សេដ្ឋកិច្ច
អត្ថបទពាណិជ្ជកម្ម
SCG បង្ហាញកំណើនពីការលក់នៅកម្ពុជា ក្នុងត្រីមាសទី២ ឆ្នាំ២០១៩
× ភ្នំពេញ៖ ក្រុមហ៊ុន SCG ដែលធ្វើអាជីវកម្មផ្នែកស៊ីម៉ងត៍ និងសម្ភារសាងសង់ នៅថ្ងៃទី២៦ ខែ កក្កដា បានចេញរបាយការណ៍អំពីប្រតិបត្តិការអាជីវកម្មរបស់ខ្លួនសម្រាប់ត្រីមាសទី២ និងឆ មាស ទី១ឆ្នាំ២០១៩។
ចំណូលពីប្រតិបត្តិការលក់របស់ SCG ជាអន្តរជាតិ ក្នុងត្រីមាសទី២ឆ្នាំ២០១៩ មានចំនួន៣,៤៥៣ លានដុល្លារ ថយចុះ ៩ភាគរយ។ សម្រាប់ឆមាសទី១ ឆ្នាំ២០១៩ ចំណូលពីការលក់បានថយចុះ ៧ភាគរយ មកត្រឹម ៧,០០៥ លានដុល្លារ ដែលមូលហេតុមួយភាគធំ គឺដោយសារតម្លៃផលិតផលគីមីធ្លាក់ចុះ។ រីឯប្រាក់ចំណេញក្នុងឆមាសទី១ ដោយមិនទាន់គិតពីការប្រែប្រួល នៃប្រាក់ដំណាច់បុគ្គលិក បានធ្លាក់ចុះ ១៦ភាគរយ មកនៅត្រឹម ៦៥៦លានដុល្លារ។
បើពិនិត្យមើលក្នុងតំបន់ ក្រុមហ៊ុននេះអះអាងថា ចំណូលពីការលក់ក្នុងត្រីមាសទី២ មានចំនួន ៨៧៨ លានដុល្លារ ដែលធ្លាក់ចុះ៧ភាគរយ។ ចំណូលក្នុងអាស៊ាននេះ ស្មើនឹង ២៥ភាគរយ នៃចំណូលសរុបពីការលក់របស់ SCG ទាំងមូល។ ចំណូលនេះ រាប់បញ្ជូលទាំងការលក់មកពីប្រតិបត្តិការក្នុងស្រុកនៅទីផ្សារអាស៊ាននីមួយៗ និងការនាំចូលពីប្រទេសថៃ។
សម្រាប់ទីផ្សារនៅកម្ពុជា ក្រុមហ៊ុន SCG នៅកម្ពុជាបានរាយការណ៍ថា ចំណូលពីការលក់ប្រចាំត្រីមាសទី២ មានចំនួន ១១៦លានដុល្លារ ដែលចំណូលនេះរាប់បញ្ចូលទាំងការលក់ពីប្រតិបត្តិការនៅក្នុងប្រទេស និងការនាំចូលពីប្រទេសថៃ ដែលកើនឡើង ១៦ភាគរយ។ សម្រាប់ឆមាសទី១ នៃឆ្នាំ២០១៩ ទីផ្សារកម្ពុជារបស់ SCG បានបង្ហាញពីចំណូលពីការលក់ចំនួន ២២៦លានដុល្លារ កើនឡើង១១ភាគរយ ដែលចំណូលមួយភាគធំ គឺបានពីធុរកិច្ចស៊ីម៉ងត៍-សម្ភារសាងសង់។ ផ្អែកលើរបាយការណ៍ត្រីមាសទី២នេះ SCGនៅកម្ពុជាមានទ្រព្យសរុប ៣៧៧លានដុល្លារ។
របាយការណ៍បានឲ្យដឹងថា SCG មានការចាប់អារម្មណ៍ខ្ពស់លើទីផ្សារកម្ពុជា ដោយក្នុងពេលថ្មីៗនេះ បានបង្កើតផលិតផលធុរកិច្ចថ្មីមួយទៀតគឺ«ដំណោះស្រាយក្នុងអគារ» ដើម្បីផ្ដល់សេវាកម្មរចនា និងសម្ភារសម្រាប់ការរចនាផ្នែកខាងក្នុងនៃអគារ ដែលធ្វើឡើងដោយអ្នកជំនាញរចនាបទដែលមានបទពិសោធខ្ពស់ សម្រាប់ទាំងសំណង់អគារលំនៅឋាន និងសំណង់អគារពាំណិជ្ជកម្ម។ ជាមួយគ្នានេះ SCG ក៏បានដាក់ចេញសេវាកម្មដំណោះស្រាយដំបូល ដែលជាសេវាកម្មតុបតែង និងដំឡើងដំបូលអគារ។
លោក Roongrote Rangsiyopash ប្រធាន និងជាអគ្គនាយក SCG បានអះអាងដូច្នេះថា៖«ទោះបីជាមានឧសគ្គខ្លះៗ រាប់តាំងពីសង្គ្រាមពាណិជ្ជកម្ម ការថមថយសេដ្ឋកិច្ចពិភពលោក ការប្រែប្រួលនៃប្រាក់បំណាច់បុគ្គលិកនៅក្នុងត្រីមាសទី២ឆ្នាំ២០១៩ និងខាតបង់ក្នុងសារពើភណ្ឌ ដែលប៉ះពាល់ដល់លទ្ធផលប្រតិបត្តិការរបស់ SCG សម្រាប់រយៈពេលត្រីមាសទី២ និងឆមាសទី១ SCG បន្តពង្រីកមុខផលិតផល និងសេវាកម្មដែលមាននវានុវត្តន៍ និងតម្លៃបន្ថែមខ្ពស់ ស្របគ្នានឹងការផ្ដល់ដំណោះស្រាយគ្រប់ជ្រុងជ្រោយដល់អតិថិជន»។ លោកបន្តដូច្នេះទៀតថា៖«ក្រុមហ៊ុនកំពុងតម្រង់ទិសគម្រោងវិនិយោគទុនធំៗ ក្នុងគោលបំណងជួយបង្កើតគុណតម្លៃធុរកិច្ច ដើម្បីសម្រេចគោលដៅដែលបានគ្រោងទុក»។
លោក Roongrote បញ្ជាក់ផងដែរអំពីការកើនឡើងនៃឱកាសនាំចេញទៅកាន់ទីផ្សារពិភពលោក។ ឧទាហរណ៍ ការនាំចេញធុរកិច្ចផលិតសម្ភារវេចខ្ចប់ទៅកាន់ប្រទេសចិន និងបណ្ដាប្រទេសនៅអាស៊ាន និងធុរកិច្ចស៊ីម៉ង់ត៍ សម្ភារសាងសង់ នាំចេញពិតាននិងជញ្ជាំងទៅកាន់ប្រទេសកូរ៉េខាងត្បូង រួមជាមួយផែនការពង្រីកទៅកាន់អឺរ៉ុបក្នុងពេលខ្លីខាងមុខនេះ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com