អន្តរជាតិ
ខួបទី៣០ការបង្ក្រាបនៅធានអានមិន តៃវ៉ាន់ ចង់ឃើញប៉េកាំងដើរលើផ្លូវប្រជាធិបតេយ្យដូចខ្លួនដែរ ការធ្វើបាតុកម្មនៅទីលានធានអានមិននៅឆ្នាំ១៩៨៩ ។ រូបភាព AFP
× ថ្ងៃទី៤ ខែមិថុនាស្អែកនេះ ជាខួបទី៣០នៃការបង្ក្រាបបាតុកម្មសិស្សនិស្សិតគាំទ្រប្រជាធិបតេយ្យនៅទីលានធានអានមិនពីសំណាក់រដ្ឋាភិបាលចិន។ ទីក្រុងប៉េកាំង បានព្យាយាមលុបចោលការបង្ក្រាបដ៏ឃោរឃៅពីទំព័រប្រវត្តិសាស្ត្ររបស់ខ្លួន។ កោះតៃវ៉ាន់ឯណោះវិញ បែរជាយកខួបទី៣០នេះទៅប្រាប់ចិនដីគោកឲ្យទទួលស្គាល់កំហុសរបស់ខ្លួន និងងាកទៅជំរុញកំណែទម្រង់តាមបែបប្រជាធិបតេយ្យតាមការចង់បានរបស់បាតុករកាលពី៣០ឆ្នាំមុន។
ថ្ងៃទី៤ ខែមិថុនា ឆ្នាំ១៩៨៩ យោធាចិនក្រោមបញ្ជាផ្ទាល់រដ្ឋាភិបាលបក្សកុម្មុយនីស្ត បើកការបង្ក្រាបហិង្សាលើចលនាគាំទ្រប្រជាធិបតេយ្យដឹកនាំសិស្សនិស្សិត។ ទិន្នន័យពីអង្គការសិទ្ធិមនុស្សបង្ហាញថា មនុស្សខ្ទង់ពាន់នាក់ឯណោះ បានស្លាប់ដោយសារសកម្មភាពយោធាចិន ប៉ុន្តែអាជ្ញាធរទីក្រុងប៉េកាំងមិនដែលបញ្ចេញទិន្នន័យពីជនរងគ្រោះអ្វីឡើយ។ ព្រឹត្តការណ៍ទាំងឡាយពាក់ព័ន្ធហេតុការណ៍នេះ ត្រូវបានហាមឃាត់យ៉ាងតឹងរ៉ឹងបំផុត។
ព្រឹត្តការណ៍ ជារឿងរសើបនៅប៉េកាំង តែនៅទឹកដីតៃវ៉ាន់ឯណោះវិញ វាជាអាវុធដែលទីក្រុងតៃប៉ិប្រើប្រាស់ដើម្បីវាយប្រហាររបៀបដឹកនាំរបស់បក្សកុម្មុយនីស្ត។ ក្រុមប្រឹក្សាកិច្ចការដែនគោករបស់តៃវ៉ាន់ដែលទទួលបន្ទុកការងារជាមួយប៉េកាំង បានទទូចឲ្យអាជ្ញាធរចិនដឹងកំហុសរបស់ខ្លួនទាក់ទិនព្រឹត្តការណ៍ថ្ងៃទី៤ មិថុនា ហើយជំរុញឲ្យបានសកម្មភាពកំណែទម្រង់ប្រជាធិបតេយ្យ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
យើងដាស់តឿនអាជ្ញាធរចិនឲ្យប្រឈមមុខកំហុសប្រវត្តិសាស្ត្ររបស់ខ្លួន ហើយសុំទោសឲ្យបានឆាប់តាមតែអាចធ្វើបាន។ នេះជាការបញ្ជាក់របស់ក្រុមប្រឹក្សាដដែលមុនបន្តថា ទីក្រុងប៉េកាំងបាននិយាយកុហកដើម្បីបិទបាំងព្រឹត្តការណ៍ឆ្នាំ១៩៨៩ រហូតមក ហើយនិយាយក្រឡាស់ការពិតទៀតផង។
បន្ទាប់ពីការបង្ក្រាបការធ្វើបាតុកម្មកណ្ដាលរដ្ឋធានីប៉េកាំងរួចមក បក្សកុម្មុយនីស្តចិនចាត់វិធានការគ្រប់យ៉ាងដើម្បីទប់ស្កាត់រាល់ចលនាទាមទារប្រជាធិបតេយ្យ ឬការគោរពសិទ្ធិមនុស្សអ្វីនោះ។ ស្របគ្នានឹងការទាមទារឲ្យចិនសុំទោស តៃវ៉ាន់ ក៏ស្នើឲ្យចិនបើកចំហប្រជាធិបតេយ្យ ហើយថា ខ្លួនត្រៀមជួយផងដែរ។ ក្នុងសេចក្ដីថ្លែងការណ៍ដដែល ក្រុមប្រឹក្សាកិច្ចការដីគោកបញ្ជាក់ថា តៃវ៉ាន់នឹងគាំទ្រចិនក្នុងដំណើរទៅកាន់ប្រជាធិបតេយ្យតាមគ្រប់រូបភាព។
រឿងការបង្ក្រាបនេះ រដ្ឋមន្ត្រីការពារជាតិចិន វៃ ហ្វឹងហឺ បាននិយាយថា ជារឿងត្រឹមត្រូវ។ ការថ្លែងរបស់រដ្ឋមន្ត្រីការពារជាតិចិននេះដែលធ្វើឡើងនាវេទិកាកិច្ចសន្ទនា Shangri-La កាលពីថ្ងៃទី២ ខែមិថុនា គឺជាលើករឿងកម្រ ដ្បិតមន្ត្រីចិនមិនថាតូចមិនថាធំឡើយ តែងចៀសវាងមិនសូវនិយាយអ្វីពីរឿងនេះឡើយ។ លោក វៃ ហ្វឹងហឺ និយាយការពារចំណាត់ការខ្លួនថា ក្រោយការបង្ក្រាបនៅធានអានមិន ចិនបានអភិវឌ្ឍខ្លួនយ៉ាងរហ័ស៕
Tag:
ចិន
តៃវ៉ាន់
ធានអានមិន
© រក្សាសិទ្ធិដោយ thmeythmey.com