ជាតិ
បាក់ឌុប
វីដេអូ
យុវជន អុឹម ដេវីដ ប្រាប់គន្លឹះសំខាន់ៗ ដើម្បីយកអាហារូបករណ៍នៅ DMC
×
ដោយ៖ សុផល រតនៈ និង ហួ ឆេងស៊ីម
ភ្នំពេញ៖ ការប្រឡងប្រជែងយកអាហារូបករណ៍ មិនមែនជារឿងងាយស្រួល សម្រាប់សិស្សានុសិស្សឡើយ គឺទាមទារឲ្យសិស្សានុសិស្ស ត្រូវសិក្សាស្រាវជ្រាវ និងស្វែងយល់ពីអាហារូបករណ៍នីមួយៗឲ្យបានច្បាស់លាស់។ យុវជន អ៊ឹម ដេវីដ និស្សិតឆ្នាំទី ២ នៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ បញ្ជាក់ថា ដើម្បីជាប់អាហារូបករណ៍សិក្សាឥតគិតថ្លៃនៅ DMC តម្រូវឲ្យសិស្សមានចំណេះដឹងវប្បធម៌ទូទៅ, សំណេរជាភាសាខ្មែរ និងអង់គ្លេស រួមទាំងតាមដានព្រឹត្តិការណ៍ព័ត៌មានជាតិ និងអន្តរជាតិ។ ការប្រឡង នឹងប្រព្រឹត្តទៅនៅថ្ងៃទី០២ ខែតុលា នាសាកលវិទ្យាល័យភូមិន្ទភ្នំពេញ។
ដើម្បីចូលសិក្សានៅក្នុងដេប៉ាតឺម៉ង់ប្រព័ន្ធផ្សព្វផ្សាយ និងសារព័ត៌មាន សិស្សនិស្សិតត្រូវឆ្លងកាត់ការប្រឡងធ្វើតេស្ដសមត្ថភាពចំនួន២ ដំណាក់កាល។ ដំណាក់កាលទី១ គឺដំណាក់កាលសរសេរ ដែលមានមុខវិជ្ជា វប្បធម៌ទូទៅ និងភាសាអង់គ្លេស។ ដំណាក់កាលទី២ គឺដំណាក់កាលសម្ភាស ដោយបេក្ខជន និងបេក្ខនារីត្រូវជួបជាមួយសាស្ត្រាចារ្យប្រចាំ DMC និងត្រូវឆ្លងកាត់សំណួរជាច្រើន។
ដើម្បីជ្រាបព័ត៌មានបន្ថែមពីដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ សូមអញ្ជើញទស្សនាវីដេអូខាងក្រោម៖
ក្នុងមួយឆ្នាំៗ អាហារូបករណ៍សិក្សាឥតគិតថ្លៃនៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ ផ្ដល់ជូនដល់សិស្សានុសិស្សត្រឹមតែ៣០នាក់ប៉ុណ្ណោះ។ អាហារូបករណ៍សិក្សាឥតគិតថ្លៃនៅ DMC រួមមានមុខជំនាញដូចជា សារព័ត៌មាន, ទំនាក់ទំនង និងប្រព័ន្ធផ្សព្វផ្សាយ។ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ ចាប់ផ្ដើមលក់ពាក្យចាប់ពីថ្ងៃទី ១៣ សីហា និងឈប់ទទួលពាក្យនៅថ្ងៃទី ២៣ ខែកញ្ញា មុនម៉ោង១០ព្រឹក។ ដំណើរការប្រឡងវិញ្ញាសាសំណេរ នឹងចាប់ផ្ដើមនៅម៉ោង៧៖៣០-១១៖៣០ នាអាគារ T។
© រក្សាសិទ្ធិដោយ thmeythmey.com