អន្តរជាតិ
រូបភាព៖ BBC
×![]()
កង្កែបជាប្រភេទសត្វដែលរស់នៅក្នុងទឹកផង និងលើគោកផង (Amphibian)។ យោងទៅតាមការស្រាវជ្រាវថ្មីមួយ ពពួកបាក់តេរីដែលរស់នៅលើស្បែករបស់កង្កែបអាចជួយការពាររាងកាយរបស់វាពីជំងឺឆ្លងផ្សេងៗដែលបង្កដោយវីរុសគ្រោះថ្នាក់បាន។
ការសិក្សាស្រាវជ្រាវមួយដែលបានធ្វើឡើងដោយក្រុមអ្នកវិទ្យាសាស្ត្រនៅឯសាកលវិទ្យាល័យ Exeter និងសហគមន៍សួនសត្វមួយនៅទីក្រុងឡុងដ៏បានជួយសង្គ្រោះប្រភេទភាវៈរស់ផ្សេងៗដូចជាកង្ហែប European common frog ឱ្យរួចផុតពីការញាំញីដល់អាយុជីវិតដែលបង្កឡើងដោយជំងឺផ្សេងៗ។
បើតាមសារព័ត៌មានអង់គ្លេស BBC នាពេលបច្ចុប្បន្ននេះ ពពួកសត្វថលជលិក (Amphibians) កំពុងទទួលរងការគំរាមកំហែងយ៉ាងធ្ងន់ធ្ងរពីបម្រែបម្រួលនៃធម្មជាតិសកល។ ប្រមាណ៤០%នៃភាវៈរស់ប្រភេទនេះបានប្រឈម នឹងការស្លាប់ដោយសារប៉ាតូសែនដែលជាភ្នាក់ងារចម្លងរោគ គួបផ្សំជាមួយការបាត់បង់លំនៅស្ថាន និងផ្លាស់ប្តូរអាកាសធាតុជាដើម។
នៅក្នុងការស្រាវជ្រាវ ក្រុមអ្នកវិទ្យាសាស្ត្រអង់គ្លេសបានតាមដានមើលពីរបៀបដែលសត្វកង្កែបបន្ស៊ាំខ្លួនជាមួយនឹងវីរុសឈ្មោះ Ravavirus ដែលអាចសម្លាប់ចំនួនកង្កែបដ៏ច្រើនក្នុងរយៈពេលដ៍ខ្លីនៅតាមស្រះទឹកនានាក្នុងប្រទេសអង់គ្លេស។ ជាលទ្ធផល ពួកគេបានរកឃើញទំនាក់ទំនងរវាងការរីករាលដាលនៃជំងឺ និងការលេចឡើងនៃបាក់តេរីនៅលើស្បែកកង្កែបនៅក្នុងពពួកខុស គ្នាៗនៅភាគខាងត្បូងនៃអង់គ្លេស។
លោកបណ្ឌិត Lewis Campbell មកពីសាកលវិទ្យាល័យ Exerter បានលើកឡើងថាការពិសោធបានបង្ហាញឱ្យឃើញពីទំនាក់ទំនងយ៉ាងជិតស្និតនៅក្នុងស្ថានប្រព័ន្ធមួយ រវាងពពួកភាវៈរស់ដែលមានជំងឺ ពពួកភាវៈរស់ដែលគ្មានជំងឺ ហើយនិងល្បាយនៃបាក់តេរីនៅលើស្បែករបស់ភាវៈរស់។ លោកបានបន្តថា “ល្បាយនៃបាក់តេរីទាំងនោះគឺជារបាំងការពារយ៉ាងសំខាន់សម្រាប់ទប់ទល់នឹងវីរុសដែលជាភ្នាក់ងារបង្ករោគដ៏កាចសាហាវ”។
នៅក្នុងការស្រាវជ្រាវរបស់ខ្លួន ក្រុមអ្នកវិទ្យាសាស្ត្ររំពឹងថាការងារពួកគេនឹងអាចជួយសង្គ្រោះអម្បូរកង្កែបដែលគេឧស្សាហ៍ជួបប្រទះបំផុតនៅតាមស្រះឬត្រពាំងនានានៅក្នុងប្រទេសអង់គ្លេស៕
ដោយ៖ យ៉ន សុខន
© រក្សាសិទ្ធិដោយ thmeythmey.com
