អន្តរជាតិ
នាយករដ្ឋមន្ត្រីថៃ ប្រាយុទ្ធ ចន្ទអូចា ។ រូបភាព The Nation
×![]()
ដោយ៖ ងួន សុភាវត្តី
នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃទី២២ ខែសីហា បានបញ្ជាអោយមានការត្រួតពិនិត្យមើលឡើងវិញពីការចេញបណ្ណក្រីក្រ។ លោកបញ្ជាដូចនេះ ក្រោយមានប្រទះឃើញថា ពួកអ្នកមានមួយចំនួនក៏ទទួលបានបណ្ណសម្រាប់ប្រជាជនក្រីក្រនេះដែរ។
ក្នុងគោលដៅជួយប្រជាជនក្រីក្រពិតប្រាកដ ប្រមុខរដ្ឋាភិបាលថៃ ប្រាយុទ្ធ ចន្ទអូចា បានចេញបញ្ជាឲ្យត្រួតពិនិត្យការផ្ដល់បណ្ណក្រីក្រនេះឲ្យច្បាស់លាស់ ខណៈមានរបាយការ៍ថា បណ្ណក្រីក្រតែធ្លាក់ក្នុងដៃអ្នកមាន។
បើតាមសារព័ត៌មាន The Nation លោក ប្រាយុទ្ធ បាននិយាយថា ការចេញបណ្ណសុខុមាលភាពដែលឧបត្ថម្ភដោយរដ្ឋនេះ ត្រូវតែមានការត្រួតពិនិត្យជារៀងរាល់ឆ្នាំចាប់ពីពេលនេះតទៅ។ លោកលើកមូលហេតុថា មានការរិះគន់ថា មានម្ចាស់ដីនិងផ្ទះខ្លះដែលជាអ្នក ក៏ទទួលបានកាតទាំងអស់នេះដែរ ទោះជាកាតទាំងអស់នេះ គឺផ្តល់អោយតែអ្នកចុះឈ្មោះជាជនក្រីក្រតែប៉ុណ្ណោះ។
លោក ប្រាយុទ្ធ បានលើកឡើងថា រដ្ឋាភិបាលផ្តល់ប្រាក់ជំនួយទាំងនេះដោយផ្អែកលើគោលនយោបាយរបស់រដ្ឋាភិបាល ហើយជាពិសេសនោះគឺជួយប្រជាជននៅពេលដែលសេដ្ឋកិច្ចមានការថយចុះឬ នៅពេលដែលផលិតផលក្នុងស្រុកធ្លាក់ចុះ។
នាយករដ្ឋមន្ត្រីថៃរូបនេះ ក៏បានបន្តថា ជនដែលមិនសក្តិសមទទួលបានបណ្ណក្រីក្រ ហើយបានទទួលបណ្ណនេះគួរតែប្រគល់បណ្ណទាំងនេះដល់អ្នកដែលត្រូវការវា ដើម្បីអោយប្រាក់ពន្ធអាចប្រើប្រាស់ដោយមានតម្លាភាព៕
© រក្សាសិទ្ធិដោយ thmeythmey.com
