អន្តរជាតិ
រដ្ឋាភិបាលសិង្ហបុរី ដាស់តឿនមន្ត្រីរដ្ឋឲ្យប្រកាន់លក្ខណៈសម្បត្តិបីយ៉ាងដើម្បីឲ្យស្ថាប័នសាធារណរីកចម្រើន
× រដ្ឋាភិបាលសិង្ហបុរី បានក្រើនរម្លឹកដល់មន្ត្រីស៊ីវិល ដែលបម្រើការងារក្នុងវិស័យសាធារណៈឲ្យមានការត្រៀមលក្ខណៈទុកជាមុនសម្រាប់ការអភិវឌ្ឍប្រទេស ជាពិសេសនោះវិស័យនេះនារយៈពេល៥ទសវត្សរ៍ខាងមុខ។ រដ្ឋាភិបាលនៃប្រទេសលេចធ្លោទាំងក្នុងតំបន់ និងក្រៅតំបន់មួយនេះ ចង់ឲ្យមន្ត្រីសាធារណៈប្រកាន់ខ្ជាប់លក្ខណៈសម្បត្តិបីយ៉ាង ក្នុងទស្សនវិស័យអភិវឌ្ឍរយៈពេលវែងរបស់ប្រទេស។
រដ្ឋមន្ត្រីទទួលបន្ទុកសេវាសាធារណៈសិង្ហបុរី លោក Chan Chun Sing នៅថ្ងៃ១៩ កក្កដា នាកម្មវិធីផ្តល់ពានរង្វាន់ និងការលើកទឹកដល់ភ្នាក់ងារនិងមន្ត្រីសាធារណៈប្រចាំឆ្នាំ បានជំរុញទឹកដល់មន្ត្រីសាធារណៈទាំងអស់ជួយគិតគូរដល់អនាគតរបស់ប្រទេស សម្រាប់អ្នកជំនាន់ក្រោយក្នុងរយៈពេល៥០ឆ្នាំទៅមុខទៀត។
តាមការចុះផ្សាយរបស់សារព័ត៌មានសិង្ហបុរី Straits Times ដើម្បីធានាពីវឌ្ឍនាភាពនៃវិស័យសាធារណៈនៅ៥០ឆ្នាំខាងមុខ លោករដ្ឋមន្ត្រី មើលឃើញថា មន្ត្រីស៊ីវិល ត្រូវមានលក្ខណៈសម្បត្តិបីយ៉ាង។ ទីមួយ មន្ត្រីរដ្ឋការ ដែលជាអ្នកប្រតិបត្តិការងារផ្ទាល់ជាមួយប្រជាជន ត្រូវប្រើបេះដូងដើម្បីឈ្វេងយល់ពីការគំរាមកំហែង ក្តីបារម្ភ និងសេចក្តីប្រាថ្នាពិតប្រាកដរបស់ប្រជាជនសិង្ហបុរី។
លោករដ្ឋមន្ត្រី អះអាងថា វិស័យសាធារណៈត្រូវបានបង្កើតឡើង គឺដើម្បីបម្រើប្រទេស និងប្រជាជនសិង្ហបុរី ដែលចំណុចនេះ លោក ក៏ចង់ឲ្យមន្ត្រីសាធារណៈ បង្ហាញពីភាពនាំមុខ និងគំរូល្អសម្រាប់ប្រជាជនផងដែរ។
សម្រាប់លក្ខណៈសម្បត្តិទី២វិញ លោក Chan ដែលជារដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីផងនោះ បានអះអាងថា ជំហានបន្តសម្រាប់មន្ត្រីសាធារណៈ គឺមិនមានធ្វើការកាន់តែច្រើន និងឲ្យកាន់តែល្អសម្រាប់ប្រជាជននោះទេ តែធ្វើការឲ្យកាន់ល្អជាមួយនឹងប្រជាជន។
លក្ខណៈសម្បត្តិទី២នេះ គឺជាផ្នែកមួយនៃគោលនយោបាយអ្នកដឹកនាំបន្ទាប់របស់សិង្ហបុរី ដែលប្តេជ្ញាយកប្រជាជនធ្វើជាដៃគូក្នុងការបង្កើត និងអនុវត្តគោលនយោបាយដើម្បីអនាគតរបស់ប្រទេសក្នុងរយៈពេលវែង។ ការប្រកាន់ខ្ជាប់គោលការណ៍គិតគូរទុកជាមុនសម្រាប់បញ្ហាប្រឈមថ្ងៃស្អែក គឺជាលក្ខណៈសម្បត្តិទី៣ ដែលលោករដ្ឋមន្ត្រីមន្ត្រី ចង់ឲ្យមន្ត្រីសាធារណៈមាននៅក្នុងខ្លួនផងដែរ។
ជាមួយនឹងការផ្តល់អនុសាសន៍នេះ លោករដ្ឋមន្ត្រី បានអះអាងថា សេវាសាធារណៈ នៃបណ្តាប្រទេសមួយចំនួនរបស់ពិភពលោក ប្រៀបដូចទៅនឹង«អ្នកពន្លត់អគ្គិសភ័យ» ពោលគឺពួកគេ ធ្វើការតែនៅពេលដែលមានភ្លើងឆេះប៉ុណ្ណោះ។ ក៏ប៉ុន្តែនៅសិង្ហបុរី លោករដ្ឋមន្ត្រី ចង់ឲ្យមន្ត្រីសាធារណៈទាំងអស់ធានាថា ពួកគេ បាននៅគ្រប់ស្ថានភាពដើម្បីការពារ និងទប់ស្កាត់ មុនពេលដែលអគ្គិសភ័យ ចាប់ផ្តើម៕
© រក្សាសិទ្ធិដោយ thmeythmey.com