បារាំង បញ្ជូននាវាចម្បាំងឲ្យបើកកាត់ច្រកសមុទ្រតៃវ៉ាន់

អន្តរជាតិ

បារាំង បញ្ជូននាវាចម្បាំងឲ្យបើកកាត់ច្រកសមុទ្រតៃវ៉ាន់

25, Apr 2019 , 9:35 am

រូបភាព

នាវាចម្បាំងបារាំង Vendemiaire ដែលបើកកាត់ច្រកសមុទ្រតៃវ៉ាន់។ (រូបភាព India Today)

ដោយ: តន ចាន់រិទ្ធារ៉ា

នាវាចម្បាំងមួយគ្រឿងរបស់សាធារណរដ្ឋបារាំង បានធ្វើដំណើរឆ្លងកាត់ច្រកសមុទ្រតៃវ៉ាន់ ជាទីដែលភាពតានតឹងកំពុងកើតមានរវាងអាមេរិក តៃវ៉ាន់ និងចិន។ នេះបើតាមការលើកឡើងរបស់មន្ត្រីអាមេរិក។ វត្តមាននាវាចម្បាំងបារាំងក្នុងផ្លូវទឹកចង្អៀតចន្លោះចិន និងកោះតៃវ៉ាន់នេះ ពិតជាធ្វើឲ្យអាមេរិកសប្បាយចិត្តខ្លាំងព្រោះមានមិត្តភក្តិមួយទៀតចូលមកបង្ហាញសាច់ដុំរបស់ខ្លួន ប៉ុន្តែវាធ្វើឲ្យចិនខកចិត្តយ៉ាងខ្លាំង ដ្បិតបារាំងហាក់លូកដៃចូលសំណុំរឿងតៃវ៉ាន់ដែរ។

ប្រភពមន្ត្រីអាមេរិកបានទីភ្នាក់ងារព័ត៌មាន Reuters ថា នាវាចម្បាំងរបស់បារាំងបានធ្វើដំណើរកាត់ច្រកសមុទ្រតៃវ៉ាន់នៅថ្ងៃទី៦ ខែមេសាកន្លងទៅ។ នេះជារឿងកម្រមួយដែលនាវាចម្បាំងរបស់បារាំង ធ្វើដំណើរលើចម្ងាយផ្លូវវែងឆ្ងាយបែបនេះដើម្បីបើកកាត់ដែនសមុទ្រដ៏ក្ដៅគគុកមួយនេះ។ វាជាសញ្ញាបង្ហាញថា សម្ព័ន្ធមិត្តអាមេរិកកំពុងតែអនុវត្តសេរីភាពនាវាចរណ៍លើដែនទឹកអន្តរជាតិនៅក្បែរដែនគោករបស់ចិន។ សម្ព័ន្ធមិត្តអាមេរិកផ្សេងទៀត អាចដើរតាមលំនាំនេះផងដែរ។

បើតាមប្រភពព័ត៌មានដដែល នាវាចម្បាំងបារាំងមានឈ្មោះ Vendemiaire ។ ពេលធ្វើដំណើរឆ្លងកាត់ច្រកសមុទ្រតៃវ៉ាន់ នាវាបារាំងត្រូវបានតាមដានដោយយោធាចិនយ៉ាងដិតដល់។ នេះទំនងដោយសារវាជារឿងកម្រសម្រាប់វត្តមាននាវាយោធាបារាំងនៅតំបន់នោះ។

ប្រតិបត្តិការរបស់នាវាចម្បាំងបារាំង កើតឡើងចំពេលកើនឡើងភាពតានតឹងរវាងអាមេរិក និងចិននៅច្រកសមុទ្រមួយនេះ។ ចិន បង្ហាញសាច់ដុំកាន់តែច្រើនលើក និងកាន់តែធំដុំដាក់តៃវ៉ាន់ដែលខ្លួនចាត់ទុកជាខេត្តមួយមិនអាចផ្ដាច់បាន ហើយដែលត្រូវតែយកមកគ្រប់គ្រងឲ្យបាន ទោះត្រូវធ្វើសង្គ្រាមបង្ហូរឈាមក៏ដោយ។ ចំណែកអាមេរិកវិញដែលត្រូវការពារតៃវ៉ាន់នោះ បានសម្ញែងសាច់ដុំរបស់ខ្លួនក្រោមរូបភាពសេរីភាពនាវាចរណ៍នៃច្បាប់អន្តរជាតិ។

សកម្មភាពរបស់បារាំង ធ្វើឲ្យចិនក្ដៅស្លឹកត្រចៀកយ៉ាងខ្លាំង។ ចិនប្រាប់បារាំងថា ខ្លួនលុបចោលការអញ្ជើញបារាំងឲ្យចូលរួមក្នុងពិធីដង្ហែក្បួនយោធាជើងទឹកដើម្បីអបអរថ្ងៃកំណើតទ័ពជើងទឹកចិនផងដែរ។ ការដង្ហែក្បួន ធ្វើឡើងរួចហើយកាលពីថ្ងៃទី២៣ ខែមេសាកន្លងទៅ ដោយមានវត្តមាននាវាបរទេសជាច្រើនចូលរួម តែអត់មាននាវាចម្បាំងបារាំងឡើយ។ នាវាចម្បាំងឥណ្ឌា ជប៉ុន និងអូស្ត្រាលីដែលជាមិត្តរបស់អាមេរិក សុទ្ធតែមានវត្តមានទាំងអស់។

ចំណែកឯតៃវ៉ាន់វិញ ក្រសួងការពារជាតិកោះមួយនេះ មិនទើសទាល់អ្វីទាំងអស់ចំពោះវត្តមាននាវាចម្បាំងបារាំង។ អ្នកនាំពាក្យក្រសួងការពារជាតិតៃវ៉ាន់និយាយថា ច្រកសមុទ្រតៃវ៉ាន់ ជាផ្នែកមួយនៃផ្លូវសមុទ្រដ៏រវល់របស់អន្តរជាតិ ហើយវាជារឿងចាំបាច់សម្រាប់នាវាប្រទេសទាំងអស់ ធ្វើដំណើរកាត់តាមផ្លូវនេះ។ យ៉ាងណាក៏ដោយ តៃវ៉ាន់នឹងបន្តតាមដានវត្តមាននាវាចម្បាំងទាំងឡាយដែលបើកឆ្លងកាត់តំបន់សមុទ្រនេះ៕