ជាតិ
ក្រសួងអប់រំ ប្រកាសជ្រើសរើសអ្នកជំនាញអប់រំវ័យក្មេង
×
ដោយ៖ សុវណ្ណ ស្រីពេជ្រ
ភ្នំពេញ៖ ក្រសួងអប់រំ យុវជន និង កីឡា ប្រកាសជ្រើសរើស «អ្នកជំនាញអប់រំវ័យក្មេង» ជាមន្ត្រីជាប់កិច្ចសន្យារយៈពេលមួយឆ្នាំ ដើម្បីឲ្យមកបំពេញការងារដែលជួយពង្រឹងគុណភាពអប់រំវិទ្យាសាស្ត្រ និងបច្ចេកវិទ្យា។
នៅថ្ងៃទី ២៤ កក្កដា កន្លងទៅនេះ ក្រសួងអប់រំបានចេញសេចក្ដីជូនដំណឹងស្ដីពីការជ្រើសរើស អ្នកជំនាញអប់រំវ័យក្មេង ចំនួន ៩រូបលើជំនាញដូចជា៖ ការអរប់រំកុមារតូចៗ១ រូប ការអប់រំបឋមសសុក្សា១រូប ការអប់រំមធ្យមសិក្សា និងអប់រំបច្ចេកទេស១រូប ការអប់រំឧត្តមសិក្សា១រូប ការអប់រំក្រៅប្រព័ន្ធ១រូប ការអភិវឌ្ឍយុវជន១រូប ការអប់រំកាយ និងកីឡា១រូប លទ្ធកម្ម១រូប និងសំណង់១រូប។
ក្នុងនោះដែរ អ្នកជំនាញអប់រំវ័យក្មេងទាំង៩នាក់នេះ ត្រូវទទួលខុសត្រូវលើការសិក្សាស្រាវជ្រាវ ពិភាក្សាផ្ដល់យោបល់ រៀបចំរបាយការណ៍ទាក់ទងនឹងជំនាញទទួលបន្ទុកជូនថ្នាក់ដឹកនាំ លើកជាសំណើ បំពេញភារកិច្ចផ្សេងៗទៀត និងកម្រងភារកិច្ចលម្អិត ដែលនឹងមានភ្ជាប់ជូននៅពេលចុះកិច្ចសន្យា។
សេចក្ដីប្រកាសនេះបានឲ្យដឹងដែរថា បេក្ខជនទាំង៩នាក់នោះ ត្រូវតែមានសញ្ញាបត្រទាបបំផុតត្រឹមបរិញ្ញាបត្រជាន់ខ្ពស់ ជំនាញច្បាស់លាស់ខាងសរសេរអត្ថបទតាមជំនាញទទួលបន្ទុកជាខេមរៈភាសា ប្រមូលវិភាគព័ត៌មាន សម្របសម្រួល ដោះស្រាយបញ្ហាប្រកបដោយសុភនិច្ឆ័យ។ លើសពីនេះ បេក្ខភាពត្រូវមានសមត្ថភាព គ្រប់គ្រងអប់រំ ចេះច្បាប់អប់រំ ចេះភាសាអង់គ្លេស ឬភាសាបារាំងស្ទាត់ជំនាញ ហើយមានមនៈសិកាវិជ្ជាជីវៈខ្ពស់ ភាពច្នៃប្រឌិត ទំនួលខុសត្រូវខ្ពស់ ហើយត្រូវមានបទពិសោធការងារយ៉ាងតិច៣ឆ្នាំ។
ក្រសួងបញ្ជាក់ថា បុគ្គលិកអប់រំនៃក្រសួងអប់រំ យុវជន និងកីឡា នឹងមិនអនុញ្ញាតឲ្យចូលប្រឡងជ្រើសរើសឡើយ។ ដូច្នេះ បេក្ខជន-បេក្ខនារីដែលមានចំណាប់អារម្មណ៍ អាចផ្ញើលិខិតចំណាប់អារម្មណ៍ (cover letter) និងប្រវត្តិរូបសង្ខេប(CV) មកអង្គនាយកដ្ឋានអប់រំ តាមរយៈសារអេឡិចត្រូនិច
[email protected] ឬតេឡេក្រាម០៧៨ ៤៩៧ ០៧០ ចាប់ពីថ្ងៃជូនដំណឹង រហូតដល់ថ្ងៃទី ១៥ សីហា ឆ្នាំ២០១៩៕
© រក្សាសិទ្ធិដោយ thmeythmey.com