ជាតិ
អាជ្ញាធរស្រុកប្រាសាទបាគង ចុះបិទការដ្ឋានជីកដីមួយកន្លែង ដែលគ្មានច្បាប់អនុញ្ញាត រូបភាពពីរដ្ឋបាលខេត្តសៀមរាប
× មន្រី្តមន្ទីររ៉ែនិងថាមពលខេត្តសៀមរាប និងអាជ្ញាធរ បានចុះបិទការដ្ឋានជីករណ្ដៅដីមួយកន្លែង ដែលគ្មានច្បាប់អនុញ្ញាត នៅភូមិអន្លង់ពីរ ឃុំត្រពាំងធំ ស្រុកប្រាសាទបាគង ខេត្តសៀមរាប។ នេះបើតាមការចេញផ្សាយរបស់អគ្គស្នងការដ្ឋាននគរបាលជាតិ។
លោក សូរ ប្លាតុង អភិបាលស្រុកប្រាសាទបាគង បានឲ្យដឹងថា រដ្ឋបាលស្រុក បានឲ្យមន្រី្តជំនាញ ចុះផ្អាកអាជីវកម្មជីកដីខុសច្បាប់នេះ ចំនួន២លើករួចមកហើយ និងជំរុញឲ្យម្ចាស់អាជីវកម្មនេះ អនុវត្តឲ្យត្រឹមត្រូវតាមធ្វើច្បាប់។ ប៉ុន្តែម្ចាស់អាជីវកម្មនេះ មិនគោរពតាមការហាមឃាត់ ហើយនៅតែបន្តជីកដដែល រហូតដល់ថ្ងៃទី១កក្កដានេះ កម្លាំងជំនាញនិងអាជ្ញាធរមូលដ្ឋាន បានចុះបិទការដ្ឋាន ដើម្បីអនុវត្តតាមនីតិវិធីច្បាប់។
ទន្ទឹមនឹងនេះ អាជ្ញាធរបានចុះពិនិត្យបច្ចេកទេសលើរណ្ដៅដី ដែលមានផ្ទៃដីជាង១២ពាន់ម៉ែត្រការ៉េ មាន២ជម្រៅ ក្នុងនោះជម្រៅ៤ម៉ែត្រ និង៩ម៉ែត្រ។ សមត្ថកិច្ច បានឃាត់គ្រឿងចក្រកាយដីអេស្កាវ៉ាទ័រ៤គ្រឿង និងរថយន្តដឹកដី៤គ្រឿង។ បន្ទាប់មកសមត្ថកិច្ច បានចុះបិទលិខិតលើគ្រឿងចក្រខាងលើមិនឲ្យធ្វើសកម្មភាពបន្ត និងដោះស្រាយតាមច្បាប់ជាមួយម្ចាស់អាជីវកម្ម។
សូមបញ្ជាក់ថា ការដ្ឋានជីកដីក្នុងស្រុកប្រាសាទបាគង មាន៤កន្លែង ដោយក្នុងនោះ មានច្បាប់អនុញ្ញាត៣កន្លែង។
© រក្សាសិទ្ធិដោយ thmeythmey.com