែងរកច្រកចេញ។ ប៉ុន្តែសមាជិកមានគំនិតអភិរក្សនិយមរបស់បក្សលោកស្រី បានដាក់សម្ពាធខ្លាំងលើលោកស្រី ខ្លាចក្រែងនាយករដ្ឋមន្ត្រីរូបនេះធ្វើសម្បទានដល់បក្សប្រឆាំង៕
Tag:
Brexit
អឺរ៉ុប
អង់គ្លេស
© រក្សាសិទ្ធិដោយ thmeythmey.com
