ជាតិ
កម្មករ និងពលរដ្ឋជិត ២ពាន់នាក់ ចូលរួមហូប«នំបញ្ចុក» នៅវត្តជម្ពូវ័ន
× ភ្នំពេញ៖ នៅព្រឹកថ្ងៃទី ៩ មិថុនានេះ រដ្ឋបាលរាជធានីភ្នំពេញ និងអាជ្ញាធរខណ្ឌពោធិ៍សែនជ័យ បានរៀបចំពិធីទទួលទាននំបញ្ចុកជាមួយកម្មករ កម្មការីនី និងប្រជាពលរដ្ឋជិត ២ពាន់ ក្នុងបរិវេណវត្តជម្ពូវ័ន។ អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បញ្ជាក់ប្រាប់សារព័ត៌មានថ្មីៗតាមទូរសព្ទថា ការរៀបចំនេះ តបតាមការអំពាវនាវរបស់សម្ដេច ហ៊ុន សែន។
បើតាមលោក ម៉េត មាសភក្ដី អ្នកនាំពាក្យសាលារាជធានីភ្នំពេញ នៅព្រឹកនេះ លោក ឃួង ស្រេង អភិបាលរាជធានីភ្នំពេញ និងសាលាខណ្ឌពោធិ៍សែនជ័យ បានជួបសំណេះសំណាល និងរៀបចំពិធីហូបនំបញ្ចុកដល់កម្មករ កម្មការិនី និងប្រជាពលរដ្ឋ ទទួលជិត ២ពាន់នាក់។ ជាមួយគ្នានេះ នៅព្រឹកថ្ងៃដដែលនេះ លោក ឃួង ស្រេង ក៏បានរៀបចំនំបញ្ចុកដល់អ្នកធាក់ស៊ីក្លូ និងមន្ត្រីសាលារាជធានីភ្នំពេញប្រមាណ ៣០០នាក់ នៅសាលារាជធានីភ្នំពេញផងដែរ។
ទំព័រហ្វេសប៊ុកផ្លូវការរបស់សាលារាជធានីភ្នំពេញ បានលើកឡើងយ៉ាងដូច្នេះ៖ «ការជួបជុំទទួលទាននំបញ្ចុកជាមហាគ្រួសារខ្មែរនាពេលនេះ បានបង្ហាញឲ្យឃើញពីសាមគ្គីភាព មិត្តភាព ការលើកស្ទួយផលិតផលខ្មែរ ដែលនំបញ្ចុកនេះ គឺជាអាហាររបស់ខ្មែរមួយប្រភេទដ៏ពេញនិយមនៅគ្រប់តំបន់ដោយប្រជាពលរដ្ឋ ចូលចិត្តទទួលទានបំផុតមិនថា ទទួលទានជាប្រចាំថ្ងៃ ឬពេលមានបុណ្យទាន ម្តងៗនោះទេ គេតែងរៀបចំនំបញ្ចុកមកទទួលភ្ញៀវជាធម្មតានិងដោយក្តីរីករាយ»។
ក្រៅពីសាលារាជធានីភ្នំពេញ វិមានឈ្នះឈ្នះ, ទីស្នាក់ការគណបក្សប្រជាជនកម្ពុជា, តាមខណ្ឌសង្កាត់ និងទីតាំងមួយចំនួនទៀត ក៏បានរៀបចំពិធីទទួលទាននំបញ្ចុកនៅថ្ងៃទី ៩ មិថុនាផងដែរ។ សូមបញ្ជាក់ថា ក្នុងពិធីចែកសញ្ញាបត្រដល់និស្សិតសាកលវិទ្យាល័យភ្នំពេញ កាលពីថ្ងៃទី ៣ មិថុនាកន្លងទៅ សម្ដេចនាយករដ្ឋមន្ត្រី ហ៊ុន សែន បានប្រកាសឲ្យសមាជិក សមាជិកា និងមន្ត្រីគណបក្សខ្លួនទាំងអស់ រៀបចំកម្មវិធីបរិភោគនិងចែកនំបញ្ចុក ដល់ប្រជាពលរដ្ឋនៅតាមមូលដ្ឋាន នៅថ្ងៃទី៩ មិថុនា៕
រូបភាពពីរដ្ឋបាលរាជធានីភ្នំពេញ
Tag:
នំបញ្ចុក
កម្មករ
ពលរដ្ឋ
© រក្សាសិទ្ធិដោយ thmeythmey.com