ជាតិ
សង្គមជាតិ
រាជអាវុធហត្ថបំភ្លឺថា ចាប់អ្នកកាសែតនិងពលរដ្ឋ៧នាក់ ព្រោះជាបទល្មើសជាក់ស្តែងពាក់ព័ន្ធនឹងដីធ្លី
× ថ្មីៗនេះ កម្លាំងកងរាជអាវុធហត្ថខេត្តព្រះសីហនុ បានឃាត់ពលរដ្ឋ៥នាក់ និង អ្នកកាសែត២នាក់ ពាក់ព័ន្ធនឹងជម្លោះដីធ្លីមួយកន្លែងក្នុងក្រុងព្រះសីហនុ។ លោក សាន្ត ប៊ុនធឿន ចាងហ្វាងកាសែតសំឡេងស្នេហាជាតិ បានផ្សាយផ្ទាល់ (Live) តាមហ្វេសប៊ុក ដោយបានរិះគន់ខ្លាំងៗ លើលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ចំពោះការចាប់ពលរដ្ឋនិងអ្នកកាសែត។
អ្នកស្រីឧត្តមសេនីយ៍ត្រី ប្រាក់ ប៊ុណ្ណា អ្នកនាំពាក្យរងកងរាជអាវុធហត្ថលើផ្ទៃប្រទេស បានចាត់ទុកការរិះគន់របស់លោក សាន្ត ប៊ុនធឿន ថាជាការប្រមាថលើលោក ហេង ប៊ុនទី។ អ្នកស្រី ឆ្លើយទៅលោក សាន្ត ប៊ុនធឿន ថា ការឃាត់ខ្លួនមនុស្សទាំង៧នាក់នោះ គឺធ្វើឡើងតាមពាក្យបណ្តឹងរបស់ក្រុមមេធាវី ដែលការពារក្តីឲ្យពលរដ្ឋម្នាក់ឈ្មោះ ខូវ សម្បត្តិ។ អ្នកស្រី បន្តថា ពេលនោះ ពលរដ្ឋទាំង៥នាក់ កំពុងប្រមូលផ្តុំគ្នា ហើយហាមឃាត់គ្រឿងចក្រ ដែលកំពុងឈូសឆាយលើដីកម្មសិទ្ធិរបស់លោក ខូវ សម្បត្តិ។
អ្នកស្រី ប្រាក់ ប៊ុណ្ណា រៀបរាប់ថា អ្នកទាំង៥ បានគំរាមទារប្រាក់២៥០ដុល្លារក្នុង១ម៉ែត្រការ៉េ ពីលោក ខូវ សម្បត្តិ បើចង់បន្តឈូសឆាយនិងសាងសង់លើដីនោះ។ បើតាមអ្នកស្រី អ្នកទាំង៥ បានទាក់ទងអ្នកកាសែត២នាក់ គឺ លោក ហ៊ុន សុខា ប្រធានក្លិបអ្នកកាសែតឯករាជ្យ និង លោក កែវ រតនា ចាងហ្វាងកាសែត NTV ឲ្យទៅជួយផ្សព្វផ្សាយ។
អ្នកស្រី អះអាងថា ការផ្សាយនោះ គឺមានលក្ខណៈញុះញង់ ដែលធ្វើឲ្យមហាជនមានការភាន់ច្រឡំទៅលើលោក ខូវ សម្បត្តិ ជាម្ចាស់ដីធ្លីស្របច្បាប់។ តាមរយៈសេចក្តីប្រកាសព័ត៌មាន ដែលចេញនៅថ្ងៃទី២២ ខែកក្កដា ឆ្នាំ២០១៩នេះ អ្នកនាំពាក្យរងកងរាជអាវុធហត្ថ បញ្ជាក់ដូច្នេះថា៖«ដោយករណីខាងលើ ជាបទល្មើសជាក់ស្តែង ទើបកងកម្លាំង ឃាត់បុគ្គលទាំង៧នាក់នោះ»។
លោក សាន្ត ប៊ុនធឿន ពុំបានសុំទោសលោក ហេង ប៊ុនទី ឡើយ តែលោក បានផ្ញើលិខិតសុំទោស ទៅកាន់លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងសុំកែប្រែកំហុស។ លោក ប្រាប់ត្រង់ៗថា លោក មិនសូវយល់ច្បាស់ពីការអនុវត្តច្បាប់របស់កងរាជអាវុធហត្ថ។
ចាងហ្វាងកាសែតរូបនេះ សារភាពដូច្នេះថា៖«ការផ្សាយផ្ទាល់របស់ខ្ញុំ ពិតជាបានធ្វើឲ្យប៉ះពាល់យ៉ាងខ្លាំងដល់កិត្តិយស និងសេចក្តីថ្លៃថ្នូររបស់កងរាជអាវុធហត្ថ ព្រមទាំងធ្វើឲ្យមហាជនមានការយល់ច្រឡំយ៉ាងធ្ងន់ធ្ងរ»។
សូមបញ្ជាក់ថា មនុស្សទាំង៧នាក់ខាងលើ កំពុងស្ថិតក្រោមចំណាត់ការបស់តុលាការខេត្តព្រះសីហនុ។ អ្នកកាសែតទាំង២នាក់ ត្រូវចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ និង ញុះញង់ឲ្យប្រព្រឹត្តតាមផ្លូវសារព័ត៌មាននិងសមគំនិតក្នុងអំពើហិង្សាលើអ្នកកាន់កាប់អចលនវត្ថុដោយសុចរិត។ ឯ ពលរដ្ឋទាំង៥នាក់ ត្រូវចោទពីបទប្រើអំពើហិង្សាលើអ្នកកាន់កាប់អចលនវត្ថុដោយសុចរិត បទញុះញង់អោយប្រព្រឹត្តបទឧក្រិដ្ឋជាអាទិ៍ និង បទគំរាមយកប្រាក់៕
Tag:
កងរាជអាវុធហត្ថ
ប្រាក់ ប៉ុណ្ណា
សាន្ត ប៊ុនធឿន
ដីធ្លី
© រក្សាសិទ្ធិដោយ thmeythmey.com