កីឡាអន្តរជាតិ
អន្តរជាតិ
អ្នកប្រដាល់មានចំណូលខ្ពស់ជាងគេប្រចាំឆ្នាំ២០១៩៖ Alvarez លេខ១ រីឯ Pacquiao លេខ៤
× ស្តេចប្រដាល់ហ្វីលីពីន Manny Pacquiao បានក្លាយជាអ្នកប្រដាល់រកចំណូលបានខ្ពស់បំផុតលំដាប់ថ្នាក់ទី៤ពិភពលោកសម្រាប់ការបង្ហាញខ្លួនលើសង្វៀនពីរលើកនៅឆ្នាំ២០១៩នេះ ចំនួន៣៦លានដុល្លារអាមេរិក ខណៈអ្នកប្រដាល់ម៉ិកស៊ិក Saul Canelo Alvarez ឈរលេខ១ ដោយរកបាន៩៤លានដុល្លារ។
ទស្សនាវដ្តីដ៏ល្បីរបស់អាមេរិក Forbes បានបង្ហាញបញ្ជីឈ្មោះអ្នកប្រដាល់ចំនួន៦រូប ក្នុងចំណោម១០០នាក់ដែលទទួលបានប្រាក់ចំណូលខ្ពស់បំផុតនៅឆ្នាំ២០១៩ ដោយគិតត្រឹមខែសីហានេះ។
អ្នកប្រដាល់មិនដែលចាញ់អាមេរិក Floyd Mayweather ដែលគ្រងតំណែងនេះនៅឆ្នាំ ២០១៧ មិនស្ថិតក្នុងបញ្ជីឈ្មោះសម្រាប់ឆ្នាំ២០១៩នេះទេ។ ចាប់តាំងពីរូបគេប្រកាសចូលនិវត្តន៍មក Floyd បង្ហាញខ្លួនមិនផ្លូវការនៅជប៉ុនដើមឆ្នាំនេះមួយលើកដោយទទួលបានតម្លៃខ្លួន៩លានដុល្លារអាមេរិក។
ខាងក្រោមនេះជាកីឡាករប្រដាល់ទាំង៦រូបដែលរកចំណូលខ្ពស់បំផុតលើលោកប្រចាំឆ្នាំ២០១៩៖
១- Saul Canelo Alvarez រកចំណូលបាន ៩៤លានដុល្លារអាមេរិក។ អ្នកប្រដាល់ទម្ងន់មធ្យមម៉ិកស៊ិក វ័យ២៩ឆ្នាំរូបនេះបង្ហាញខ្លួនសរុប៥៥លើក ឈ្នះ៥២ ស្មើ២ និងចាញ់១លើកប៉ុណ្ណោះ។ បង្ហាញខ្លួនមួយលើកចុងក្រោយនៅឆ្នាំ២០១៩ Alvarez ឈ្នះកីឡាករអាមេរិក Daniel Jacobs។
២- Anthony Joshua រកបាន ៥៥លានដុល្លារអាមេរិក។ អ្នកប្រដាល់ទម្ងន់ធ្ចន់សញ្ជាតិអង់គ្លេសវ័យ២៩ឆ្នាំ ធ្លាប់ប្រកួត២៣ដង ឈ្នះ២២ ចាញ់១លើក។ ប្រកួតលើកចុងក្រោយនៅខែកក្កដា ឆ្នាំ២០១៩ ចាញ់កីឡាករអាមេរិក Andy Ruiz Jr. ហើយអ្នកទាំងពីរនឹងប៉ះគ្នាក្នុងជំនួបសងសឹកនៅចុងឆ្នាំនេះ នាប្រទេសអារ៉ាប៊ីសាអូឌីត។
៣- Conor McGregor កីឡាករគុនចម្រុះ MMA សញ្ជាតិអៀរឡង់ វ័យ៣១ឆ្នាំ រកចំណូលបាន៤៧លានដុល្លារអាមេរិក។
៤- Manny Pacquiao រកចំណួលបាន ៣៦លានដុល្លារអាមេរិក។ អ្នកប្រដាល់ និងជាព្រឹទ្ធសភាហ្វីលីពីន វ័យ៤១ឆ្នាំរូបនេះ បង្ហាញខ្លួនពីរលើកនៅឆ្នាំ២០១៩ ដោយយកឈ្នះកីឡាករអាមេរិកទាំងពីរ ដែលរួមមាន Adrien Broner និង Keit Thurman។
៥- Deontay Wilder រកបាន ៣០,៥លានដុល្លារអាមេរិក។ អ្នកប្រដាល់ទម្ងន់ធ្ងន់សញ្ជាតិអាមេរិក វ័យ៣៣ឆ្នាំរូបនេះ ប្រកួតមិនដែលចាញ់ឡើយ ក្នុងនោះឡើងរេញ៤២លើក ឈ្នះ៤១ ស្មើ១។ ប្រកួតលើកចុងក្រោយឈ្នះកីឡាករអាមេរិកដូចគ្នា Dominic Breazeale កាលពីខែឧសភា ឆ្នាំ២០១៩។
៦- Gennady Golovkin រកបាន ២៥,៥លានដុល្លារអាមេរិក។ អ្នកប្រដាល់សញ្ជាតិ កាហ្សាក់ស្ថាន វ័យ៣៧ឆ្នាំរូបនេះមានប្រវត្តិប្រកួត៤១លើក ចាញ់មួយលើកប៉ុណ្ណោះ និងស្មើ១លើក។ ជំនួបលើកចុងក្រោយនៅខែកក្កដា ឆ្នាំ២០១៩ ឈ្នះកីឡាករកាណាដា Steve Rolls៕
Tag:
ប្រដាល់
Manny Pacquiao
© រក្សាសិទ្ធិដោយ thmeythmey.com