ជាតិ
សង្គមជាតិ
សមត្ថកិច្ច ដុតកម្ទេចរថយន្តដឹកឈើជាង៩០គ្រឿងហើយ និងរឹបអូសឈើជាង២ពាន់ម៉ែត្រគីប
រូបភាពពីលោក អេង ហ៊ី
×![]()
ដោយ: ថ្មីៗ
ក្រោយដាក់ចេញវិធានការក្តៅ កងកម្លាំងនៃគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ បានដុតកម្ទេចប្រភេទរថយន្តផ្សេងៗជាង៩០គ្រឿងហើយ ដែលឈ្មួញ កែច្នៃ សម្រាប់លួចដឹកឈើ។ នេះបើតាមឧត្តសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ។ 
លោក អេង ហ៊ី ប្រាប់សារព័ត៌មានថ្មីៗតាមទូរសព្ទ នៅរសៀលថ្ងៃទី២៣ ខែកក្កដា ឆ្នាំ២០១៩ ថា ប្រភេទរថយន្តដែលកែច្នៃទាំងនោះ មានដូចជា ប៉ាកុង សាំយ៉ុង និង ឡុងគ្រីស័រ ជាដើម។ លោក បន្ថែមថា ក្រៅពីរថយន្ត នៅមានម៉ូតូកែច្នៃមួយចំនួនទៀត ក៏ត្រូវបានដុតកម្ទេចចោលដែរ។
បើតាមអ្នកនាំពាក្យ កងកម្លាំង បានរឹបអូសឈើជាង២ពាន់ម៉ែត្រគីប និងបានចាប់ឈ្មួញ៤នាក់ហើយ ក្នុងរយៈពេល នៃការដាក់ចេញវិធានការក្តៅនេះ។ លោក អះអាងថា ឈើដែលរឹបអូសបាន ត្រូវបានរក្សាទុក នៅរដ្ឋបាលព្រៃឈើ។ លោក លើកឡើងថា បទល្មើសព្រៃឈើទាំងនេះ កើតនៅខេត្តមណ្ឌលគិរីច្រើនជាងគេ។
នៅដើមខែកក្កដា ឆ្នាំ២០១៩នេះ គណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ បានដាក់ចេញវិធានការថ្មីមួយ ដោយប្រកាសថា ធម្យោបាយផ្សេងៗ ដូចជា រថយន្ត គោយន្ត និង ម៉ូតូ ជាដើម ដែលប្រើប្រាស់សម្រាប់ដឹកឈើខុសច្បាប់ នឹងត្រូវដុតកម្ទេចចោល ពេលចាប់បាន។
ក្រោយមក លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ បានសម្រួលវិធានការនេះបន្តិចវិញ ដោយបញ្ជាទៅកងកម្លាំងនិងមន្ត្រីរបស់លោក ឲ្យរក្សាទុកឈើ និងរថយន្តដែលនៅមានគុណភាព សម្រាប់ប្រើប្រាស់វិញ ដោយមិនត្រូវដុតកម្ទេចចោលឡើយ។ ប៉ុន្តែ ចំពោះរថយន្តកែច្នៃសម្រាប់ដឹកឈើ ដូចជា រថយន្តប៉ាកុងជាដើម លោក នៅតែឲ្យដុតកម្ទេចចោលដដែល។
លោក អេង ហ៊ី បញ្ជាក់ត្រង់ចំណុចនេះដូច្នេះថា៖«រថយន្ត ដែលនៅប្រើបាន និង រថយន្តនៅថ្មីនិងធម្មតា ដែលមិនទាន់កែច្នៃ គឺយើងរក្សាទុក។ ឯរថយន្តកែច្នៃ គឺយើង ដុតកម្ទេចចោល»៕
Tag:
អេង ហ៊ី
បទល្មើសព្រៃឈើ
កម្ទេចរថយន្តដឹកឈើ
© រក្សាសិទ្ធិដោយ thmeythmey.com
