កីឡាអន្តរជាតិ
អន្តរជាតិ
ចាបលឿង Norwich លើកពានក្របខណ្ឌ Championship
× Norwich City បានក្លាយជាម្ចាស់ជើងឯកក្របខណ្ឌ Championship ក្រោយឈ្នះម្ចាស់ផ្ទះ Aston Villa ២-១ នាថ្ងៃអាទិត្យ ទី៥ ខែឧសភា ស្របពេល Sheffied United ដែលជាគូប្រជែងដ៏សំខាន់បញ្ចប់ក្នុងលទ្ធផលស្មើ ២-២ នៅទឹកដីរបស់ Stoke City។
ចាបលឿង Norwich ទទួលបានពិន្ទុសរុប៩៤ ខណៈ Sheffied United មាន៨៩ពិន្ទុ ប៉ុន្តែក្រុមទាំងពីរត្រូវដឹកដៃគ្នាឡើងទៅកាន់ក្របខណ្ឌ Premier League នារដូវកាលក្រោយ រីឯ Leeds United, West Brom, Aston Villa និង Derby County ត្រូវប្រកួត Playoff សម្រាប់កៅអីមួយទៀតទៅកាន់ក្របខណ្ឌកំពូល។
Norwich, Sheffield United និងក្រុមដែលជាប់ Playoff មួយទៀត ត្រូវជំនួស Cardiff City, Fulham និង Huddersfield Town ដែលបានធ្លាក់ចេញពី Premier League។ ស្របពេលជាមួយគ្នា Rotherham United, Bolton Wanderers និង Ipswich Town ត្រូវធ្លាក់ទៅលេង League One ខណៈក្រុម Luton Town, Barnsley និងក្រុមមួយទៀត នឹងត្រូវឡើងលេងនៅក្របខណ្ឌលំដាប់ទីពីរវិញ។
ខ្សែប្រយុទ្ធហ្វាំងឡង់ Teemu Pukki ដែលស៊ុតបាល់បញ្ចូលទី១គ្រាប់ក្នុងជ័យជម្នះ ២-១ របស់ Norwich លើ Aston Villa បានទទួលស្បែកជើងមាសប្រចាំ Championship ដោយរកបានសរុប២៩គ្រាប់ប្រចាំរដួវកាល៕
© រក្សាសិទ្ធិដោយ thmeythmey.com