កីឡាជាតិ
ជាតិ
ការពារជាតិស្វាគមន៍បឹងកេតល្ងាចនេះ ក្រោយជំនួបនៅកីឡដ្ឋានអគ្គិសនីកម្ពុជា និងទឹកដីមេមត់ កីឡាករ ឈិន ឈឿន (ខាងឆ្វេង) និងកីឡាករ ឃួន ឡាបូរ៉ាវី, រូបភាពពីហ្វេសប៊ុក CNCC
× ការប្រកួតក្របខណ្ឌមិត្តហ្វូនខេមបូឌានលីគសប្តាហ៍ទី៥នេះ មាន៣ប្រកួតសម្រាប់ជំនួបថ្ងៃសៅរ៍ ដោយក្រសួងការពារជាតិ បើកកីឡដ្ឋានកងយោធពលខេមរភូមិន្ទ (ស្តាតចាស់) ដើម្បីស្វាគមន៍បឹងកេតនាវេលាម៉ោង៦ល្ងាច។ រីឯម៉ោង៣ និង៣០នាទី អគ្គិសនីកម្ពុជា ទទួលក្រុមកំពូលតារាងព្រះខ័នរាជស្វាយរៀង ខណៈយុវជនបាទី ព្យាយាមរកជ័យជម្នះលើកដំបូងនៅកីឡដ្ឋានវិទ្យាល័យ ប៊ុនរ៉ានី ហ៊ុន សែន មេមត់ របស់ក្រុមខេត្តកំពង់ចាម ។
ក្រសួងការពារជាតិ Vs បឹងកេត នៅកីឡដ្ឋានស្តាតចាស់ វេលាម៉ោង៦ល្ងាច
ក្រោយយកឈ្នះក្រុមអគ្គស្នងការនគរបាលជាតិ ៤-២ ក្រសួងការពារជាតិក្លាយជាក្រុមមិនទាន់ស្គាល់ពាក្យថាបរាជ័យសម្រាប់៤ប្រកួតកន្លងមករបស់ខ្លួន។ ទ័ព រំពឹងប្រើភាពមានប្រៀបក្នុងនាមជាម្ចាស់ផ្ទះនៅថ្ងៃនេះ យកឈ្នះបឹងកេតដែលលត់កំពង់ចាម ៧-០ កាលពីសប្តាហ៍មុន ដើម្បីរក្សាកំណត់ត្រាមិនស្គាល់ចាញ់ ក៏ដូចជាប្រជែងដណ្តើមកំពូលតារាងជាមួយព្រះខ័នរាជស្វាយរៀង។ បច្ចុប្បន្នក្រសួងការពារជាតិស្ថិតនៅលេខរៀងទី២ ដោយមាន១០ពិន្ទុ ក្រោយឈ្នះ៣និងស្មើ១ ខណៈបឹងកេតស្ថិតនៅលេខ៦មាន៧ពិន្ទុក្រោយឈ្នះ២ ស្មើ១ និងចាញ់១។ ក្រុមទាំងពីរសុទ្ធស្មើ ១-១ ដូចគ្នាជាមួយអង្គរថាយហ្គឺរនាជំនួបកន្លងមក លទ្ធផលនេះអាចវាយតម្លៃបានថា ក្រុមទាំងពីរមានសមត្ថភាពប្រហាក់ប្រហែលគ្នា។
អគ្គិសនីកម្ពុជា Vs ព្រះខ័នរាជស្វាយរៀង នៅកីឡដ្ឋានអគ្គិសនីកម្ពុជា វេលម៉ោង៣:៣០នាទី
ក្រោយយកឈ្នះបឹងកេត ១-០ និងឈ្នះយុវជនអាយុក្រោម១៨ឆ្នាំបាទី ២-០ ក្រុមអគ្គិសនីកម្ពុជារងបរាជ័យយ៉ាងដំណំក្រោមថ្វីជើងវិសាខាក្នុងលទ្ធផល ៤-០ កាលពីសប្តាហ៍មុន។ ក្រុមក្រោមការដឹកនាំរបស់លោក ប្រាក់ វុទ្ធី មួយនេះ អាចបន្តប្រឈមនឹងភាពបរាជ័យនៅថ្ងៃនេះ ព្រោះព្រះខ័នរាជស្វាយរៀងត្រូវការឈ្នះដាច់ខាត ដើម្បីបន្តក្តោបក្តាប់កំពូលតារាង និងរក្សាកំណត់ឈ្នះ៥ប្រកួតជាប់គ្នា។ សម្រាប់៤ប្រកួតកន្លងមកព្រះខ័នរាជស្វាយរៀងឈ្នះទាំង៤ប្រកួត ក្នុងនោះយកឈ្នះប៉ូលិស ២-០ ក្នុងជំនួបបើកឆាក ហើយបានបន្តឈ្នះសូលទីឡូអង្គរ ១-០ ឈ្នះគីរីវង់សុខសែនជ័យ ២-០ និងឈ្នះភ្នំពេញក្រោន ៥-១។ បច្ចុប្បន្នក្រុមនេះឈរកំពូលមាន១២ពិន្ទុ ខណៈអគ្គិសនីកម្ពុជាឈរលេខរៀងទី៨មាន៦ពិន្ទុ។
កំពង់ចាម Vs យុវជនអាយុក្រោម១៨ឆ្នាំបាទី នៅកីឡដ្ឋានវិទ្យាល័យប៊ុនរ៉ានី ហ៊ុនសែន មេមត់ វេលាម៉ោង៣:៣០នាទី
ក្រោយយកឈ្នះអគ្គិសនីកម្ពុជា ១-០ នាជំនួបបើកឆាកក្រុមចំណូលថ្មីកំពង់ចាមបានរងបរាយ៉ាងជូចត់ជាបន្តបន្ទាប់ ដោយចាញ់អង្គរថាយហ្គឺរ និងក្រសួងការពារជាតិក្នុងលទ្ធផល ១១-០ ដូចគ្នា មុនបន្តចាញ់បឹងកេត ៧-០ កាលពីសប្តាហ៍មុន។ ក្រុមមានមូលដ្ឋាននៅខេត្តកំពង់ចាមមួយនេះ ទំនងជាអាចស្វែងរកជ័យជម្នះជាលើកទី២របស់ខ្លួន ពីយុវជនអាយុក្រោម១៨ឆ្នាំបាទីថ្ងៃនេះ ព្រោះ U18 បាទីជាក្រុមបាតតារាងមិនស្គាល់ពាក្យឈ្នះ ឬស្មើ។ មួយវិញទៀត ក្រុមនេះប្រើប្រាស់ធនធានកីឡាខ្មែរសុទ្ធ ពុំមានបរទេសដូចកំពង់ចាមនោះទេ៕
© រក្សាសិទ្ធិដោយ thmeythmey.com