អត្ថបទ៖ ស៊ីធី
ម្ចាស់ខ្សែក្រវាត់លំដាប់ពិភពលោក Nong-O Gaiyanghadao បង្ហាញអំពីកម្លាំងចិត្តតាំងពីដើមរៀងមកដែលធ្វើឲ្យជោគជ័យក្រោយពេលហក់ចូលសង្វៀនប្រដាល់។ វីរបុរសរបស់ថៃនឹងចូលខ្លួនមកការពារខ្សែក្រវាត់ ONE Bantamweight Muay Thai World Title នៅសង្វៀន ONE: IMMORTAL TRIUMPH ទល់នឹង Brice Delval នាថ្ងៃទី ៦ ខែ កញ្ញា ខាងមុខដែលរៀបចំនៅប្រទេសវៀតណាម។
ដំបូងឡើយ Nong-O Gaiyanghadao កាលនៅក្មេងគ្រាន់តែមានក្ដីប្រាថ្នាសាមញ្ញៗប៉ុណ្ណោះ ប៉ុន្តែគេមានការតាំងចិត្តខ្ពស់បង្កើតភាពអស្ចារ្យ និង ជួយឲ្យគ្រួសាររបស់ខ្លួនមានជីវភាពល្អប្រសើរទៀតផង។ Nong-O មានទីកំណើតនៅភូមិតូចមួយ នៅខេត្ត Sakon Nakhon ភាគខាងជើងប្រទេសថៃ។ គ្រួសាររបស់ Nong-O មានកន្លែងហាត់ប្រដាល់តូចមួយ ហើយ គេសារភាពថាមិនមានគំនិតចង់ហាត់ឬចង់ក្លាយជាអ្នកល្បីទេ។
Nong-O រំលឹកថា៖«មុនដំបូងខ្ញុំចាប់ផ្ដើមហាត់ប្រដាល់កន្លែងតូចមួយក្បែរផ្ទះរបស់ខ្ញុំ។ មានបាវសាក់មួយ, មានហ្គង់មួយគូ និង ស្រោមដៃមួយចំនួនទៀត»។ ម្ចាស់ខ្សែក្រវាត់ពិភពលោករូបនេះចងចាំទៀតថា៖«វាជាកន្លែងហ្វឹកហាត់តូចមួយជាមួយមនុស្សពីរបីនាក់។ ពេលខ្ញុំនៅក្មេង ខ្ញុំបានដើរកាត់ ហើយមានពូរបស់ខ្ញុំនៅទីនោះ និងកំពុងហ្វឹកហាត់។ ថ្ងៃមួយ គាត់ឲ្យខ្ញុំសាកទាត់-វ៉ៃបាវសាក់ដើម្បីឲ្យគាត់មើល។ ដំបូងខ្ញុំអត់ចូលចិត្តទេ ដូច្នេះខ្ញុំប្រាប់គាត់ថា ខ្ញុំឈឺពោះ»។
យ៉ាងណាក្ដីពូរបស់ Nong-O មិនងាយបោះបង់ការបញ្ចុះបញ្ចូលឡើយ ហើយលោកបានព្យាយាមអន្ទងក្មួយឲ្យហ្វឹកហាត់បន្តទៀត។ បន្ទាប់មក Nong-O ក៏ទទួលបានការលើកទឹកចិត្តពីសំណាក់មិត្តភ័ក្ដិផ្សេងទៀតរហូតដល់មិនអាចប្រកែកបានក្នុងការចូលទៅហ្វឹកហាត់ប្រដាល់។
«បន្ទាប់មក ពូរបស់ខ្ញុំសួរទៀត ហើយក៏មានមិត្តភ័ក្ដិរបស់ខ្ញុំហាត់នៅទីនោះដែរ។ដូច្នេះ ទើបគាត់សួរខ្ញុំឲ្យចូលរួមបន្ថែម។ ពេលនោះហើយជាការចាប់ផ្ដើម»។ Nong-O ចងចាំបែបនេះ។
«ខ្ញុំចង់សាកដែរពេលនៅក្មេង។ ខ្ញុំឃើញពួកម៉ាកខ្ញុំធ្វើវា។ ដូច្នេះខ្ញុំចង់ធ្វើដូចគេដែរ និង លេងជាមួយពួកគេ។ ពេលពួកគេប្រកួត ពួកគេមានឱកាសធ្វើដំណើរទៅខេត្តឆ្ងាយៗ។ ខ្ញុំអត់ដែលទៅខេត្តឆ្ងាយៗទេ។ ខ្ញុំធ្វើដំណើរត្រឹមពីផ្ទះទៅសាលាប៉ុណ្ណោះ»។
Nong-O មិនបានចូលហ្វឹកហាត់ងាយៗទេ ប៉ុន្តែពេលរូបគេចូលហ្វឹកហាត់ គឺមានផ្នត់គំនិតខិតខំដើម្បីអភិវឌ្ឍខ្លួនឲ្យកាន់តែល្អប្រសើរ។ «នៅពេល ខ្ញុំ មានអាយុ ១០ ឆ្នាំ គឺខ្ញុំមិនចាប់អារម្មណ៍នឹងប្រដាល់មួយថៃទាល់តែសោះ ប៉ុន្តែ ខ្ញុំមានឆន្ទៈពុះពារ។ ទោះពេលខ្ញុំឈឺចាប់ ខ្ញុំមិនបោះបង់ទេ។ ខ្ញុំឈឺតែខ្ញុំមិនយំ។ ខ្ញុំចង់ធ្វើវា និងផ្ដោតលើវា»។ Nong-O ថ្លែងយ៉ាងដូច្នេះ។
វីដេអូប្រកួត៖ Nong-O vs. Hiroaki Suzuki
ដោយបង្កើនក្ដីស្រលាញ់ជាបន្តបន្ទាប់មកទៀត Nong-O ក៏ចាប់ផ្ដើមសន្យាខ្លួនឯង មុនពេលពូរបស់ខ្លួនសម្រេចចិត្តដាក់រូបគេឲ្យប្រកួតតេស្តនៅលើរេញ។ ក្មេងៗជំនាន់ Nong-O គឺត្រូវធ្វើតេស្តឡើងសង្វៀនដូចគ្នាពេលហ្វឹកហាត់បានមួយរយៈ ប៉ុន្តែ Nong-O ត្រូវការពង្រឹងសមត្ថភាពយូរដើម្បីទទួលបានជោគជ័យ។ នៅពេលមានការប្រកួត Nong-O តែងតែចាកចេញពីភូមិ និង ធ្វើដំណើរទៅប្រកួត។ Nong-O ពន្យល់ថា៖«បន្ទាប់ពីខ្ញុំបានហ្វឹកហាត់រយៈពេល១ខែ ពូរបស់ខ្ញុំប្រាប់ខ្ញុំថា គាត់យកខ្ញុំទៅប្រកួត។ ពេលប្រកួតបានម្ដង ខ្ញុំត្រលប់មកហ្វឹកហាត់ ៣ខែដើម្បីទទួលបានការប្រកួតទៀងទាត់។ ការប្រកួតដំបូងរបស់ខ្ញុំនៅស្រុកផ្សេងក្បែរភូមិដែលខ្ញុំរស់នៅ។ នាប្រកួតដំបូងខ្ញុំរំភើបផងភ័យផង។ វាភ័យដល់ថ្នាក់ជើងរបស់ខ្ញុំញ័រនៅលើរេញហើយអត់ដឹងថាត្រូវធ្វើអ្វីនោះទេ»។
Nong-O រៀបរាប់ទៀតថា ៖«ក្រោយចប់ទឹកទី១ ភាពភ័យខ្លាចក៏រសាត់បាត់ទៅ ពេលចប់ទឹកទី៣ ខ្ញុំក៏ឈ្នះពិន្ទុ ហើយ ពូរបស់ខ្ញុំក៏ផ្ដល់ប្រាក់រង្វាន់លើកទឹកចិត្ត។ ខ្ញុំទទួលបាន ១០០ បាត ។ ខ្ញុំសប្បាយចិត្តដែលខ្ញុំអាចឈ្នះ»។
Nong-O ទទួលការឈឺចាប់ច្រើនក្នុងការប្រកួតដំបូង។ នេះជាបទពិសោធន៍ដំបូងក្នុងការប្រកួត ប៉ុន្តែវាបានផ្ដល់នូវទំនុកចិត្តនាប្រកួតបន្ទាប់។ អារម្មណ៍របស់ Nong-O មានការផ្លាស់ប្ដូរច្រើនពេលមានការប្រកួតញឹក ហើយបង្កើតជាចំណង់ចំណូលចិត្តរួមទាំងបានធ្វើដំណើរទៅតាមតំបន់នានាទៀតផង។ «ខ្ញុំចង់នៅជាមួយពួកម៉ាកនិងធ្វើដំណើរជាមួយពួកគេ។ ពេលខ្ញុំឡើងប្រកួត វាជាពេលរីករាយដែលបានទៅខេត្តផ្សេងៗ។ ហើយពេលខ្ញុំឈ្នះ ខ្ញុំទទួលបានលុយដើម្បីទិញឧបករណ៍ដែលខ្ញុំចូលចិត្ត»។ Nong-O សង្កត់ធ្ងន់បែបនេះ។
ការប្រកួតទល់នឹង Delval នៅសង្វៀន ONE: IMMORTAL TRIUMPH គេនឹងបង្កើតក្ដីស្រលាញ់បន្ថែមទៀតសម្រាប់អ្នកគាំទ្រ និង បង្ហាញអំពីស្នៀតដ៏អស្ចារ្យដើម្បីការពារខ្សែក្រវាត់របស់ខ្លួន។