ខ្សែបម្រើណាហ្គាវើលដ៍ Amir Gurbani ស្ថិតក្នុងបញ្ជីក្រុមជម្រើសជាតិតួកមេនីស្ថានសម្រាប់ការប្រកួតវគ្គជម្រុះ World Cup ជុំទីពីរ ដែលត្រូវជួបជាមួយស្រីលង្កាក្នុងពូល F នៅកីឡដ្ឋាន Race Course International Stadium ក្រុងកូឡុំបូ នាថ្ងៃព្រហស្បតិ៍ ទី៥ ខែកញ្ញា ឆ្នាំ២០១៩។
Amir Gurbani អាយុ៣១ឆ្នាំ បានចូលរួមជាមួយក្រុមណាហ្គាវើលស៍ នារដូវកាលឆ្នាំ២០១៩ នេះ ដោយរកបានគ្រាប់បាល់បញ្ចូលទីសរុប៩គ្រាប់សម្រាប់ក្រុម។ គ្រាប់បាល់ដំបូងរបស់ Gurbani សម្រាប់ណាហ្គាវើលដ៍ គឺការសម្រេចបាន២គ្រាប់ក្នុងជ័យជម្នះ ៦-០ លើអគ្គស្នងការដ្ឋនគរបាលជាតិ។
មុនចូលរួមជាមួយណាហ្គាវើលដ៍ Gurbani ដែលជាកូនប្រុសរបស់អតីតកីឡាករល្បីឈ្មោះ Ali Gurbani នៃក្លិប Kopetdag Asgabat ក៏បានប្រឡូកអាជីពនៅក្របខណ្ឌតួកមេនីស្ថាន ជាមួយក្លិប Altyn Asyr Asgabat, Balkan Balkanabat, Ahal Ak-Dasayak រួមទាំងក្លិបកំពូលកៀហ្ស៊ីស៊ីស្ថាន Dordoy Biskhkek ផងដែរ។
ក្នុងក្រុមជម្រើសជាតិតួកមេនីស្ថាន Gurbani ក៏មិនមែនជាកីឡាករថ្មីនោះដែរ ដោយគេធ្លាប់បានបង្ហាញវត្តមាន៣ប្រកួតហើយសម្រាប់ក្រុមដែលស្ថិតនៅតំបន់អាស៊ីកណ្តាលមួយនេះ។ នៅឆ្នាំ២០១១ Gurbani បានបង្ហាញវត្តមានលើកដំបូង ដោយខ្សែបម្រើរូបនេះ លេងបាន៦៩នាទី ខណៈតួកមេនីស្ថាន ស្មើឥណ្ឌា ១-១ នាការប្រកួតប្រកួតជម្រុះ AFC Challenge Cup។
នៅឆ្នាំ២០១២ Gurbani បានចូលលេងជំនួស Batyrow Gurbangeldi នៅនាទី៥៩ ពេលដែលតួកមេនីស្ថានយកឈ្នះវៀតណាម ១-០ នាការប្រកួតមិត្តអន្តរជាតិ។ នៅឆ្នាំ២០១៥ Gurbani បានចូល២០នាទីចុងក្រោយ ក្នុងការប្រកួតមិត្តភាពអន្តរជាតិក្រៅផ្លូវការ ដែលម្ចាស់ផ្ទះកាតា ឈ្នះតួកមេនីស្ថាន ២-១។
ខ្សែបម្រើរូបនេះ ស្ថិតក្នុងចំណោមកីឡាករ៥រូបរបស់គ្រូបង្វឹកក្រូអាស៊ី Ante Mise ដែលលេងនៅក្រៅប្រទេស ដោយកីឡាករភាគច្រើនប្រកបអាជីពនៅក្នុងក្របខណ្ឌកំពូល Turkmenistan Yokary Liga នៅតួកមេនីស្ថានផ្ទាល់។
ក្នុងបទសម្ភាសមួយជាមួយ CNCC លោក មាស ចាន់ណា បានបង្ហាញពីមោទកភាពរបស់ខ្លួន និងក្លិបទាំងមូល ដោយរំពឹងថា Gurbani នឹងធ្វើបានល្អប្រសើរជាងមុន។ «ទោះលីគស្រុកយើងមិនទាន់ខ្លាំងដូចលីគថៃអីដែរ តែកំណត់ត្រារបស់ពួកគេ ហើយគេលេងល្អអ៊ីចឹងទៀត នោះអាចមានលទ្ធភាពជាប់ជម្រើសជាតិហើយ»។ នេះជាការលើកឡើងរបស់គ្រូបង្វឹកណាហ្គាវើល៍។
កីឡាករតួកមេនីស្ថាន៖
អ្នកចាំទី: Mamed Orazmuhamedov (FC Altyn Asyr), Batyr Babayev (FC Ahal), Rahat Japarov (FC Kopetdag).
ខ្សែការពារ: Mekan Saparov (FC Altyn Asyr), Shohrat Soyunov (FC Ahal), Abdy Bashimov (FC Ahal) Guychmyrat Annagulyyev (FC Ashgabat), Gurbangeldi Batyrov (FC Altyn Asyr), Zafar Babajanov (FC Altyn Asyr), Serdar Annaorazov (FC Ahal).
ខ្សែបម្រើ: Serdar Geldiyev (FC Altyn Asyr), Vezirgeldi Ilyasov (FC Ahal), Resul Hojayev (FC Altyn Asyr), Yhlas Magtymov (FC Shagadam), Merdan Gurbanov (FC Ahal), Dovletmyrat Seyitmuhammedov (FC Kopetdag), Artur Gevorkyan (free agent), Ruslan Mingazov (FC Irtysh, Kazakhstan), Arslanmyrat Amanov (FC Lokomotiv, Uzbekistan), Amir Gurbani (ណាហ្គាវើលដ៍)
ខ្សែប្រយុទ្ធ: Vakhyt Orazsahedov (FC Dordoi, Kyrgyzstan), Altymyrat Annadurdyyev (FC Altyn Asyr), Didar Durdyyev (FC Ahal), Murat Yakshiyev (FC Altyn Asyr), Mihail Titov (FC Altyn Asyr)៕