អន្តរជាតិ
×![]()
តារាសម្តែងជនជាតិអាមេរិក Dwayne Johnson ដែលស្គាល់ថា «The Rock» និងមិត្តស្រីលោក Lauren Hashian បានសម្រេចចិត្តរៀបអាពាហ៍ពិពាណ៍ជាផ្លូវការ បន្ទាប់ពីអ្នកទាំងពីបានរួមរស់ជាមួយគ្នាអស់រយៈពេល១២ឆ្នាំ។ គូស្វាមីភរិយា បានរៀបចំពិធីមង្គលការដ៏ភ្ញាក់ផ្អើលមួយ នៅថ្ងៃអាទិត្យ ទី១៨ សីហា ក្នុងរដ្ឋហាវ៉ៃ ។ 
មួយថ្ងៃក្រោយមក ពោលគឺនៅថ្ងៃចន្ទ ទី១៩ សីហា លោក Johnson បានបង្ហោះរូបថតពីរសន្លឹកលើគណនី Instagram លោក ដែលបង្ហាញពីទិដ្ឋភាពនៃពិធីរៀបការដ៏ពិសេសនេះ។ មិនត្រឹមតែប៉ុណ្ណោះ អតីតអត្តពលិក (កីឡាកាស) ប្រចាំសង្វៀន WWE នេះ បានសរសេរថា៖«យើងរៀបការ។ ថ្ងៃទី ១៨ ខែសីហា ឆ្នាំ២០១៩ ក្នុងរដ្ឋ ហាវ៉ៃ»។
តាមរយៈរូបថតទាំងពីរសន្លឹកនេះ កូនក្រមុំ និងកូនកំលោះ គ្រងឈុតពណ៌ស ដោយ The Rock ពាក់អាវខ្លី និងខោពណ៌ស ចំណែកកូនក្រមុំរបស់លោក Hashian ស្លៀករ៉ូបពណ៌ស ភ្លឺ។ ក្នុងរូបថតទី១ អ្នកទាំងពីរ កាន់ដៃគ្នា ហើយ Hashian លើកបាច់ផ្កាឡើងលើជាមួយទឹកមុខពោរពេញដោយក្តីរីករាយ។ ក្នុងរូបថតទី២ ពួកគេ ឱបគ្នា និងថើបគ្នា អមដោយទិដ្ឋភាពដ៏ស្រស់ស្អាតនៃផ្ទៃសមុទ្រ និងថ្ងៃរៀបលិចពណ៌មាសផងដែរ។
សូមបញ្ជាក់ថា គូស្នេហ៍នេះ បានជួបគ្នា នៅពេលលោក Johnson បានថតភាពយន្តមួយកាលពីឆ្នាំ២០០៧ ដោយមានចំណងជើងថា «The Game Plan»។ បច្ចុប្បន្ន ពួកគេ មានកូនស្រី២នាក់ ដែលក្នុងនោះម្នាក់ឈ្មោះ Tiana អាយុ ១៦ខែ និងម្នាក់ទៀតឈ្មោះ Jasmine អាយុ ៣ឆ្នាំ។ ម្យ៉ាងវិញទៀត លោក Johnson ក៏មានកូនស្រីភរិយាមុន ដែលមានឈ្មោះ Simone អាយុ ១៨ឆ្នាំ ៕
Tag:
The Rock
កម្សាន្ត
© រក្សាសិទ្ធិដោយ thmeythmey.com
