អន្តរជាតិ
លោក ពូទីន ថា អត់បញ្ហា ទោះមិនត្រូវអញ្ជើញឲ្យចូលរួមរំឭកខួបប្រតិបត្តិការ Normandy
ប្រធានាធិបតីរុស្ស៊ី វ៉្លាឌីមៀ ពូទីន ។ រូបភាពវេបសាយប្រធានាធិបតីរុស្ស៊ី
×![]()
ដោយ: តន ចាន់រិទ្ធារ៉ា
កម្មវិធីរំឭកខួបទី៧៥ នៃប្រតិបត្តិការឡើងគោកនៅ Normandy មិនមានវត្តមានប្រធានាធិបតីរុស្ស៊ី វ្ល៉ាឌីមៀ ពូទីន ឡើយ ទោះជាអតីតសហភាពសូវៀតជាផ្នែកមួយនៃជ័យជម្នះលើពួកណាស៊ីអាល្លឺម៉ង់ក្នុងសង្គ្រាមលោកលើកទីពីរក្ដី។ យ៉ាងណាមិញ លោក ពូទីន ហាក់មិនខ្វល់ខ្វាយពីរឿងនេះឡើយ ដ្បិតម្យ៉ាងលោកក៏រវល់ផងដែរ។ 
បណ្ដាមេដឹកនាំពិភពលោកដែលជាសមាជិកក្រុមសម្ព័ន្ធមិត្តសម័យសង្គ្រាមលោកលើកទីពីរ បានជួបជុំគ្នានៅទឹកដីបារាំងដើម្បីអបអរខួបទី៧៥ នៃប្រតិបត្តិការឡើងគោកនៅ Normandy ។ ប្រតិបត្តិការនេះហើយដែលយោធាសម្ព័ន្ធមិត្តមានអាមេរិក អង់គ្លេស កាណាដា និងអូស្ត្រាលីជាដើមជួយរំដោះទឹកដីបារាំង រួចកម្ចាត់ពួកណាស៊ីចេញពីអឺរ៉ុបប៉ែកខាងលិច ខណៈកម្លាំងទ័ពក្រហមរបស់សូវៀតវាយរុញច្រានពីសមរភូមិខាងកើត។
មិនមានមុខប្រធានាធិបតីរុស្ស៊ី វ្ល៉ាឌីមៀ ពូទីន នៅទឹកដីបារាំងនឹងគេឡើយ ទោះសូវៀតមានចំណែកក្នុងការបញ្ចប់សង្គ្រាមលោកលើកទីពីរក្ដី។ ជុំវិញបញ្ហានេះ លោក ពូទីន និយាយពីទីក្រុង St Petersburg ថា វាមិនមែនជាបញ្ហាឡើយនៅពេលលោកមិនត្រូវបានអញ្ជើញឲ្យចូលរួមខួបទី៧៥ នៃប្រតិបត្តិការនៅ Normandy នោះ។ ខណៈបារាំងរៀបចំពិធីអបអរ លោក ពូទីន កំពុងចូលរួមវេទិកាសេដ្ឋកិច្ចដែលមានវត្តមានប្រធានាធិបតីចិន ស៊ី ជិនភីង ផង។
និយាយរឿងពិធីអបអរដែលប្រធានាធិបតីអាមេរិក ដូណាល់ ត្រាំ ចូលរួមដែរនោះ លោក ពូទីន លើកឡើងថា រុស្ស៊ីក៏មិនដែលអញ្ជើញនរណាឲ្យចូលរួមគ្រប់កម្មវិធីរបស់ខ្លួនឡើយ ដូចនេះលោកក៏នឹងមិនត្រូវបានអញ្ជើញឲ្យចូលរួមរាល់កម្មវិធីវិញដូចគ្នាដែរ។ «ខ្ញុំមានការងារគ្រប់គ្រាន់ហើយនៅទីនេះ»។ នេះជាការបញ្ជាក់បែបមិនខ្ចីខ្វល់របស់លោក ពូទីន នៅថ្ងៃទី៦ ខែមិថុនា ពីទីក្រុង St Petersburg ដែលផ្សាយដោយទីភ្នាក់ងារព័ត៌មាន AFP ។
តាមពិតទៅ លោក ពូទីន ក៏ធ្លាប់បង្ហាញមុខក្នុងពិធីខួបទី៧០ នៃប្រតិបត្តិការឡើងគោកនៅ Normandy ដែរ។ ប៉ុន្តែទីក្រុងមូស្គូ ហាក់មិនពេញចិត្តនឹងការចាត់ទុកប្រតិបត្តិការនេះជាកត្តាសំខាន់ក្នុងការបញ្ចប់សង្គ្រាមលោកលើកទីពីរ ហើយការលះបង់របស់កងទ័ពក្រហមមិនបានឲ្យតម្លៃខ្ពង់ខ្ពស់ទៅវិញ។ បើតាមរុស្ស៊ី កម្លាំងទ័ពសម្ព័ន្ធមិត្តបានរួមចំណែកច្រើនក្នុងជ័យជម្នះលើណាស៊ី តែបើគ្មានការលះបង់ដ៏ធំធេងរបស់សហភាពសូវៀតទេនោះ ជ័យជម្នះក៏មិនអាចកើតមានដែរ។
រុស្ស៊ីតែងចោទលោកខាងលិចថា មិនសូវឲ្យតម្លៃ ឬយល់ពីការលះបង់របស់ខ្លួនក្នុងការបញ្ចប់សង្គ្រាមលោកលើកទីពីរ ខណៈរុស្ស៊ីបានបាត់បង់ជីវិតមនុស្សប្រមាណ២៧លាននាក់ឯណោះ។ ជារៀងរាល់ឆ្នាំ រុស្ស៊ីផ្ទាល់ តែងរៀបចំយ៉ាងអធិកអធមបំផុតលើជ័យជម្នះក្នុងសង្គ្រាមលោកលើកទីពីរនៅទីលាន Red Square មិនដែលអាក់ខានឡើយ៕
Tag:
រុស្ស៊ី
វ្ល៉ាឌីមៀ ពូទីន
Normandy
© រក្សាសិទ្ធិដោយ thmeythmey.com
