ជាតិ
App «Kingdom of Wonder» ផ្សព្វផ្សាយគោលដៅទេសចរណ៍តាមប្រព័ន្ធឌីជីថល
× ភ្នំពេញ៖ កម្ពុជាបានប្រកាសដាក់ឱ្យប្រើប្រាស់ App «Kingdom of Wonder» ជាផ្លូវការនៅលើទូរស័ព្ទដៃឬ Mobile Application ដើម្បីផ្សព្វផ្សាយគោលដៅទេសចរណ៍របស់កម្ពុជា តាមប្រព័ន្ធឌីជីថល ទៅកាន់ទីផ្សារទេសចរណ៍ពិភពលោក ឱ្យកាន់តែមានសក្កានុពលបន្ថែមទៀត។
លោក គុជ បញ្ញាសា អនុរដ្ឋលេខាធិការក្រសួងទេសចរណ៍ បាននិយាយដូច្នេះ App «Kingdom of Wonder» នៅលើទូរសព្ទដៃនេះ គឺអាចឱ្យពលរដ្ឋ ពិសេសទេសចរជាតិ-អន្តរជាតិទាញយក (Download ) ដោយឥតគិតថ្លៃ នៅក្នុងប្រព័ន្ធប្រតិបត្តិការ IOS (App Store) និងក្នុងប្រព័ន្ធប្រតិបត្តិការ Android (Play Store)។
ពិធីប្រកាសឱ្យប្រើប្រាស់Appនេះ នៅថ្ងៃទី១៦កក្កដា ឆ្នាំ២០១៩ នៅសណ្ឋាគារសុខា ខេត្តសៀមរាប ក្រោមអធិបតីភាព លោក គុជ បញ្ញាសា អនុរដ្ឋលេខាធិការក្រសួងទេសចរណ៍
បើតាមលោក គុជ បញ្ញាសា App «Kingdom of Wonder» គឺជាបណ្តុំព័ត៌មានទេសចរណ៍សំខាន់ៗរបស់កម្ពុជា រួមមានគោលដៅទេសចរណ៍ ព្រឹត្តិការណ៍ទេសចរណ៍ ផែនទីទេសចរណ៍ ជើងហោះហើរ អាកាសធាតុ ភោជនីយដ្ឋាន កន្លែងស្នាក់នៅ មធ្យោបាយធ្វើដំណើរក្នុងស្រុក និងព័ត៌មានសំខាន់ៗដទៃទៀត ដែលផ្តល់ភាពងាយស្រួលក្នុងការស្វែងរកព័ត៌មាន និងគ្រប់ជ្រុងជ្រោយសម្រាប់ភ្ញៀវទេសចរ ដែលមានបំណងមកកម្សាន្តនៅកម្ពុជា ទាំងពេលបច្ចុប្បន្ន និងអនាគត។
ថ្លែងក្នុងពិធីប្រកាសឱ្យប្រើប្រាស់ Appនេះ នៅថ្ងៃទី១៦កក្កដា នាខេត្តសៀមរាប ក្រសួងទេសចរណ៍ សង្ឃឹមថា ទេសចរជាតិ-អន្តរជាតិ និងក្រុមហ៊ុនទេសចរណ៍ទាំងអស់មានភាពងាយស្រួល ក្នុងការស្វែងរកពត៌មានទេសចរណ៍ ដើម្បីសម្រេចនូវកំណើនទេសចរអន្តរជាតិ៦,៦លាននាក់ក្នុងឆ្នាំ២០១៩ និងជាង៧លាននាក់ នៅឆ្នាំ២០២០។
ក្នុងឆ្នាំ២០១៨ កម្ពុជាទទួលបានទេសចរអន្តរជាតិ ៦,២លាននាក់ ក្នុងកំណើន១០,៧ភាគរយ។ ដោយឡែកត្រីមាសទី១ ឆ្នាំ២០១៩ កម្ពុជាទទួលបានទេសចរអន្តរជាតិ ១,៨៧លាននាក់ កើនឡើង ៩,៧ភាគរយ៕
© រក្សាសិទ្ធិដោយ thmeythmey.com