ជាតិ
នយោបាយជាតិ
ព្រះមហាក្សត្រ តែងតាំងមន្ត្រីក្រសួងការបរទេស៦រូប រាប់ពីឆ្វេងលោក កុយ គួង ទូតកម្ពុជាប្រចាំប្រទេសអូស្ត្រាលី ,លោក ប្រាក់ ងួនហុង ទូតវិសាមញ្ញ និងពេញសមត្ថភាពកម្ពុជា ប្រចាំវៀតណាម, លោក ណី សំអុល ឯកអគ្គរាជទូត តំណាងអចិន្ត្រៃយ៍កម្ពុជាប្រចាំមន្ទីរអង្គការសហប្រជាជាតិ និងលោក កែរ វិសិដ្ឋ ឯកអគ្គរាជទូតប្រចាំនៅសហព័ន្ធរុស្ស៊ី
× ភ្នំពេញ៖ មន្ត្រីការទូត៦រូប ត្រូវបានព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា តែងតាំងជាមន្ត្រីជាន់ខ្ពស់ នៃក្រសួងការបរទេស និងសហប្រតិបត្តិការអន្តរជាតិ។ នេះបើតាមព្រះរាជក្រឹត្យព្រះមហាក្សត្រ ចុះថ្ងៃទី២៥ កក្កដា។
មន្ត្រីទាំង ៦រូបនោះ មានតំណែងអនុរដ្ឋលេខាធិការ អគ្គលេខាធិការ អគ្គនាយក និងទីប្រឹក្សាក្រសួង។ ក្នុងនោះមានលោក កុយ គួង ឯកអគ្គរាជទូតកម្ពុជាប្រចាំប្រទេសអូស្ត្រាលី ត្រូវបានតែងតាំងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។
លោក កែរ វិសិដ្ឋ ឯកអគ្គរាជទូតប្រចាំនៅសហព័ន្ធរុស្ស៊ី ជាអនុរដ្ឋលេខាធិកា។ រីឯលោក ណី សំអុល ឯកអគ្គរាជទូត តំណាងអចិន្ត្រៃយ៍កម្ពុជាប្រចាំមន្ទីរអង្គការសហប្រជាជាតិ និង អង្គការអន្តរជាតិនានា ទីក្រុងហ្សឺណែវ ជាអគ្គនាយកនៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា។
ចំណែកលោក ប្រាក់ ងួនហុង ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំនៅវៀតណាម ជាអគ្គលេខាធិការ។ លោក ស៊ឹម វីរៈ ទីប្រឹក្សាក្រសួងការបរទេស និងកិច្ចសហប្រតិបត្តិការអន្តរជាតិ ជាអគ្គនាយក នៃអគ្គនាយកដ្ឋានអាស៊ាន និងលោក សុក ជា ឯកអគ្គរាជទូតកម្ពុជាប្រចាំនៅសហភាពមីយ៉ាន់ម៉ា ជាទីប្រឹក្សាក្រសួងការបរទេស និងកិច្ចសហប្រតិបត្តិការអន្តរជាតិ មានឋានៈស្មើអគ្គនាយក៕
Tag:
ព្រះមហាក្សត្រ
ការទូត
© រក្សាសិទ្ធិដោយ thmeythmey.com