លោក នេត្រ ភក្ដ្រា៖ កម្ពុជាមានសំរាមប្រមាណ៤លានតោនក្នុងមួយឆ្នាំ

ជាតិ

សង្គមជាតិ

លោក នេត្រ ភក្ដ្រា៖ កម្ពុជាមានសំរាមប្រមាណ៤លានតោនក្នុងមួយឆ្នាំ

27, Jul 2019 , 2:54 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ សំរាមបានក្លាយជាបញ្ហាដ៏ធំមួយសម្រាប់កម្ពុជាក៏ដូចជាពិភពលោក ដ្បិតសេដ្ឋកិច្ចមានការរីកចម្រើន ហើយការផលិតសម្ភារក៏កាន់តែទំនើបនិងមានភាពងាយស្រួល។ តាមរបាយការណ៍របស់រដ្ឋលេខាធិការក្រសួងបរិស្ថាន កម្ពុជាមានសំរាមប្រមាណ៤លានតោនក្នុងមួយឆ្នាំៗ។

រដ្ឋលេខាធិការនិងជាអ្នកនាំពាក្យក្រសួងបរិស្ថាន បានឱ្យដឹងថានៅទីប្រជុំជនជារៀងរាល់ថ្ងៃបានបង្កើតសំរាមប្រមាណ១ម៉ឺនតោន ដែលសរុបប្រចាំឆ្នាំកម្ពុជាមានសំរាមប្រមាណ៤លានតោន ក្នុងនោះបរិមាណប្រមាណ៥៦ភាគរយ ត្រូវបានដឹកទៅចាក់នៅទីលានសំរាម។ បើតាមការបញ្ជាក់ពីលោក នេត្រ ភក្ដ្រា ក្នុងចំណោមកាកសំណល់ប្រមាណ៤លានតោន មាន២០ភាគរយជាសំរាមប្លាសិ្ទក ២០ភាគរយដែលគេយកមកកែច្នៃប្រើប្រាស់វិញបាន និងជិត៣០ភាគរយទៀត ត្រូវបានប្រជាពលរដ្ឋយកទៅបោះចោលនៅតាមទីសាធារណ។

ក្នុងពិធីបើកយុទ្ធនាការកាត់បន្ថយការប្រើប្រាស់ថង់ប្លាស្ទិកនិងផ្សព្វផ្សាយកន្ដ្រកបរិស្ថាន នៅផ្សារចាស់ ខេត្តសៀមរាបនៅព្រឹកថ្ងៃទី២៧ កក្កដា អ្នកនាំពាក្យក្រសួងបរិស្ថានបានបន្ថែមថា ប្រជាពលរដ្ឋនៅទីប្រជុំជនជាអ្នកផលិតសំរាមខ្ពស់ជាងគេក្នុងនោះបើតាមតួលេខ ក្នុងពលរដ្ឋម្នាក់បានបង្កើតសំរាមប្រមាណ១គីឡូក្រាមក្នុងមួយថ្ងៃ និងពលរដ្ឋនៅតាមជនបទបង្កើតសំរាមប្រមាណកន្លះគីឡូក្រាមជាប្រចាំថ្ងៃ។

តំបន់ប្រជុំជនសំខាន់ៗចំនួន៣ដែលលោក នេត្រ ភក្ដ្រា លើកមកបង្ហាញថាបានផលិតសំណល់ច្រើនប្រចាំថ្ងៃច្រើនគេ ក្នុងនោះរួមមាន រាជធានីភ្នំពេញមានសំរាមប្រមាណ៣ពាន់តោន ខេត្តព្រះសីហនុមានប្រមាណ៧០០តោន និងខេត្តសៀមរាបមានសំរាមប្រមាណ ៣៨០តោន ហើយក្នុងចំណោម៣៨០តោននេះមានប្រមាណ២៨០តោន បានដឹកយកទៅចាក់នៅទីលានសំរាម ២០ភាគរយអាចយកមកកែច្នៃបាន និង៦ភាគរយទៀតត្រូវបានបោះចោលនៅទីសាធារណ។

សំរាមប្លាស្ទិគឺជាកម្មវត្ថុដ៏សំខាន់ក្នុងយុទ្ធនាការកាត់បន្ថយការប្រើប្រាស់ប្លាស្ទិករបស់ក្រសួងបរិស្ថាន។ តាមការលើកឡើងរបស់លោក នេត្រ ភក្ដ្រា បានប៉ាន់ប្រមាណភាគរយនៃប្លាស្ទិកដែលប្រមូលបានតាមរយៈការបោះសំរាមតាមទីក្រុងជាប្រចាំថ្ងៃ នៅរាជធានីភ្នំពេញមានសំណល់ប្លាស្ទិកប្រមាណ ១៧,៣ភាគរយ សៀមរាបមានប្រមាណ ២០,៧ភាគរយ និងព្រះសីហនុមានប្រមាណ៣៤ភាគរយ។ លោក ភក្ដ្រា ពន្យល់ថា ហេតុផលដែលមានប្លាស្ទិកច្រើនបែបនេះ ដោយសារកំណើនសេដ្ឋកិច្ចមានការរីកចម្រើន សង្គមមានការចាយវាយកាន់តែច្រើន ហើយបានងាកទៅប្រើប្រាស់ផលិតផលកាន់តែងាយស្រួល តែទន្ទឹមនឹងភាពងាយស្រួលនោះ វាក៏បានបង្កផលប៉ះពាល់ដល់បរិស្ថានសង្គមធ្ងន់ធ្ងរដែលគួរឱ្យព្រួយបារម្ភផងដែរ។

យុទ្ធនាការកាត់បន្ថយការប្រើប្រាស់ប្លាស្ទិក និងផ្សព្វផ្សាយកន្ត្រកបរិស្ថាន គឺជាយុទ្ធនាការមួយរបស់ក្រសួងបរិស្ថាន ធ្វើឡើងក្នុងបំណងដើម្បីផ្សព្វផ្សាយឱ្យកាន់តែទូលំទូលាយពីការកាត់បន្ថយ និងជំរុញការអនុវត្តអនុក្រឹត្យរបស់រាជរដ្ឋាភិបាលស្ដីពីការគ្រប់គ្រងថង់ប្លាស្ទិក ជំរុញនិងលើកទឹកចិត្តអាជីវករឱ្យបញ្ឈប់ការផ្តល់ថង់ប្លាស្ទិកដោយឥតគិតថ្លៃដល់អតិថិជន លើកទឹកចិត្តឱ្យដាក់របស់របរក្នុងកន្ដ្រកបរិស្ថានតែមួយជៀសវាងការប្រើប្រាស់ថង់ប្លាស្ទិកច្រើន និងចូលរួមលើកស្ទួយជីវភាពរបស់ប្រជាពលរដ្ឋនៅតាមសហគមន៍ផលិតកន្ដ្រកកញ្ជោរ។ យុទ្ធនាការណ៍ដែលមានការចូលរួមពីអាជ្ញាធរមូលដ្ឋាននេះបានធ្វើលើតំបន់គោលដៅចំនួន៣ មានខេត្តសៀមរាប បាត់ដំបង និងព្រះសីហនុ៕